Read Chambeali याकूब 3 Bible Online

याकूब 3 - Chambeali bible

याकूब 3

¹ओ मेरे संगी विश्वासियों, तुसा बिच का हर कोई कलीसिया बिच गुरु बणने री इच्छा ना रख्खे किजोकी तुसा जाणदे ही हिन कि असा गुरुआं रा दूए लोक्कां जादा सख्ती कने न्याय होणा।

²मैं तुसा जो समजाया करदा है कि असा सारेयां का गलतियां हुंदी रैहन्दी पर जे अगर कोई मणू बोलणे बिच कदी कोई गलती ना करो तां से पूरा सही मणू है ते से अप्पु जो पूरा काबू भी करी सकदा।

³जिय्यां असी इक्क घोड़े रे मुँह बिच लगाम लाई करी तिसजो जिय्यां मर्जी काबू करी सकदे

⁴या पाणी वाले जहाज रा उदारण भी लेई सकदे, चाए से बड़े बड्डे हुन्दे अते तेज ब्यार कने चलदे, पर इक्क छोटी जदेयी पतवार कने तिसजो चलाणे वाला तिसजो काबू बिच रख्खी करी जित्ते मर्जी लेई जाई सकदा।

⁵इय्यां ही जिब्ब, जे सरीर रा इक्क छोटा हिस्सा है, बड्डी-बड्डी डींगा मारदी, ध्यान देयो कि इक्क जरा करी चिंगारी पूरे बण जो फुक्की सकदी।

⁶हाँ, जिब्ब इक्क चिंगारी सांई है, ए सरीर रा इक्क खतरनाक हिस्सा है जे इन्सान का अधार्मिक कम्म करांदी ते तिसेरे पूरे जिन्दगी जो बर्बाद करी दिंदी, ए असा रे जिन्दगी जो नरक री आग्ग सांई बर्बाद करी सकदी।

⁷हर तरिक्के रे जंगली जानवर, चिड़ू-पखेरु, रेंगणे वाले जीव-जन्तु, पाणी वाले जानवर, इन्सान रे वस बिच आई सकदे ते हिन भी

⁸पर जिब्ब जो कोई काबू बिच नी करी सकदा, ए खतरनाक ते बुरा है ते जानलेवा सप्प सांई जहर कने भरित्ते री है।

⁹जिब्ब कने अपणे प्रभु अते पिता परमेश्वर री बड़ाई करदे अते इस्सी कने मणूआं जो जे परमेश्वर रे रुप बिच बणाये गे हिन, कोसदे भी हिन।

¹⁰इक्क ही मुँह का शुक्रिया करदे ते श्राप भी दिंदे पर ओ मेरे संगी विश्वासियों, इदेया तां नी होणा चाएदा।

¹¹ओ मेरे संगी विश्वासियों, जिय्यां इक्क ही नाड़ू का मिठ्ठा पाणी अते खारा पाणी नी निकली सकदा

¹²ते अंजीर रे बूट्टे पर जैतून या अंगूर री बेलां पर कदी अंजीर नी लगदे, तिय्यां ही खारे पाणी रे नाड़ू का कदी मिठ्ठा पाणी नी निकली सकदा।

¹³जे अगर तुसा समजदार ते परमेश्वर री गल्लां जो समजणे वाले मणू हिन, तां इधेरे तांइ इक्क खरी जिन्दगी जियो। निम्तेपन ते समजदारी कने ठीक कम्म करी के साबित करो।

¹⁴पर जे अगर तुसा रे मन बिच बड़ा हिरस अते मतलबीपन है, तां तुसा झूठ बोल्ली करी इस सच्चाई पर पर्दा पाया करदे हिन कि तुसा समजदार नी हिन।

¹⁵इदेया ज्ञान तां परमेश्वर रे पास्से का नी मिलदा, बल्कि से तां दुनियावी है, आत्मिक नी है बल्कि शैतान रा है।

¹⁶जित्ते हिर्स अते मलतबीपन हुन्दा, तित्ते बखेड़े ते हर तरह री बुराई भी हुंदी।

¹⁷पर परमेश्वर रे पास्से का मिलणे वाला ज्ञान सबका पैल्ले तां से पवित्र हुन्दा, फिरी मिलनसार, भद्र, दया कने भरितेरा अते ठीक कम्मां कने लद्दितेरा, अते बगैर भेद-भाव रे ते सच्चा भी हुन्दा।

¹⁸मेल-मिलाप कराणे वाले तिस सांती रे बीह् जो बांदे ते पवित्रता री फसल कटदे।