Read Chambeali याकूब 5 Bible Online

याकूब 5 - Chambeali bible

याकूब 5

¹ओ अमीर लोक्कों सुणी तां लेयो, तुसा अपणे आणे वाले दुखां पर लेरां मारी-मारी करी रोओ।

²तुसा री जायदाद बर्बाद होई जाणी ते तुसा रे कपड़े खराब होई गेरे हिन।

³तुसा रा सोन्ना ते चाँदी रा कोई मोल नी रेया। परमेश्वर रे न्याय करणे रे दिन पर तुसा रे कठेरे रा धन-दौलत ने तुसा रे खिलाफ सबूत होणा ते जिस धन-दौलत जो तुसा कठेरेया तिसने तुसा जो आग्ग सांई मुकाई दैणा।

⁴दिख्खो, जिन्हा मजदूरां ने तुसा रे खेत्तर कट्टे रे हिन, ते तिन्हेरी मजदूरी जे तुसा धोखा देई करी रख्खी लित्ती, से मजदूर ते बाड्डी करणे वाले तुसा रे खिलाफ परमेश्वर का लेरां मारी करी रोया करदे हिन ते तिन्हेरी बिनती सेना रे प्रभु ने सुणी लित्ते री है।

⁵तुसा दुनिया रे एशो अराम बिच ही लग्गी रे ते बड़ा ही सुख भोग्गेया। तुसा हमेसा सिर्फ अपणी खुसी तांइ जिये ते तिस्सी तरिक्के कने तांइ अप्पु जो तैयार कित्ता कि प्रभु तुसा जो सजा दैण।

⁶जे धार्मिक मणू तुसा रा सामणा नी करी सकदे थिये तुसा तिन्हा जो दोषी साबित करी के मारी रख्खेया।

⁷इधेरे तांइ ओ मेरे संगी विश्वासियों, प्रभु रे आणे तिकर सबर रखो। जिय्यां किसान दुनिया री कीमती फसल री उम्मीद रख्खी करी पैल्ली ते आखरी बरखा तिकर सबर रखदा ताकि फसल उगे ते बड्डिणे तांइ तैयार होई जाए।

⁸तिय्यां ही तुसा भी सबर रखो, ते हिम्मत रख्खो, किजोकी प्रभु तौले ही आणे वाले हिन।

⁹ओ संगी विश्वासियों, इक्क दूज्जे पर मत कुड़कुड़ाओ, ताकि परमेश्वर जे हाकिम है तुसा जो सजा ना दे, ते से अवे बड़े नेड़े है ते वस पुजणे ही वाला है।

¹⁰ओ संगी विश्वासियों, जिन्हा भविष्यद्वक्ता ने प्रभु रे नां कने गल्लां कित्ती, तिन्हेरे दुख चुक्कणे ते सबर रखणे जो इक्क आर्दश समझो।

¹¹असी सबर रखणे वाले लोक्कां जो धन्न बोलदे। तुसा अय्यूब [2]नां रे मणू रे सबर रखणे रे बारे बिच तां सुणे रा ही है, ते प्रभु ने आखर तिसजो जे प्रतिफल दित्ता तिसजो तुसा जाणी लित्ते रा कि प्रभु अती करुणामयी ते दयालू हिन।

¹²पर ओ मेरे संगी विश्वासियों, सबका खरी गल्ल ए है कि कदी कसम मत खांदे, न स्वर्ग री, ना धरती री, ते ना ही कुसकी होर चीज दी पर तुसा री गल्ल हाँ री हाँ ते ना री ना हो, ताकि परमेश्वर तुसा पर इल्जाम लाई करी तुसा जो सजा दे।

¹³जे तुसा बिच कोई दुखी हो तां प्रार्थना करे ते जे अगर खुस हो तां परमेश्वर की तारीफ रे भजन गाए।

¹⁴तुसा बिच जे अगर कोई बिमार है तां कलीसिया रे बुजुर्ग लोक्कां जो सद्दो, ते से प्रभु रे नां कने तिस पर तेल मली करी तिसेरे तांइ प्रार्थना करण,

¹⁵ते विश्वास री प्रार्थना कने बिमार ने बची जाणा ते प्रभु ने तिस मणू जो ठीक करी दैणा ते जे उसने पाप भी कित्ते रे होणे तां से भी माफ होई जाणे।

¹⁶इधेरे तांइ तुसा अप्पु बिच इक्क-दूए रे सामणे अपणे-अपणे पाप्पां जो मन्नी लेयो, ते इक्क-दूए तांइ प्रार्थना करो, जिस कने तुसा अपणी बिमारियां का ठीक होई जाओ। धार्मिक मणू री प्रार्थना रे असर कने सब कुछ होई सकदा।

¹⁷भविष्यद्वक्ता एलिय्याह भी तां असा सांई दुख-सुख भोगी मणू ही थिया, ते तिसने बड़े पूरे दिल कने प्रार्थना कित्ती ताकि बरखा ना हो, ते साड्डे त्रै साल्लां तिकर बरखा नी होई,

¹⁸फिरी तिनिए प्रार्थना कित्ती, ते आसमान का बरखा होई, ते जमीन फलवतं होई।

¹⁹ओ मेरे संगी विश्वासियों, जे तुसा बिच का कोई सच्चाई रे रस्ते का भटकी जाए ते कोई तिसजो फिरी परमेश्वर का हटणे बिच मदद करे,

²⁰तां से ए जाणी लये कि जे कोई कुसकी भटके रे पापी जो परमेश्वर का हटणे बिच मदद करदा तां परमेश्वर ने तिस पापी मणू रे मते सारे पाप्पां जो माफ करी दैणा ते तिसजो हमेसा री मौत का बचाई लैणा।