Read Chambeali 1 पतरस 3 Bible Online

1 पतरस 3 - Chambeali bible

1 पतरस 3

¹ओ लाड़ियों, तुसा भी अपणे लाड़ेयां रे अधीन रेयो, किजोकी जे अगर तिन्हा बिच का कोई भी सुब बसेख जो मनणे का इन्कार करी दे, तां तिन्हा ने तुसा रे सुच्चे ते भक्ति कने भरपूर रैह्ण-सैह्‍ण जो दिख्खी करी तुसा रे बोल्ले बगैर ही मसीह बिच विश्वास करी लैणा।

³बाहरी खूबसुरती री फिकर मत करो जे बाल बणाणे ते सोन्ने मोत्ती ते मैह्‍ंगे-मैह्‍ंगे गहणे, ते सोह्णे कपड़े पाणे पर आधारित है।

⁴निम्ते ते चुप्प रेई करी अपणे दिल का खूबसुरत बणो। इदेइ खूबसुरती हमेसा तांइ रेह्न्दी ते परमेश्वर री नजर बिच ए कीमती है।

⁵इन्हा गुणां रे ही जरिये पैल्ले जमान्ने री भक्त जनानियां ने अप्पु जो परमेश्वर री बिच खूबसुरत बणाया जिन्हा जो इस गल्ल रा भरोस्सा थिया कि परमेश्वर ने तिन्हा कने कित्ते रे वादेयां जो पूरा करणा, ते इय्यां ही से अपणे लाडे़यां रे अधीन रेई।

⁶जिय्यां सारा अब्राहम रे अधीन रेह्न्दी थी ते तिसजो स्वामी बोलदी थी, तिय्यां ही जे अगर तुसा निडर होई करी से ही कम्म करगी जे सही है तां तुसा सारा री कुड़ियां सांई ठैहरणा।

⁷तिय्यां ही ओ लाड़ेयों, अपणी लाड़ियां कने बड़ी नरमीयत कने रेयो, तुसा जो ए गल्ल याद रखणी चाएदी कि से तुसा का कमजोर हिन, इधेरे तांइ तुसा जो तिन्हेरी इज्जत करणा चाएदी, किजोकी तुसा दोन्नों तिस वरदान बिच हिस्सेदार हिन जे परमेश्वर ने तुसा जो बड़े अनुग्रह कने दित्ते रा है, जे कि हमेसा री जिन्दगी है। इय्यां ही करेया करो किजोकी जां तुसा प्रार्थना करेया करो तां से तुसा जो सुणे।

⁸आखिरकार मैं तुसा सारेयां जो ए बोलणा चाह्‍ंदा कि तुसा सारे जणे इक्क-मन होई करी रेयो। इक्क दूए कने हमदर्दी रख्खो। इक्क-दूए जो अपणे परिवार रे मणूआं सांई प्यार करो, इक्क-दूए तांइ दयालू बणो ते सारेयां कने नरम बणो।

⁹बुराई रे बदले बुराई मत करो ते ना गाली रे बदले गाली देयो, पर इसेरे उलट आशीर्वाद ही देया करो, किजोकी परमेश्वर ने तुसा जो इधेरे तांइ सद्दे रा है ताकि तुसा सारेयां जो आशीष देयो। जे अगर तुसा इय्यां करगे, तां परमेश्वर ने तुसा जो आशीष दैणी।

¹⁰किजोकी पवित्रशास्त्र बिच लिख्खे रा है, “जे अगर कोई मणू अपणी जिन्दगी रा आनंद लैणा चाह्‍ंदा, ते बदिया दिन दिखणा चाह्‍ंदा, तां से चुकन्ना रे कि कोई गलत गल्ल ना बोल्ले। ते ओ मणू तैसी गल्लां बोलणा छड्डी दे जे सच्ची नी हिन।

¹¹तिसजो बुराई रे कम्म करणा छड्डी दैणा चाएदा। इसेरे बजाए, तिसजो से ही करणा चाएदा जे खरा है। सारेयां कने सांती कने रैह्णे री कोसीस करो।

¹²किजोकी परमेश्वर हमेसा तिन्हा लोक्कां रा ध्यान रखदे जे भलाई रे कम्म करदे, ते से हमेसा तिन्हा लोक्कां री प्रार्थनां सुनणे तांइ तैयार रैह्‍न्दे, पर परमेश्वर तिन्हा लोक्कां रे खिलाफ हिन जे बुराई रे कम्म करदे।”

¹³जे अगर तुसा हमेसा भलाई रे कम्म करणे री कोसीस करदे रैह्‍न्दे, तां कोई भी तुसा जो नुक्सान नी पूजाई सकदा।

¹⁴पर जे अगर तुसा जो भलाई रे कम्म करणे री वजह कने भी जुल्म सैह्‍णा पये, तां परमेश्वर ने तुसा जो आशीष दैणी। तिय्यां ही करो जिय्यां कि यशायाह ने पवित्रशास्त्र बिच लिख्खे रा है, “तिन्हा लोक्कां का मत डरो जे तुसा जो धमकांदे, ते इस गल्ल री फिकर मत करदे कि लोक्कां ने कै करणा।”

¹⁵पर मसीह तांइ अपणे मन बिच आदरमान रख्खो, ते प्रभु रे तौर पर तिन्हेरी इज्जत करो। जे अगर कोई मणू तुसा का तिस आस रे बारे बिच किच्‍छ पुच्छे जे असा सारे जणेया बिच है, तां तिसजो नरमी ते इज्जत कने जवाब दैणे तांइ हमेसा तैयार रेयो।

¹⁶हमेसा भलाई रे कम्म करणे तांइ तैयार रेयो, तिन्हा ने तुसा रे बदिया बोल-चाल जो दिख्खी करी शर्मिंदा होणा किजोकी तुसा मसीह रे मणू हिन।

¹⁷जे अगर परमेश्वर री ए ही मर्जी हो कि असा जो अपणे भलाई रे कम्मां रे बदले जुल्म सैह्‍णा पेयो, तां से ही बदिया है। ए अपणे बुरे कम्मां रे बदले जुल्म सैह्णे का जादा खरा है।

¹⁸मैं ए इधेरे तांइ बोल्लेया करदा है किजोकी मसीह ने असा रे पाप्पां रे बदले जुल्म सैह्‍ण कित्तेया ते मारे गे। से इक्क ही वरी मरे ते तिय्यां दुबारा करणे री जरुरत नी है। से अप्पु धार्मिक थिये जिन्हा असा जो परमेश्वर रे नेड़े अणने तांइ असी पाप्पी लोक्कां तांइ अपणी जान देई दित्ती। लोक्कां ने तिन्हेरे सरीर जो मारी छड्डेया पर तिन्हेरी आत्‍मा हल्ले भी जिया करदी है।

¹⁹तिसका बाद तिन्हेरी आत्‍मा ने जाई करी तिस जगाह् बिच होर आत्मां जो सुब बसेख सुणाया जिन्हा जो परमेश्वर ने तिस जगाह् बिच कैद करी छड्डे रा है जित्ते सारे मरे रे लोक्कां री आत्मां रेह्न्दी।

²⁰ए तिन्हा लोक्कां री आत्मां हिन जिन्हा ने लम्बे समय पैल्ले परमेश्वर रे हुकम री ना-फरमानी कित्ती थी, जां नूह अपणा जहाज बणाया करदा थिया, ते परमेश्वर इस गल्ल रा इंतजार करेया करदे थिये कि ए मणू अपणे पाप्पां का तौबा करगे कि नी। पर सिर्फ आठ्ठ मणू [2]ही तिस भयानक बाढ़ बिच डूबणे का बचाए गे।

²¹पुराणे जमान्ने बिच तिन्हेरा छुटकारा अवे अज्ज रे जमान्ने बिच तिस छुटकारे रा उदारण है जे असा जो बपतिस्मा लैणे रे जरिये मिलदा। जिस पाणी बिच असी बपतिस्मा लिंदे से सरीर री गंदगी जो दुर नी करदा, पर ए इस गल्ल री निशानी है कि असा ने परमेश्वर का अपणे पाप्पां री माफी मंगे री है, ते असा रे मन तिन्हा पाप्पां री वजह कने अवे परेशान नी हिन। असा जो अवे असा रे पाप्पां का माफी मिल्ली सकदी किजोकी मसीह यीशु मुर्देयां बिच का फिरी जिन्दा होई गेरे हिन,

²²ते अवे से स्वर्ग जो चली गेरे हिन। से अवे सबका ऊच्ची जगाह् पर, परमेश्वर रे सज्जे हत्थ पास्से का सारे स्वर्गदूतां पर ते सारी हुकुमतां ते ताकतां पर राज करेया करदे हिन।