Read Chambeali 1 पतरस 4 Bible Online

1 पतरस 4 - Chambeali bible

1 पतरस 4

¹इधेरे तांइ जिय्यां मसीह ने भी जुल्म सहन कित्ते जां तिकर से अपणे सरीर बिच रे, तिय्यां ही तुसा भी तिस्सी व्यवहार कने जुल्म सैह्ण करणे तांइ तैयार रेयो जदेया मसीह रा थिया। किजोकी जे अगर तुसा मसीह तांइ जुल्म सैह्‍ण करणे रा फैसला करी लित्ते रा है, तां इधेरा मतलब है कि तुसा पाप ना करणे रा फैसला कित्ते रा है।

²इसेरे अंजाम रे तौर पर तिस मणू ने इस दुनिया बिच अपणी बाकि री जिन्दगी अपणे सरीर री बुरी इच्छा जो पूरा करदे होए नी बिताणी, पर तिसने से ही कम्म करणा जे परमेश्वर तिसका करवाणा चाह्‍ंदे।

³किजोकी तुसा ने अपणे पैल्ले री जिन्दगी जो तिन्हा कम्मां बिच गुजारी दित्ती जिन्हा जो करणे बिच अविश्वासी मणू बड़े खुस रैह्‍न्दे। तुसा री जिन्दगी व्यभिचार ते अश्लीलता, ते अविश्वासी लोक्कां री धाम ते सराब पी करी मतवाल्ले होणे, रंगरेलियां मनाणे, ते तिन्हेरी मूर्तां री पूजा करणे बिच बीत्ती जिन्हा का परमेश्वर नफरत करदे।

⁴इसी वजह कने अवे से मणू हैरान हुंदे जां तुसा तिन्हेरे गंदे कम्मां बिच तिन्हा कने शामिल नी हुंदे। इधेरे तांइ से तुसा रे बारे बिच गलत गल्लां बोलदे।

⁵पर इक्क दिन परमेश्वर ने तिन्हा सारेयां का हिसाब-किताब लैणे तांइ तिन्हा जो अपणे मुहाग्गर खड़ा करणा, ते परमेश्वर ने तिन्हा सारे मणूआं का तिन्हा कम्मां रे बारे बिच पूच्छणा जे तिन्हा ने इस धरती पर रैह्‍न्दे बेल्ले कित्ते। परमेश्वर ने कै जिन्दा ते कै मुर्दा, हर इक्क जणे का हिसाब-किताब लैणा।

⁶इसी वजह कने मरे रे लोक्कां ने भी मसीह रा सुब बसेख सूणेया। हर इक्क सांई तिन्हेरी शरीरी मौत होई, पर अवे से आत्‍मा बिच परमेश्वर कने हमेसा-हमेसा तांइ जिया करदे हिन।

⁷हर चीज रा अंत नेड़े है। इधेरे तांइ चुकन्ने रेयो ते अपणे मन पर काबू रख्खो ताकि तुसा प्रार्थना करदे रेयो।

⁸अते सबका बड्डी गल्ल ए है कि इक्क-दूज्जे तांइ प्यार रखो, किजोकी प्यार अणगिणत पाप्पां जो ढक्की दिंदा

⁹बगैर बुड़बुड़ाए मेहमान्नां जो अपणे घरे रुकाओ ते तिन्हेरी खात्तरदारी करेया करो।

¹⁰हर इक्क जणे जो परमेश्वर का कोई वरदान मिल्ले रा है ते तिन्हा जो तिस वरदान रा इस्तेमाल दुज्जेया री सेवा करणे तांइ करणा चाएदा। तिन्हा जो तिस वरदान रा इस्तेमाल परमेश्वर रे सेवादार मणूआं री खात्तरदारी करणे तांइ भी करणा चाएदा।

¹¹उदारण रे तौर पर, जे अगर तुसा का प्रचार करणे रा वरदान है, तां तुसा जो परमेश्वर रे बसेख रा प्रचार करणा चाएदा। जे अगर तुसा का लोक्कां री सेवा करणे रा वरदान है, ता परमेश्वर री दित्ते री ताकत कने लोक्कां री सेवा करो। तां हर इक्क चीज जे तुसा करदे, तिस कने परमेश्वर जो मसीह यीशु रे जरिये महिमा मिलणी। सारी महिमा ते ताकत हमेसा-हमेसा तांइ परमेश्वर री ही है। आमीन!

¹²ओ प्यारे दोस्तो, मसीह रे मणू होणे रे नात्ते तुसा जे जुल्म सहन करेया करदे हिन, तिन्हेरी वजह कने हैरान मत हो, पर ए सारी चीजां ए दिखाणे तांइ होया करदी हिन कि तुसा हकीकत बिच परमेश्वर बिच विश्वास करदे या नी। इधेरे तांइ ए मत सोच्चो कि तुसा कने किच्‍छ अजीब होया करदा है।

¹³बल्कि इस गल्ल तांइ सिर्फ खुस हो, किजोकी तुसा जो मसीह पर होए जुल्मां री बराबरी बिच थोड़ा जदेया हिस्सा मिल्लेया। किजोकी जां मसीह ने लोक्कां पर अपणी महिमा जाहिर करणे तांइ हटणा, तिस बेल्ले तुसा जो बड़ा आनंद मिलणा।

¹⁴जे मसीह यीशु रे नां री वजह कने तुसा री बेजती कित्ती जांदी तां तुसा धन्न हिन, किजोकी परमेश्वर रा महिमामय आत्‍मा तुसा बिच वास करदा।

¹⁵जे अगर तुसा जो दुख झेलणा पे, तां इस वजह कने नी कि तुसा हत्यारे, चोर ते बुरे कम्म करणे वाले मणू हिन, या दूज्जेयां रे कम्म बिच रुकावट पाणे वाले मणू हिन,

¹⁶बल्कि तुसा मसीह बिच विश्वास करणे वाले मणू हिन, ते तुसा तिसजो अपणी बेजती मत समजदे, बल्कि मसीह बिच विश्वास करणे रे नात्ते परमेश्वर री महिमा करो।

¹⁷से समय आई गे रा है कि परमेश्वर लोक्कां का हिसाब लैणा सुरु करी दैण। किजोकी तिन्हा ने असी विश्वासी लोक्कां का ही हिसाब-किताब लैणा सुरु करणा, ता फिरी तिन्हा ड्रौणी चीजां रे बारे बिच सोच्चो जे सुब बसेख री ना-फरमानी करणे वालेयां कने होणी।

¹⁸जिय्यां कि पवित्रशास्त्र बिच लिख्खे रा है, “इत्ते तिकर कि ठीक मणूआं जो छुटकारा पाणे का पैल्ले जुल्म सैह्‍णा जरुरी है, दुष्ट लोक्कां का भी जादा जे परमेश्वर री अधीन नी रैह्‍न्दे।”

¹⁹इधेरे तांइ तिन्हा लोक्कां जो परमेश्वर बिच विश्वास करणा जारी रखणा चाएदा जे मणू परमेश्वर री मर्जी रे मुताबिक जुल्म सहन करदे। परमेश्वर से चीज हमेसा करदे जिसेरा वादा तिन्हा ने कित्ते रा हो, इधेरे तांइ भलाई रे कम्म करदे रेयो।