Read Chambeali 1 पतरस 5 Bible Online

1 पतरस 5 - Chambeali bible

1 पतरस 5

¹तुसा रे कलीसिया रे बुजुर्ग लोक्कां कने मैं इक्क संगी मुखिया ते मसीह पर होए जुल्मां रा इक्क इदेया गवाह होणे रे नात्ते, जिनिये तिन्हेरी महिमा बिच हिस्सेदार भी होणा ए बिनती करदा,

²कि जिय्यां इक्क पुहाल अपणी भेड़ां री रखवाल्ली करदा, तिय्यां ही तुसा भी तिन्हा सारेयां री रखवाल्ली करो जिन्हा जो परमेश्वर ने तुसा जो सौंप्पे रा है। ए सब किच्‍छ अपणी मर्जी कने करो किजोकी ए ही परमेश्वर री मर्जी है। ए सब इधेरे तांइ मत करो किजोकी तुसा पैसे कमाणा चाह्‍ंदे, पर इधेरे तांइ करो किजोकी तुसा परमेश्वर ते लोक्कां री सेवा करणा चाह्‍ंदे।

³ते परमेश्वर ने जे मणू तुसा जो सौंप्पे रे हिन तिन्हा पर जादा हक मत जमाओ जिय्यां कोई अधिकारी अपणे नेड़े-तेड़े रे लोक्कां पर जतांदा। पर इसेरे बजाए तिन्हा तांइ इक्क उदारण बणो।

⁴जां मसीह यीशु ने हटी आणा जे असा रे सबका बड्डे पुहाल हिन, तां तिन्हा ने तुसा जो इक्क इदेया ईनाम दैणा जिसेरी चमक कदी नी मुकणी।

⁵तिय्यां ही, तुसा जवान मणू भी अपणे का बड्डे विश्वासियां रे कहे मुताबिक चलेया करो। तुसा जो निम्तेपन कने इक्क-दूए री सेवा करणा चाएदी, जिय्यां कि पवित्रशास्त्र बिच लिख्खे रा है, “परमेश्वर घमंडी मणूआं रे खिलाफ हिन, पर से निम्ते मणूआं कने ठीक हिन।”

⁶इधेरे तांइ अप्पु जो परमेश्वर रे सामणे निम्ता बणाओ जे तुसा जो बचाणे तांइ ताकतवर हिन ताकि से तुसा जो सही समय पर बड़ा आदरमान दैण।

⁷परमेश्वर तुसा री फिकर करदे, इधेरे तांइ अपणी सारी फिकरां तिन्हेरे हवाल्ले करी देयो।

⁸चुकन्ने ते तैयार रेयो, किजोकी शैतान जे तुसा रा दुश्मण है, से तुसा पर हमला करणा चाह्‍ंदा ताकि तुसा परमेश्वर रे गलाए चलणा छड्डी देयो। से कुसकी शेर सांई है जे कुसकी जो मारी करी खाई रखणे तांइ दाहड़दे होए चौं पास्से घूमदा रैहन्दा।

⁹तुसा जो अपणे मजबूत विश्वास कने तिसेरा सामणा करणा चाएदा। याद रख्खो, पूरी दुनिया बिच सारे विश्वासी तैसे ही जुल्म सहन करेया करदे हिन जदेय तुसा सहन करेया करदे हिन।

¹⁰परमेश्वर जे पूरे तरिक्के कने अनुग्रह कने भरित्ते रे हिन, तिन्हा ने असा रा मसीह कने रिस्ता होणे री वजह कने अपणी हमेसा तिकर रैह्णी वाली महिमा बिच हिस्सेदार बणने तांइ सद्दे रा है। तुसा रे थोड़े समय तिकर जुल्म सैह्णे का बाद परमेश्वर ने तुसा जो खरा मणू बनाणा ताकि तुसा बिच कोई खोट ना रे ते तिन्हा ने तुसा रे दिल जो मजबूत बनाणा ताकि तुसा तिन्हा बिच विश्वास करणे बिच मजबूत बणो।

¹¹से महिमा पाणे रे हकदार हिन किजोकी तिन्हेरी ताकत रा कोई अंत नी है। आमीन!

¹²मैं सिलवानुस री मदद कने ए छोटी जदेई चीठ्ठी लिख्खी करी तुसा जो भेज्जी दित्ते री है। मैं तिसजो मसीह बिच अपणा भरोस्सेमंद भाई समजदा। मेरा तुसा जो ए चीठ्ठी लिखणे रा मकसद तुसा जो होंसला बंधाणा ते इस गल्ल रा यकीन कराणा है कि जे तुसा सैह्‍ण करेया करदे हिन, से तुसा तांइ परमेश्वर रे अनुग्रह रा हिस्सा है। तिन्हेरे अनुग्रह बिच मजबूती कने टिकी रेयो।

¹³जे विश्वासी मणू बेबिलोन सहर [3]बिच रेया करदे हिन, जिन्हा लोक्कां जो परमेश्वर ने तुसा सांई ही चुणे रा है, तुसा जो मेरा नमस्कार। मरकुस, जे मेरे तांइ मुंडे सांई है, से भी तुसा जो नमस्ते बोलदा।

¹⁴इक्क-दूए जो मसीही प्यार कने नमस्ते करो। मैं प्रार्थना करदा कि परमेश्वर तिन्हा सारेयां जो सांती दे जे मसीह रे हिन।