Read Chambeali 1 यूहन्ना 2 Bible Online

1 यूहन्ना 2 - Chambeali bible

1 यूहन्ना 2

¹ओ मेरे बच्चो, ए मैं तुसा जो इस तांइ लिख्खेया करदा है कि तुसा पाप ना करो। जे अगर कोई पाप करे, तां परमेश्वर पिता का असा तांइ कोई इक्क है जिन्हेरा नां मसीह यीशु है ते से परमेश्वर पिता का असा तांइ बिनती करदे। से धार्मिक हिन।

²ते मसीह यीशु असा रे पाप्पां री कीमत चुकाणे तांइ कुर्बान होया, ते सिर्फ असा तांइ ही नी पर सारी दुनिया रे लोक्कां रे पाप्पां तांइ भी।

³जे असी परमेश्वर रे हुकमां जो मनगे, तां इस कने ए पता चलणा की असी तिन्हा जो जाणी गेरे हिन।

⁴जे कोई ए बोलदा कि मैं परमेश्वर जो जाणदा, ते तिन्हेरी गल्लां जो नी मनदा, तां से झूठ्ठा है, तां से सच्चाई रे हिसाब कने जिन्दगी नी जिन्दा।

⁵पर जे कोई परमेश्वर पिता रे वचन जो मनदा, तां तिस बिच हकीकत अंदर परमेश्वर रा प्यार सिद्व होए रा है इसी कने असी जाणदे कि असी तिन्हेरे बिच हिन:

⁶जे अगर कोई ए बोलदा की मैं परमेश्वर बिच बणी रैहन्दा, तां तिस तांइ जरुरी है कि तदेई ही जिन्दगी जिये जदेई जिन्दगी मसीह यीशु जिन्दे थिये।

⁷ओ प्यारे विश्वासियों, मैं तुसा जो कोई नौआ हुकम नी लिख्येया करदा है, पर से ही पुराणा हुकम जे सुरुआत का तुसा जो मिल्ले रा है। ए पुराणा हुकम से ही वचन है जिस जो तुसा तां सूणेया थिया जां तुसा मसीह यीशु बिच विश्वास कित्ता थिया।

⁸पर फिरी भी मैं तुसा जो नौआ हुकम लिखदा, किजोकी ए सच्चाई पैल्ले मसीह बिच पाई गयी ते फिरी तुसा बिच भी पाई गे री है, किजोकी बुराई, न्याहरे सांई मिटदी जाया करदी है, ते सच्चाई, रौसनी सांई अवे चमकणा लग्गी पे री है।

⁹जे कोई ए बोलदा कि मैं सच्चाई बिच जिन्दगी जिया करदा है पर अपणे संगी विश्वासी कने बैर रखदा, से हल्ले तिकर बुराई बिच जिया करदा है।

¹⁰जे कोई अपणे संगी विश्वासी कने प्यार रखदा, से सच्चाई बिच जिन्दगी जिया करदा है, ते तिस बिच इदेय कोई गल्ल नी हुंदी जे दूए मणूआं तांइ पाप करणे री वजह बणे।

¹¹पर जे कोई अपणे संगी विश्वासी कने बैर रखदा से मणू बुराई बिच जिन्दगी जिया करदा है, ते न्याहरे बिच है, ते नी जाणदा कि कुते जाया करदा है, किजोकी बुराई ने तिसेरी हाख्खियां बांद्द करी रख्खी री हिन।

¹²ओ बच्चेयों, मैं तुसा जो इधेरे तांइ लिखदा की मसीह यीशु रे नां कने तुसा रे पाप माफ होए रे हिन।

¹³ओ बुजुर्ग लोक्कों, मैं तुसा जो इधेरे तांइ लिखदा कि जे सुरुआत का है तिसजो तुसा जाणदे, ओ जवानों मैं तुसा ओ इधेरे तांइ लिखदा कि तुसा ने तिस शैतान पर जीत हासिल कित्ते री है। ओ बच्चेयों, मैं तुसा जो इधेरे तांइ लिख्खेया कि तुसा पिता परमेश्वर जो जाणी गेरे हिन।

¹⁴ओ बुजुर्ग लोक्कों, मैं तुसा जो इधेरे तांइ लिख्खेया कि जे सुरुआत का है तुसा तिसजो जाणी गेरे हिन, ओ जवानों, मैं तुसा जो इधेरे तांइ लिख्खेया करदा है कि तुसा ताकतवर हिन ते परमेश्वर रा वचन तुसा बिच बणी रैहन्दा, ते तुसा ने शैतान पर जीत हासिल कित्ते री है।

¹⁵तुसा ना तां दुनिया कने, ते ना तां दुनिया री चीजां कने प्यार रखो, जे कोई दुनिया कने प्यार रखदा तां से पिता परमेश्वर कने प्यार नी करदे।

¹⁶किजोकी जे किच्‍छ दुनिया बिच है, मतलब सरीर री इच्छा, ते हाख्खियां री इच्छा ते अपणी कमाई रा घमंड, से पिता परमेश्वर रे पास्से का नी पर दुनिया रे ही पास्से का है।

¹⁷दुनिया ते तिसेरी चीजां री लालसा दोन्नों मिटणे वाली हिन, पर जे परमेश्वर री इच्छा रे हिसाब कने जिन्दगी जिन्दे, तिन्हा ने हमेसा तिकर बणी रैह्णा।

¹⁸ओ बच्चेयों, मसीह रे हटी आणे रा बेल्ला नेड़े है ते जिय्यां तुसा सुणे रा है कि मसीह यीशु रा विरोधी आणे वाला है, तिसेरे हिसाब कने अब्बे भी मते सारे मसीह यीशु रा विरोध करणे वाले खड़ी गेरे हिन, इस कने असा जो पता चलदा कि ए आखरी समय है।

¹⁹मसीह रा विरोध करणे वाले मणू असा री कलीसिया बिच का निकली करी चली गे, पर से असा रे अपणे नी थिये। किजोकी जे अगर से असा रे अपणे हुंदे तां तिन्हा ने असा कने रैहन्दे, पर से मणू निकली गे जिस कने ए साबित होई गेया कि से सारे कदी असा रे अपणे नी थिये।

²⁰पर मसीह यीशु ने तुसा जो पवित्रात्मा दित्ते रा है इधेरे तांइ तुसा सारी सच्चाई जाणदे।

²¹मैं तुसा जो इधेरे तांइ नी लिख्खेया किजोकी तुसा सच्चाई जो नी जाणदे, पर इधेरे तांइ लिख्खेया किजोकी तुसा तिस सच्चाई जो जाणदे; किजोकी कोई झूठ, सच रे पास्से का नी।

²²झूठ्ठा कुण है? सिर्फ से ही जे यीशु रे मसीह होणे का इन्कार करदा, ते जे कोई पिता परमेश्वर ते पुत्तर रा इन्कार करदा से मसीह विरोधी है।

²³जे कोई पुत्तर रा इन्कार करदा तिसका पिता परमेश्वर भी नी: जे पुत्तर जो मन्नी लिदां तिसका पिता परमेश्वर भी है।

²⁴जे सच्चाई रा बसेख तुसा ने मसीह बिच विश्वास करणे री सुरुआत रे समय बिच सुणे रा थिया, जे अगर से तुसा बिच बणे रा रे तां तुसा भी पुत्तर बिच ते पिता परमेश्वर बिच बणे रैहन्गे।

²⁵जिसेरा वादा पिता परमेश्वर ने असा कने कित्ते रा थिया से हमेसा री जिन्दगी है।

²⁶मैं तुसा जो ए गल्लां तिन्हा गलत शिक्षा देई करी भटकाणे वाले लोक्कां का चुकन्ने रैह्णे तांइ लिख्खे री हिन।

²⁷पर तुसा तांइ से पवित्रात्मा जे तुसा ने मसीह यीशु का पाए रा है, तुसा बिच बणी रैहन्दा, ते इसेरी कोई जरुरत नी कि कोई तुसा जो सच्चाई री गल्लां सिखाए, बल्कि जिय्यां पवित्रात्मा ने जे मसीह ने तुसा जो मिल्ले रा है, तुसा जो सच्चाई री सारी गल्लां सिखणे तांइ मदद करणी, जे पवित्रात्मा तुसा जो सिखांदा, से पूरी तरिक्के कने सच है, ते तिस बिच कोई झूठ नी, इधेरे तांइ मसीह बिच बणी रेयो, जिय्यां पवित्रात्मा ने तुसा जो करणे तांइ दस्से रा है।

²⁸अते ओ बच्चेयों, मसीह बिच बणे रेयो कि जां मसीह हटी आये तां असा जो हिम्मत रे, ताकि तिन्हेरे आणे पर असी तिन्हेरे सामणे शर्मसार ना होण।

²⁹तुसा जाणदे कि मसीह यीशु धार्मिक हिन ते जे कोई धार्मिकता रा कम्म करदा से परमेश्वर रे बच्चे हिन।