Read Chambeali 1 यूहन्ना 4 Bible Online

1 यूहन्ना 4 - Chambeali bible

1 यूहन्ना 4

¹ओ प्यारेयो, हर तिस मणू पर भरोस्सा मत करो जे ए दावा करदे कि असी पवित्रात्मा रे कहे मुताबिक गल्लां करदे। पर आत्‍मा जो परखो कि से परमेश्वर रे पास्से का हिन का नी किजोकी मते सारे झूठ्ठी भविष्यद्वक्ता दुनिया बिच हिन।

²पवित्रात्मा जो तुसा इस तरिक्के कने पैछाणी सकदे, कि जे कोई आत्‍मा मन्नी लिन्दी, कि मसीह यीशु मणू रे रुप अंदर दुनिया बिच आए, तां से परमेश्वर रे पास्से का है।

³ते जे कोई आत्‍मा यीशु जो नी मन्दी, से परमेश्वर रे पास्से का नी है ते से ही तां मसीह यीशु रे विरोधी री आत्‍मा है जिसेरी चर्चा तुसा सुणी बैठ्ठे रे हिन कि, से इणे वाला है ते से अब्बे भी दुनिया अन्दर है

⁴ओ प्यारे बच्चेयों, तुसा परमेश्वर रे मणू हिन, तुसा तिन्हा झूठ्ठे भविष्यद्वक्तां पर जीत हासिल कित्ते री है, किजोकी पवित्रात्मा जे तुसा बिच बसदी से शैतान का जादा ताकतवर है जे इस दुनिया रे लोक्कां पर राज करदा।

⁵झूठ्ठे भविष्यद्वक्ता इस दुनिया रे लोक्कां बिच का हिन, इधेरे तांइ से दुनिया रे नजरिये कने गल्ल करदे ते दुनिया रे मणू तिन्हेरी सूणदे भी।

⁶असी परमेश्वर रे मणू हिन ते जे परमेश्वर जो जाणदा, से असा री सूणदा, जे परमेश्वर जो नी जाणदा, से असा री नी सूणदा। इय्यां ही असी सच री आत्‍मा ते भटकाणे वाली आत्‍मा बिच फरक पैछाणदे।

⁷ओ प्यारेयों, असी अप्पु-मिते प्यार रखण किजोकी प्यार परमेश्वर रे पास्से का है, ते जे दूज्जेयां कने प्यार रखदा, से परमेश्वर रा बच्चा है, ते परमेश्वर जो जाणदा।

⁸जे दूज्जेयां कने प्यार नी रखदा, से परमेश्वर जो नी जाणदा, किजोकी परमेश्वर प्यार है।

⁹जे प्यार परमेश्वर असा कने करदा, से इस कने जाहिर होया कि परमेश्वर ने अपणे इक्को ही इक्क निक्के जो दुनिया अन्दर भेज्जे रा है कि असी तिसेरे जरिए हमेसा री जिन्दगी हासिल करण।

¹⁰सच्चा प्यार ए है कि असा ने परमेश्वर जो पैल्ले प्यार नी कित्ता पर तिन्हा ने पैल्ले असा जो प्यार कित्ता। परमेश्वर ने अपणे इकलौते मुंडे जो असा रे पाप्पां तांइ कुर्बान करी के दित्तेया ताकि असा जो असा रे पाप्पां का माफी मिल्ले।

¹¹ओ प्यारेयो, जां परमेश्वर ने असा कने इदेया प्यार कित्तेया, तां असा जो भी अप्पु-मिते प्यार करणा चाएदा।

¹²परमेश्वर जो कदी कुनिए भी नी दिख्खेया अगर असी अप्पु-मिते प्यार रखण, तां परमेश्वर असा री जिन्दगी अन्दर बणी रैह्न्दा, ते तिसेरा प्यार असा अन्दर सिद्ध होई गे रा है।

¹³इस कने ही असी जाणदे कि असी परमेश्वर अन्दर बणी रैह्‍न्दे, ते से असा अन्दर, किजोकी तिनिए अपणी पवित्रात्मा असा जो दित्ते रा है।

¹⁴ते असा ने पुत्तर जो अपणी हाख्खियां कने दिख्खी भी लित्ता ते गवाई दिन्दे कि पिता परमेश्वर ने पुत्तर जो दुनिया रे लोक्कां रा छुटकारा दैणे वाला बणाई करी के भेज्जे रा है।

¹⁵जे कोई ए मन्नी लिन्दा कि यीशु परमेश्वर रा पुत्तर है तां परमेश्वर तिस मणू अन्दर बणी रैहन्दा ते से मणू परमेश्वर अन्दर।

¹⁶ते असी जाणदे ते विश्वास करदे कि परमेश्वर असा कने बड़ा जादा प्यार करदे। परमेश्वर प्यार है, जे प्यार बिच बणी रैह्न्दा, से परमेश्वर बिच बणी रैहन्दा, ते परमेश्वर तिस अन्दर बणी रैह्न्दा।

¹⁷इस कने ही प्यार असा अन्दर सिद्ध होए रा है कि असा जो न्याय वाले रोज्जे हिम्मत हो कि तिन्हा ने असा जो सजा नी दैणी, असी दुज्जेया जो हकीकत बिच प्यार कित्तेया जिय्यां मसीह ने भी इस दुनिया रे लोक्कां कने कित्तेया ते तिसेरे हिसाब कने जिए भी।

¹⁸प्यार अन्दर डर नी हुन्दा, पर सिद्ध प्यार डर जो दुर करी दिन्दा, किजोकी डरा कने तकलीफ हुंदी, ते जे डरदा, से प्यार अन्दर सिद्ध नी होया।

¹⁹असी परमेश्वर कने ते दूए लोक्कां कने इधेरे तांइ प्यार करदे किजोकी परमेश्वर ने पैल्ले असा कने प्यार कित्ता।

²⁰अगर कोई बोल्ले कि, मैं परमेश्वर कने प्यार रखदा पर अपणे संगी विश्वासी कने प्यार ना रख्खो, तां से झूठा है किजोकी जे अपणे संगी विश्वासी कने जिस जो तिनिए दिख्खे रा है, प्यार नी रखदा तां से परमेश्वर कने भी जिस जो तिनिए नी दिख्खेया, प्यार नी रख्खी सकदा।

²¹ते तिसका असा जो ए हुकम मिलेरा है कि जे कोई अपणे परमेश्वर कने प्यार रखदा, से अपणे संगी विश्वासी कने भी प्यार रख्खो।