Read Chambeali 1 यूहन्ना 5 Bible Online

1 यूहन्ना 5 - Chambeali bible

1 यूहन्ना 5

¹जे मणू ए विश्वास करदा कि यीशु ही मसीह हिन, से मणू परमेश्वर री औलाद ठैहरदा ते जे कोई अपणे पिता परमेश्वर कने प्यार रखदा से तिन्हेरी औलाद्दां कने भी प्यार रखदा।

²जां असी पिता परमेश्वर कने प्यार रखदे, ते तिसेरे हुकमां जो मनदे, तां इसका ही असी जाणदे कि परमेश्वर री औलाद्दां कने प्यार रखदे।

³परमेश्वर कने प्यार करणे रा मतलब ए है कि असी तिन्हेरे हुकमां जो मन्ने ते तिन्हेरे हुकम मुस्किल नी हिन।

⁴किजोकी जे कोई परमेश्वर री औलाद है, तिसने दुनिया पर जीत हासिल कित्ती ते असी से जीत अपणे विश्वास रे जरिए हासिल करदे।

⁵दुनिया पर जीत हासिल करणे वाला सिर्फ से ही मणू है जे विश्वास करदा कि यीशु परमेश्वर रा पुत्तर है।

⁶यीशु मसीह बपतिस्मा लैणे रे जरिए ते सुली पर कुर्बानी दैणे रे जरिए परमेश्वर रे पुत्तर बिच ज़ाहिर होया थिया। सिर्फ बपतिस्मा लैण रे जरिए ही नी पर सुली पर अपणी जान दैणे रे जरिए भी, ते पवित्रात्मा ए गवाई दिंदा कि मसीह यीशु परमेश्वर रे पास्से का रे हिन ते तिन्हेरी गवाई सच्ची है किजोकी पवित्रात्मा सच है।

⁷ते मसीह यीशु री गवाई दैणे वाले त्रै हिन[1],

⁸पवित्रात्मा, पाणी जे मसीह यीशु रे बपतिस्मे जो दर्शांदे, खून जे तिन्हेरी मौत जो दर्शांदा, ते त्रै ही इक्क ही गवाई दिंदे।

⁹जां असी मणूआं री गवाई मन्नी लिन्दे, तां परमेश्वर री गवाई तिसका बद्धी करी है जे तिन्हा ने अपणे पुत्तर रे बारे अन्दर गवाई दित्ते री है।

¹⁰ते जिन्ने मणू परमेश्वर रे पुत्तर बिच विश्वास रखदे से तिन्हेरी गवाई पर भी विश्वास रखदे, पर जिन्हा लोक्कां ने परमेश्वर ते तिन्हेरे पुत्तर री गवाई पर विश्वास नी कित्तेया, से मणू परमेश्वर जो झूठ्ठा बणांदे, किजोकी तिन्हा लोक्कां ने परमेश्वर री गवाई पर विश्वास नी कित्तेया जे परमेश्वर ने अपणे पुत्तर रे बारे बिच दित्ते री है।

¹¹ते से गवाई ए है कि परमेश्वर ने असा जो हमेसा री जिन्दगी दित्ते री है, ते ए जिन्दगी परमेश्वर पुत्तर अन्दर है।

¹²जिन्हा लोक्कां रा परमेश्वर रे पुत्तर कने गहरा रिस्ता है, हमेसा री जिन्दगी है तिन्हा लोक्कां री है, ते जिन्हा लोक्कां रा परमेश्वर रे पुत्तर कने गहरा रिस्ता नी है, तिसका हमेसा री जिन्दगी भी नी है।

¹³मैं तुसा जो, जे परमेश्वर रे पुत्तर रे नां पर भरोस्सा करदे, इधेरे तांइ ए चीठ्ठी लिख्खे री है कि तुसा जाणी सकेयो कि हमेसा री जिन्दगी तुसा री है।

¹⁴ते असा जो परमेश्वर रे सामणे जे हिम्मत हुंदी, से ए है कि, अगर असी किच्‍छ तिसेरी मरजी रे हिसाब कने मंगदे तां से असा री सूणदा।

¹⁵जां असी जाणदे कि, जे किच्‍छ असी परमेश्वर का मंगदे तां से असा री सूणदा, तां ए भी जाणदे कि जे किच्‍छ भी असा तिसका मंगेया, से असा जो मिल्लेया भी।

¹⁶जे अगर तुसा संगी विश्वासी इदेय तरिक्के कने पाप करदे दिख्खो कि जिसेरा नतीज्जा हमेसा री मृत्यु ना हो तां तिन्हेरे तांइ प्रार्थना करो कि परमेश्वर तिन्हा जो हमेसा री जिन्दगी दे। इदेय पाप भी हिन जिन्हेरा नतीज्जा हमेसा री मृत्यु है, मैं तुसा जो तिन्हा तांइ प्रार्थना करणे तांइ नी बोलदा।

¹⁷हर तरिक्के रा अधार्मिक तां पाप है, पर इदेया पाप भी है, जिसेरा नतीज्जा मौत नी है।

¹⁸असा जो पता है कि जे कोई परमेश्वर री औलाद है, से पाप करणा छड्डी दिंदा किजोकी परमेश्वर रा पुत्तर मसीह यीशु तिन्हा लोक्कां जो बचाई रखदा: ते शैतान तिन्हा लोक्कां जो छुई नी सकदा।

¹⁹असा जो पता है कि असी परमेश्वर कने हिन ते सारी दुनिया तिस शैतान रे वस अन्दर पेरी है।

²⁰ते ए भी जाणदे कि परमेश्वर रा पुत्तर मसीह यीशु आई गे रा है ते तिनिये असा जो समझ दित्ते री है कि, असी तिस सच्चे परमेश्वर कने गहरे रिश्ते बिच हिन किजोकी असी मसीह यीशु कने गहरे रिश्ते हिन जे सच है, सच्चा परमेश्वर ते हमेसा री जिन्दगी ए ही है।

²¹ओ बच्चेयों, अप्पु जो हर तिस चीज का दुर रख्खो जे तुसा रे दिल बिच परमेश्वर री जगाह् लेई सकदी।