Read Chambeali 2 यूहन्ना 1 Bible Online

2 यूहन्ना 1 - Chambeali bible

2 यूहन्ना 1

¹मैं यूहन्ना, जे कलीसिया रा बुजुर्ग है, तिस जनानी जो जिस जो परमेश्वर ने चुणे रा है ते तिसेरे बच्चेयां जो ए चीठ्ठी लिख्खेया करदा है। मैं तिन्हा कने प्यार करदा, बल्कि सिर्फ मैं ही नी पर सारे तिन्हा कने प्यार करदे किजोकी असी सारे परमेश्वर री सच्चाई बिच विश्वास करदे।

²असी तुसा जो प्यार करदे किजोकी असी सच्ची शिक्षा बिच विश्वास करदे ते असा ने हमेसा तिकर तिस शिक्षा बिच बणी रैह्णा।

³पिता परमेश्वर ते तिन्हेरे पुत्तर मसीह यीशु रा अनुग्रह, दया ते सांती तिन्हा लोक्कां कने हमेसा-हमेसा तांइ बणी रे जे मणू सच्चाई ते प्यार बिच जिन्दगी बितांदे।

⁴मैं बड़ा खुस होया जां मैं सूणेया कि तुसा रे बच्चे तिस सच्चाई रे हिसाब कने जिन्दगी जिया करदे हिन जिस जो मनणे रा हुकम परमेश्वर ने असा जो दित्ते रा है।

⁵अते अवे ओ जनानिये, मैं तुसा जो जोर पाई करी बोलदा कि असा जो आपस बिच प्यार रखणा चाएदा। ए कोई नौआ हुकम नी है पर ए से ही हुकम है जे असा जो तां मिल्ली थी जां असा ने मसीह यीशु बिच विश्वास करणा सुरु कित्तेया थिया।

⁶परमेश्वर जो सच्चा प्यार करणे रा मतलब ए ही है कि असी अपणी जिन्दगी तिय्यां ही जिए जिय्यां कि परमेश्वर ने असा जो जीणे तांइ बोल्ले रा है। जिस बेल्ले का तुसा ने मसीह यीशु बिच विश्वास कित्ते रा है तुसा तिस्सी बेल्ले का सुणे रा है कि परमेश्वर रा ए हुकम है कि तुसा जो हमेसा इक्क-दूए कने प्यार रखणा चाएदा।

⁷मैं ए इधेरे तांइ बोलदा किजोकी लोक्कां जो झूठ्ठी शिक्षा देई करी भटकाणे वाले मणू दुनिया बिच जगाह्-जगह फैल्ली गेरे हिन। से बोलदे कि मसीह यीशु इक्क मणू रे रुप बिच दुनिया बिच नी आए थिये। जे अगर कोई मणू इदेइ गल्लां करदा तां से मणू मसीह विरोधी है जे लोक्कां जो भटकांदा।

⁸इधेरे तांइ तुसा इदेय मणूआं का चुकन्ने रेयो कि से तुसा जो धोखा ना दैण ताकि परमेश्वर री सेवा करणे तांइ तुसा जे मैहनत कित्ते री है, से बेकार ना जाओ पर इसेरे बजाए परमेश्वर तुसा जो तुसा री सेवा रा ईनाम दे।

⁹मैं तुसा जो बोलदा कि जे अगर कोई मणू मसीह यीशु री शिक्षा पर चलणा छड्डी दिंदा पर तिस शिक्षा बिच अपणी गल्लां भी जोड़ी दिंदा तां तिसेरा परमेश्वर कने कोई रिस्ता नी है। पर जे अगर कोई मणू मसीह री शिक्षा पर बराबर चलदा रैहन्दा तां तिस मणू रा पिता परमेश्वर ते तिन्हेरे पुत्तर मसीह यीशु कने रिस्ता है।

¹⁰जे अगर कोई मणू तुसा जो मसीह री शिक्षा का कोई बखरी ही शिक्षा दे, तां ना ही तिस मणू जो अपणे घरे आणे देयो ते ना ही तिस कने कोई सलाम-दुआ रख्खी करी, तिसजो होर प्रोत्साहन देयो।

¹¹किजोकी जे अगर कोई मणू इदेय मणू कने सलाम-दुआ रखदा तां से मणू भी तिसेरे मणू रे बुरे कम्मां बिच जिम्मेदार ठैहरदा।

¹²होर भी मती सारी गल्लां हिन जे मैं तुसा जो दसणा चाह्‍ंदा पर मैं तुसा जो से गल्लां इय्यां चीठ्ठी बिच लिख्खी करी नी बोलणा चाह्‍ंदा। मैं चाह्‍ंदा कि तित्ते तुसा का आई करी तुसा कने आमणे सामणे गल्ल करां, ताकि असी अप्पु-मिते खुसी मनाई सकण।

¹³तेरी भैण रे बच्चे भी इत्ते ही हिन जिन्हा जो परमेश्वर ने चुणे रा है, से तेरे जो सलाम बोल्लेया करदे हिन।