Read Chambeali यहूदा 1 Bible Online

यहूदा 1 - Chambeali bible

यहूदा 1

¹मैं यहूदा जे मसीह यीशु रा सेवादार ते याकूब रा छोटा भ्याल है, तुसा लोक्कां जो ए चीठ्ठी लिख्खेया करदा है जिन्हा जो परमेश्वर ने तिन्हा बिच विश्वास करणे तांइ सद्दे रा है। परमेश्वर पिता तुसा जो प्यार करदे ते तुसा जो मसीह यीशु बिच सुरक्षित रखदे।

²तुसा जो परमेश्वर रा अनुग्रह, प्यार ते सांती भरपुरी कने मिलदी रे।

³मेरे प्यारे दोस्तों, मैं तुसा जो तिस छुटकारे रे बारे बिच चीठ्ठी लिखणे री बड़ी कोसीस कित्ती जे असा जो परमेश्वर रे पास्से का मसीह यीशु रे जरिये मिल्ले रा है ते जिस बिच असी सारे हिस्सेदार हिन। पर अवे मैं तुसा जो इस चीठ्ठी रे जरिये प्रोत्साहित करणा चाह्‍ंदा ताकि तुसा अपणे मसीही विश्वास बिच होर भी जादा मजबूत होणे री कोसीस करो। परमेश्वर ने अपणे लोक्कां जो ए विश्वास इक्क ही वरी तांइ देई दित्ते रा है, ते ए कदी बदली नी सकदा।

⁴मेरा तुसा जो ए चीठ्ठी लिखणे रा मकसद ए है कि किच्‍छ इदेय मणू तुसा लोक्कां बिच मझाटे मिली गेरे हिन जे मसीह यीशु बिच विश्वास करणे रा ढोंग करदे। से परमेश्वर रा आदरमान नी करदे ते से मणू ए सिखांदे कि परमेश्वर असा रे पाप्पां जो माफ करी दिंदे इधेरे तांइ असी अनैतिक जिन्दगी जी सकदे। से मसीह यीशु जो नक्कारदे जे असा रे मालिक ते प्रभु हिन।

⁵हालांकि तुसा इन्हा सारी गल्लां जो समजी गेरे हिन, पर फिरी भी मैं तुसा जो ए गल्लां चेत्ता कराणा चाह्‍ंदा कि प्रभु इस्राएल देस रे लोक्कां जो मिस्र देस री गुलाम्मी का छुटकारा देई करी लेई आया पर बाद बिच विश्वास ना करणे वाले जो बियाबान बिच मुकाई दित्तेया थिया।

⁶याद करो कि प्रभु ने किय्यां तिन्हा शैतान रे दूतां जो सजा दित्ती थी जे अपणी जिम्मेदारी जो नी निभाया पर इसेरे उलट तिन्हा ने अपणे तिस ओह्दे जो छड्डी दित्तेया जे परमेश्वर ने तिन्हा जो सौप्पेयां थिया। परमेश्वर ने इन्हा स्वर्गदूतां जो इक्क न्याहरी जगाह् बिच तिस दिन तिकर झंझिरां कन्ने बन्नी करी रख्खे रा है जां परमेश्वर ने तिन्हा जो गुनेह्गार ठैहराणा।

⁷ते ए भी याद करो कि सदोम ते अमोरा नां रे सहरां ते तिन्हेरे नेड़े-तेड़े रे सहरां कने कै होया थिया। तित्ते रे मणू अनैतिक कम्मां बिच पेई गे थिये ते हर तरिक्के री अश्लीलता रे कम्मां कने भरी गेरे थिये इधेरे तांइ परमेश्वर ने तिन्हा जो आग्ग कने तबाह करी दित्तेया। ए सारी गल्लां झूठ्ठे शिक्षकां तांइ इक्क चितौणी है कि तिन्हा जो भी हमेसा तिकर बलणे वाली आग्ग बिच तबाह कित्तेया जाणा।

⁸तिय्यां ही मसीह यीशु बिच विश्वास करणे रा ढोंग करणे वाले मणू ए दावा करदे कि परमेश्वर ने दर्शन देई करी ए बोलदे कि असी अनैतिक जिन्दगी जी करी अपणे शरीरां जो भिठ्ठा करी सकदे। से नी चाह्‍ंदे कि कोई तिन्हा पर हक जताए ते से मणू महिमामय स्वर्गदूतां रे बारे बिच गलत गल्लां बोलदे।

⁹पर इत्ते तिकर कि प्रधान स्वर्गदूत मीकाईल ने इन्हा अभक्त लोक्कां सांई कोई कम्म नी कित्तेया। जां शैतान मीकाईल कने बैह्स करेया करदा थिया कि तिन्हा दोन्नां बिच का कुण मूसा रे सरीर जो दब्बी सकदा। तां भी मीकाईल स्वर्गदूत ने इन्हा सबणी लोक्कां का जादा हक होणे रे बावजूद भी तिनिये शैतान जो गलत गल्लां नी बोल्ली, पर तिनिये ए बोल्लेया, “परमेश्वर तिज्जो झिड़के।”

¹⁰पर मसीह बिच विश्वास करणे रा ढोंग करणे वाले ए मणू तिन्हा गल्लां रे बारे बिच पुठ्ठी-सीद्दी गल्लां बोलदे जिस जो से समजदे भी नी, ते जिन्हा चीजां जो से जाणदे ते कुदरती तौर पर जानवरां सांई करदे से चीजां करणे री वजह कने ही बर्बाद भी होई जांदे।

¹¹लाणत है तिन्हा मणूआं पर! से आदम रे मुंडे कैन सांई ही अपणी जिन्दगी दुष्टता बिच गुजारदे जिनिये अपणे ही भ्याल हाबिल रा खून इधेरे तांइ करी दित्तेया थिया किजोकी परमेश्वर ने हाबिल रे कुर्बानी जो अपणाई लित्तेया थिया पर तिसेरी कुर्बानी जो नी अपणाया। से ढोंगी मणू बिलाम सांई हिन जिस जो पैसे कमाणे तांइ ए प्रस्ताव मिल्लेया थिया कि से परमेश्वर रे लोक्कां जो पाप करणे तांइ उकसाए। तिन्हा ढोंगी लोक्कां ने तिस कोरह सांई बर्बाद होई जाणा जे मूसा रे हक रे खिलाफ थिया जे मूसा जो परमेश्वर ने दित्तेया थिया।

¹²ए मणू तुसा री मण्डली बिच प्रभु रे प्यार री यादगारी री धाम बिच शामिल हुंदे। से मणू तुसा तांइ इदेय खतरनाक हिन जिय्यां कि समुंद्र बिच लुके री टोल जहाज तांइ हुंदी जिन्हेरी वजह कने जहाज डूब्बी जांदा। से मणू बेशर्म पुहालां सांई हिन जे सिर्फ अपणी ही परवाह करदे। से इदेय बदलां सांई हिन जे हवा कने इत्ते-उत्ते उड़दे पर तिन्हा का कोई बरखा नी हुंदी। से इदेय बूट्टेयां सांई हिन जिन्हा बिच फल्ल नी लगदा ते से जड़ का ही पुट्टी दित्ते गेरे हिन, ते जिन्हेरी दोहरी मौत होए री हो।

¹³जिय्यां समुंद्र री जोरदार छलारां गंदी झाग बणादी तिय्यां ही ए मणू भी शर्मिंदगी भरे कम्म करदे। से मणू सुरुआत ता करदे पर सीद्दे रस्ते पर नी चलदे, से सही रस्ता नी दिखांदे। परमेश्वर ने तिन्हा लोक्कां तांइ इदेइ न्याहरी जगाह् बणाए री है जित्ते तिन्हा लोक्कां जो रख्खेया जाणा।

¹⁴हनोक जे आदम री सतमी पीढ़ी बिच पैदा होया थिया, तिनिये इन्हा अधार्मिक लोक्कां रे बारे बिच भविष्यवाणी कित्ती थी। तिनिये बोल्लेया थिया, “सुणो, प्रभु ने अपणे अणगिणत स्वर्गदूतां कने सारे मणूआं रा हिसाब-किताब करणे तांइ आणा ते तमाम अधार्मिक लोक्कां जो तिन्हेरे सारे अनैतिक ते बुरे कम्मां तांइ ते परमेश्वर रे खिलाफ बोल्ले री तमाम बेजती री गल्लां तांइ गुनेह्गार ठैहराणा”

¹⁶ए मणू हमेसा परमेश्वर रे खिलाफ ही बोलदे ते लोक्कां री गलती ही कडदे रैह्‍न्दे। से हमेसा अपणी दिल री मर्जी कने दुष्ट कम्म करदे रैह्‍न्दे। से अप्पु पर बड़ा घमंड करदे ते अपणा मतलब कडणे तांइ लोक्कां री चापलूसी करदे।

¹⁷ओ प्यारे दोस्तों, मसीह यीशु री तिन्हा गल्लां जो याद रख्खो जे बड़े पैल्ले तुसा जो तिन्हेरे प्रेरितां रे जरिये पैल्ले दस्सी गे थी।

¹⁸से तुसा जो ए बोलदे हुंदे थिये, “मसीह यीशु रे हटणे का पैल्ले किच्‍छ इदेय मणू उठणे जिन्हा ने परमेश्वर ते तिन्हेरे लोक्कां रा मजाक उडाणा। ए से मणू हिन जिन्हेरी जिन्दगी तिन्हेरे अपणे दिल री बुरी इच्छा रे वस बिच है।”

¹⁹ए इदेय मणू हिन जिन्हेरी वजह कने तुसा बिच फूट पैंदी। से मणू अपणी शरीरी इच्छां रे हिसाब कने ही जिन्दगी बितांदे ते तिन्हा बिच पवित्रात्मा नी है।

²⁰पर प्यारे दोस्तों, तिन्हा पवित्र शिक्षां रे आधार पर इक्क-दूए जो प्रोत्साहित ते इक्क-दूए री मदद करदे रेया करो जिस पर तुसा ने विश्वास कित्तेया ते जिस बिच तुसा पवित्रात्मा रे बोल्ले प्रार्थना भी करदे।

²¹जिय्यां कि तुसा इस गल्ल रा इंतजार करेया करदे हिन कि मसीह यीशु ने अपणे दया कने तुसा जो हमेसा री जिन्दगी दैणी इधेरे तांइ तुसा जो अपणी जिन्दगी ए जाणदे होए गुजारणा चाएदी कि परमेश्वर तुसा कने प्यार करदे।

²²तिन्हा लोक्कां कने बड़ी दया करो जिन्हेरा विश्वास मजबूत नी है।

²³होरणी लोक्कां जो हमेसा री मौत री आग्ग का झपटी करी कड्डी लेयो ते इदेय किच्‍छ मणू भी हिन जिन्हा पर तुसा जो दया करणा चाएदी पर इस कन्ने चुकन्ने भी रेयो। तुसा जो तिन्हेरे कपड़ेयां का नफरत करणा चाएदी किजोकी तिन्हेरी सरीर री बुरी इच्छां कने से गंदे होई गेरे हिन।

²⁴से ही इकलौत्ते परमेश्वर हिन जिन्हा ने असा जो मसीह यीशु रे सुली पर कुर्बानी दैणे रे जरिये कने बचाए रा है। असा रे प्रभु मसीह यीशु री वजह कने मणू परमेश्वर रा आदरमान ते महिमा करण। मणू ए समजी सकण कि दुनिया रे बणने रे पैल्ले का ही ते अज्ज रे समय तिकर परमेश्वर री ही ताकत ते हक है ते से हमेसा-हमेसा तिकर रैह्णी। आमीन!