Read Chambeali प्रकाशित वाक्य 10 Bible Online

प्रकाशित वाक्य 10 - Chambeali bible

प्रकाशित वाक्य 10

¹फिरी मैं इक्क होर तकड़े स्वर्गदूत जो बद्दलां कने घिरे रे ते स्वर्ग का उतरदे दिख्खेया, तिसेरे सर रे चारो पास्से मेघधनुष थिया, अते तिसेरा मुँह सूरज सांई अते तिसेरे पैर आग्ग रे खम्भे सांई थिये।

²ते तिसेरे हत्थां हल्की जदेयी खुले री कताब थी, तिसने अपणा सज्जा पैर समुन्द्र बिच, अते खब्बा पैर किनारे पर रख्खेया।

³ते तिनिये इन्नी जादा जोरे कने हाक्क मारी, जिय्यां शेर गर्जदा। जां तिसने लेर मारी तां गर्जन री सत्त अवाज्जां सुणित्ती।

⁴अते जां सत्तों गर्जनां री अवाज्जां सुणित्ती, तां मैं लिखणे तांइ तैयार थिया, पर मैं स्वर्ग का ए अवाज सूणी, कि तू जे गल्लां गर्जनां री तिन्हा सत्त अवाज्जां बिच सूणी, तिन्हा जो राज़ रख्ख, ते तिन्हा जो मत लिख्ख।

⁵ते जिस स्वर्गदूत जो मैं समुन्द्र अते धरती पर खड़ा दिख्खेया थिया, तिसने अपणा सज्जा हत्थ स्वर्ग पास्से चुक्केया,

⁶तिनिये परमेश्वर जे हमेसा-हमेसा जिन्दे, ते जिन्हा ने आसमान, धरती, समुंद्र ते जे किच्‍छ तिस बिच है, तिन्हा सारी चीजां बणाई, तिन्हा रे नां कने कसम खाई करी बोल्लेया, अवे सब किच्‍छ पूरा होई जाणा।

⁷पर जां सतमे स्वर्गदूत ने अपणी तुरही बजाणी, तां परमेश्वर ने अपणा रहस्यमयी मकसद पूरा करणा, जे तिन्हा ने अपणे भविष्यद्वक्ता कने बोल्लेया थिया।

⁸तां फिरी मैं तिस अवाज जो सूणेया जिस जो मैं पैल्ले भी स्वर्ग का सूणेया थिया, तिस अवाज ने मेरे जो बोल्लेया, “जा, तिस खुले री कताब जो तिस स्वर्गदूत रे हत्थ का लेई लै जे समुंद्र रे किनारे पर खड़ित्ते रा है।”

⁹इसेरा स्वाद शहद सांई ता है, पर बाद बिच इसेरे कौड़केपन री वजह कने पेट्टा पीड़ लगणी। तां मैं तिस स्वर्गदूत रे हत्थां का से छोटी कताब लेई लित्ती ते मैं तिसजो खाई गेया। ते से खाणे बिच ता शहद सांई स्वाद लग्गी, पर जां मैं तिसजो निगली लेया, तां तिसेरे कौड़केपन कने मेरे पेट्टा पीड़ होई।

¹¹तां मेरे जो ए बोल्लेया गेया, कि तिज्जो बड़े मणूआं, अते गैर यहूदियां रे मणूआं, अते भाषा, ते राज्जेयां पर, फिरी भविष्यवाणी करणी पैणी।