Read Chambeali प्रकाशित वाक्य 13 Bible Online

प्रकाशित वाक्य 13 - Chambeali bible

प्रकाशित वाक्य 13

¹तां मैं इक्क बड़े ड्रोणे जानवर जो समुंद्र बिच का निकलदे दिख्खेया। तिसेरे दस सींग ते सत्त सिर थिये, तिसेरे हर इक्क सिर पर इक्क मुकुट थिया, ते तिसेरे हर इक्क सिर इक्क इदेया नां लिख्खे रा थिया जे परमेश्वर तांइ बेजती है।

²जे ड्रोणा जानवर मैं दिख्खेया थिया, से चित्ते सांई थिया, अते तिसेरे पैर रीख सांई थिये, अते मुँह शेर सांई, अते उस अजगर ने अपणी ताकत, ते अपणा सिंहासन, अते अपणा हक, तिस ड्रोणे जो देई दित्तेया।

³ते मैं तिसेरे सिरां बिच का इक्क पर इदेया वरी जख्म दिख्खेया, मन्नो से मरणे वाला हो, फिरी तिसेरा जानलेवा जख्म ठीक होई गेया, ते धरती रे मणू तिस ड्रोणे जानवर रे पीच्छे-पीच्छे हैरान होई करी चली पे।

⁴ते तिन्हा ने अजगर री पूजा कित्ती, किजोकी तिसने जानवर जो अपणा हक देई दित्तेया थिया, अते ए बोल्ली करी ड्रोणे जानवर री अराधना कित्ती, कि इस जानवर रे बराबर कुण है? कुण तिस जानवर कने लड़ी सकदा? परमेश्वर ने तिसजो अपणी बताली महिन्ने तांइ बोलणे ते तिन्हेरी बेजती करणे री अनुमती दित्ती।

⁶तिस ड्रोणे जानवर ने परमेश्वर री बेजती करणा सुरु करी दित्ती, कि तिसने तिन्हेरे नां अते तिन्हेरे तम्बू मतलब स्वर्ग बिच रैह्णे वालेयां रे खिलाफ बोल्ले।

⁷तिस ड्रोणे जानवर जो ए हक दित्तेया गेया, कि पवित्र मणूआं कने लड़े, ते तिन्हा जो हराई दे, अते तिसजो हर इक्क जाति, कुल, देस, ते भाषा पर हक दित्तेया गेया।

⁸धरती रे सारे मणूआं ने तिसेरी अराधना कित्ते री है। जिन्हा लोक्कां रे नां तिस जिन्दगी री कताब बिच दुनिया जो बणाणे रे पैल्ले लिख्खे गेरे हिन, सिर्फ तिन्हा ने ही तिस ड्रोणे जानवर री अराधना नी कित्ती। से जिन्दगी री किताब, तिस “उरणू” री कताब है जिस जो कुर्बान कित्तेया गेया थिया।

⁹जे सुनणा चाए, से ध्यान कने सुणे।

¹⁰जिन्हेरे भाग्य बिच कैद बिच पैणा है, तिन्हा ने कैद होणा ही होणा, जिन्हेरा तलवार कने मरणा तय है, तिन्हा ने तलवार कने मरणा ही मरणा। इधेरे तांइ पवित्र मणूआं रा सारी मुसीबतां जो सहन करणा ते सबर कने विश्वास बिच बणी रैह्णा जरुरी है।

¹¹फिरी मैं इक्क ड्रोणे जानवर जो धरती का निकलदे दिख्खेया, तिस “उरणू” सांई दो सींग थिये, ते से अजगर सांई बोलदा थिया।

¹²अते ए उस पैल्ले ड्रोणे जानवर रा सारा हक इस्तेमाल करदा। धरती ते तिस बिच रैह्णे वालेयां का उस पैल्ले जानवर रा जानलेवा जख्म ठीक होई गेया थिया, तिसेरी अराधना करांदा थिया।

¹³से दुआ ड्रोणा जानवर बड्डी-बड्डी चिन्ह-चमत्कार दिखांदा थिया, इत्ते तक कि मणूआं रे सामणे स्वर्ग का धरती बिच आग्ग बरसाई दिंदा थिया।

¹⁴तिन्हा चिन्ह-चमत्कारां री वजह कने जिन्हा जो उस ड्रोणे जानवर रे सामणे दिखाणे रा हक तिसजो दित्तेया गेया थिया, से धरती बिच रैह्णे वाले लोक्कां जो इस तरिक्के कने भटकान्दा थिया, कि धरती रैह्णे वालेयां जो बोलदा थिया, कि जिस जानवर री तलवार लग्गी री थी, से जी गेया, तिसेरी मूर्ति बणाओ।

¹⁵तिसजो उस जानवर री मूर्ति बिच जान पाणे रा हक दित्तेया गेया, कि जानवर मूर्ति बोलणे लग्गी पे, अते जितणे मणू उस जानवर री मूर्ति री पूजा नी करगे, तिन्हा जो मारी दैण।

¹⁶तिसने छोटे, बड्डे, अमीर, कंगाल, अजाद, भक्त सबणी रे सज्जे हत्थ या तिन्हेरे मत्थे पर इक्क-इक्क छाप कराई दित्ती।

¹⁷कि तिसजो छड्डी जिस पर छाप मतलब उस जानवर रा नां, या तिसेरे नां रा अंक हो, अते कोई लैण दैण ना करी सके।

¹⁸ज्ञान इस्सी बिच है, जिस जो समझ हो, से इस जानवर रा अंक जोड़ी लेंन, किजोकी मणू रा अंक है, ते तिसेरा अंक छे सौ छियाह्ठ है।