Read Chambeali प्रकाशित वाक्य 15 Bible Online

प्रकाशित वाक्य 15 - Chambeali bible

प्रकाशित वाक्य 15

¹ए सब किच्‍छ मुकी जाणे रे बाद, मैं आसमान बिच इक्क होर निशानी दिख्खी जे बड़ी अनौखी ते ड्रौणी भी थी। तित्ते सत्त स्वर्गदूत थिये जे अप्पु कने सत्त अलग किस्मे री मुसीबतां लेई करी आए रे थिये। से मुसीबतां आखरी मुसीबतां होणी, तिन्हेरे बाद परमेश्वर रा गुस्सा सांत होई जाणा।

²तां मैं किच्‍छ दिख्खेया, जे समुंद्र जदेया सीसा सांई चमकेया करदा थिया ते से आग्ग कने मिल्ले रा थिया। मैं तिन्हा लोक्कां जो भी दिख्खेया जे शैतान का हारे नी थिये। तिन्हा ने शैतान ते तिसेरी मूर्ति री अराधना नी कित्ती थी, ते तिन्हा ने शैतान रे नां री छाप भी नी लित्ती थी। से मणू तिस समुंद्र रे किनारे पर से वीणा अपणे हत्थां बिच लेई करी खड़ित्ते रे थिये जे परमेश्वर ने तिन्हा जो दित्ते थिये।

³से परमेश्वर रे दास मूसा रा गीत ते “उरणू” रा गीत गाई-गाई करी बोलदे थिये, ओ सर्वशक्तिमान प्रभु-परमेश्वर, तुसा रे कम्म महान ते अनौखे हिन ओ जुग-जुग रे राज्जे, तेरी चाल ठीक ते सच्ची है।

⁴ओ प्रभु, कुण तेरे का नी डरगा ते तेरे नां री महिमा नी करगा? किजोकी सिर्फ तू ही पवित्र है सारी जातियां आई तेरे सामणे प्रणाम करगी, किजोकी तेरे इंसाफ रे कम्म सामणे आई गेरे हिन।

⁵इसका बाद मैं ए दिख्खेया कि स्वर्ग बिच मन्दिर खुले रा थिया जे तम्बू सांई थिया।

⁶ते से सत्तों स्वर्गदूत जिन्हेरे का सत्तों मुसीबतां थी, मलमल रे साफ ते चमकदार कपड़े पाए ते छाती पर सोन्ने री पट्टियां बन्नी करी परमेश्वर रे मन्दिर का निकले।

⁷ते से सत्त स्वर्गदूत जिन्हा का से आखरी सत्त मुसीबतां थी, से तिस मन्दिर का बाहर आए। तिन्हा ने चमकिल्ले चिट्टे कपड़े पाए रे थिये ते तिन्हा ने अपणी छात्ती पर सोन्ने री पट्टी बन्ने री थी। तां तिन्हा चार प्राणियां ने तिन्हा स्वर्गदूतां जो हमेसा-हमेसा तिकर रैह्णे वाले परमेश्वर रे पास्से का इक्क सोन्ने रा डोंगा दित्तेया जे खतरनाक सजा कने भरे रा थिया।

⁸से परमेश्वर रा मन्दिर तिन्हेरी महिमा ते ताकत रे धुएं कने भरे रा थिया। जां तांइ तिन्हा स्वर्गदूतां जो सौंप्पे री मुसीबतां ना मुकी जाण, तां तांइ कोई भी मणू तिस मन्दिर रे अंदर नी जाई सकदा।