Read Chambeali प्रकाशित वाक्य 17 Bible Online

प्रकाशित वाक्य 17 - Chambeali bible

प्रकाशित वाक्य 17

¹जिन्हा सत्त स्वर्गदूतां का से सत्त कटोरे थिये, तिन्हा बिच का इक्क ने आई करी मेरे जो बोल्लेया, इत्ते आ, मैं तेरे जो दिखांदा कि परमेश्वर ने तिस बड्डी वेश्या जो सजा किय्यां दैणी जे तिस जगाह् बिच बैठ्ठी री है जित्ते मती सारी नदियां हिन।

²जिसेरे कन्ने धरती रे सारे राज्जेयां ने व्यभिचारी कित्तेया ते तिनिये धरती रे लोक्कां जो अपणी अनैतिकता री सराब कने मतवाल्ला करी दित्ते रा है।

³तां पवित्रात्मा री मदद कने स्वर्गदूत मेरे जो बियाबान बिच लेई गेया, ते मैं इक्क जनानी जो लाल रांग रे ड्रोणे जानवर री सवारी करदे दिख्खेया। तिसेरे सत्त सिर ते दस सींग थिये। तिसेरे पूरे सरीर पर इदेय नां लिखित्ते रे थिये जिस कने परमेश्वर री बेजती हुंदी हो।

⁴तिस जनानी ने बैंगणी ते लाल रांग रे कपड़े पाए रे थिये। तिनिये अपणे सरीर जो सोन्ने रे गहणे, कीमती मोत्तियां, ते रतनां कने सजाए रा थिया। तिसेरे सज्जे हत्थ बिच सोन्ने रा गलास थिया जिस बिच सराब थी, जे तिसेरे गलत कम्मां ते तिसेरे घटिया अश्लीलता रे कम्मां जो दर्शांदी थी।

⁵तिसेरे मत्थे पर इक्क इदेया नां लिखित्ते रा थिया जिसेरा इक्क गुप्त मतलब लिखित्ते रा थिया, “बेबिलोन, महान सहर, सारे व्यभिचारियां री मां, ते पूरी दुनिया रे घटिया अश्लील कम्मां रा जरिया।

⁶ते मैं दिख्खेया कि से जनानी परमेश्वर रे लोक्कां रे खून कने इदेइ मतवाल्ली होए री थी कि जिय्यां मणू सराब पीणे कने हुंदे, तिन्हा लोक्कां रे खून कने जे इधेरे तांइ मारे गे किजोकी से परमेश्वर तांइ भरोस्सेमंद थिये। मेरे जो बड़ा वरी दुख होया।”

⁷तां तिस स्वर्गदूत ने मेरे जो बोल्लेया तू तिसजो दिख्खी करी हैरान मत हो। मैं इस जनानी ते तिस ड्रोणे जानवर रा जिस पराल्ले से सवार है जिसेरे सत्त सिर ते दस सिगं हिन तेरे जो तिस राज़ रा मतलब दसदा।

⁸जे ड्रोणा जानवर तैं अब्बे दिख्खेया, से पैल्ले कदी जिन्दा हुंदा थिया, पर अवे से मरी गे रा है, इनिये पताल का बाहर आणा ते परमेश्वर ने तिसजो हमेसा तांइ मुकाई दैणा। जे मणू धरती पर रेया करदे हिन, जिन्हेरे नां परमेश्वर ने अपणी जिन्दगी री कताब बिच नी लिख्खे रे हिन, तिन्हा लोक्कां ने तिस जानवर जो दिख्खी करी बड़ा हैरान होणा। से कदी जिन्दा हुंदा, पर अवे से मरी गे रा है, पर तिनिये फिरी वापिस आणा।

⁹तेरे जो इन्हा निशानियां जो समझाणे तांइ बड़ी समजदारी कने सोचणा जरुरी है। तिस जानवर रे सत्त सिर तिन्हा सत्त पहाड़ां जो दर्शांदे जित्ते से जनानी राज करदी। से सत्त राज्जेयां जो भी दर्शांदे।

¹⁰तिन्हा सत्त राज्जेयां बिच का पांज्ज राज्जे मरी चुके रे हिन, ते तिन्हा बिच का इक्क जणा हल्ले राज्जा है, ते इक्क हल्ले तिकर आया नी, ते जां तिनिये आणा तां तिनिये थोड़े समय तिकर रैह्णा।

¹¹जे ड्रोणा जानवर पैल्ले जिन्दा थिया, ते अवे मरी चुके रा है, से अप्पु अठमा राज्जा है, ते तिन्हा सत्त बिच का ही है। ते आखिर बिच से राज्जे जो भी हमेसा तांइ सजा मिलणी।

¹²जे दस सिगं तैं दिख्खे से दस राज्जे हिन जिन्हा ने हल्ले तिकर राज करणा सुरु नी कित्तेया, पर तिस ड्रोणे जानवर कने थोड़ी देर तांइ राज्जेयां सांई हक्क पाणा।

¹³इन्हा सारे दस राज्जेयां रा इक्क ही मकसद है, तिन्हा सारे जणेया ने अपणी ताकत ते हक तिस ड्रोणे जानवर जो देई दैणा।

¹⁴तिस ड्रोणे जानवर ते दस राज्जेयां ने तिस “उरणू” पर हमला करणा, पर तिस “उरणू” ते तिसेरे प्रेरितां ने तिन्हा सारेयां जो हराई दैणा। ए इधेरे तांइ होणा किजोकी से प्रभुआं रे प्रभु ते राज्जेयां रे राज्जे हिन। तिन्हेरे चेल्‍ले से हिन जिन्हा जो परमेश्वर ने चुणे रा ते सद्दे रा है, ते से भी जे तिन्हा कने भरोस्सेमंद हिन।

¹⁵स्वर्गदूत ने मेरे कने भी बोल्लेया, “जे पाणी तैं दिख्खेया, जिस पर से वेश्या बैंदी, से देस, लोक, जातियां, ते भाषां हिन।”

¹⁶से समय आणा जां तिस ड्रोणे जानवर ते तिन्हा दस राज्जेयां ने, जे अब्बे तिस कने हिन, पर बाद बिच तिस कने नफरत करणी जे तिन्हेरे उप्पर बैठ्ठे री है। तिन्हा ने तिस पर हमला करणा, तिसेरे मांस जो खाई रखणा ते बाक्की रा फुक्की रखणा।

¹⁷“जिस जनानी जो तुसा ने दिख्खेया, ए बड़ा बड्डा सहर है जे दुनिया रे सारे राज्जेयां पर राज करदा। ए चीजां तिस जनानी कने होई चुके री हिन, किजोकी परमेश्वर ने ही तिन्हा लोक्कां रे दिमाग जो अपणे मकसद जो पूरा करणे तांइ चलाया थिया। इधेरे तांइ कि जां तांइ परमेश्वर री बोल्ले री गल्लां पूरी ना होई जाण तां तिकर तिन्हा सारे जणेया ने अपणा हक तिस ड्रोणे जानवर जो देई दित्तेया थिया।”