Read Chambeali प्रकाशित वाक्य 21 Bible Online

प्रकाशित वाक्य 21 - Chambeali bible

प्रकाशित वाक्य 21

¹फिरी मैं नौये आसमान ते नौई धरती जो दिख्खेया, किजोकी पुराणे आसमान ते पुराणी धरती मिटी गे, ते समुंदर भी नी रेया।

²मैं तिस पवित्र सहर जे यरुशलेम है, तिसजो परमेश्वर रे पास्से का स्वर्ग का उतरदे दिख्खेया। से इक्क दुल्हन सांई तैयार कित्ती गयी थी, ते सजाई भी गयी थी कि से दुल्हे कने ब्याह करे।

³फिरी मैं परमेश्वर रे सिहांसन का कुसकी जो ऊच्ची अवाज बिच ए बोलदे होये सूणेया, दिख, अब्बे का लेई करी परमेश्वर ने लोक्कां बिच वास करणा, ते अब्बे का लेई करी परमेश्वर रा घर मणूआं रे बिच होणा। ते से परमेश्वर रे मणू होणे, ते परमेश्वर ने अप्पु ही तिन्हा जो अपणे मणू मनणा, ते तिन्हा कने रैह्णा, ते लोक्कां ने भी तिन्हा जो अपणा परमेश्वर मनणा।

⁴परमेश्वर ने तिन्हेरी हाख्खियां का सारे आँसु पूंजी दैणे। तिसका बाद कुसकी ने कदी भी कोई दुख महसूस नी करणा, ना कुसकी ने मरणा, किजोकी अवे पुराणी दुनिया नी रैह्णी।

⁵तां से जे सिंहासन पर बैंदे, तिन्हा ने बोल्लेया, “ते अवे मैं हर इक्क चीज जो नौआ बनाणा!” तिन्हा ने मेरे जो ए भी बोल्लेया, “जे गल्लां मैं बोल्ले री है तिन्हा जो लिख्खी लै, तू इन्हा पर विश्वास करी सकदा किजोकी ए चीजां जरुर पूरी होणी।”

⁶फिरी तिन्हा ने मेरे जो बोल्लेया, ए गल्लां पूरी होई गे री हिन, मैं अल्फा ते ओमेगा, आदी ते अंत है। जिस कुसकी ने भी प्यासे होणा, मैं तिसजो तिस झरने बिच का से पाणी पुआणा जे हमेसा री जिन्दगी दिंदा।

⁷जिन्हा लोक्कां ने दुष्ट पर जीत हासिल करणी, तिनिए ही मेरे का इन्हा सारी आशीषां जो हासिल करणा। मैं तिसेरा परमेश्वर होणा ते तिनिये मेरा पुत्तर होणा।

⁸पर जे मणू अप्पु पर जुल्म होणे रे डर कने मेरे पर विश्वास करणे का मुकरी जांदे, तिन्हा जो भी तिस गन्धक बिच सूटी दित्तेया जाणा। तिय्यां ही बुराई रे कम्म करणे वाले लोक्कां जो तिस गन्धक वाली आग्ग बिच सूटी दित्तेया जाणा जिन्हा ने व्यभिचार, अपणे संगी साथियां पर जादू टोणा, ते मूर्ति पूजा कित्ती हो। इसजो दुई मौत बोल्लेया जांदा।

⁹फिरी जिन्हा सत्त स्वर्गदूतां का सत्त आखरी मुसीबतां कने भरे रे सत्त कटोरे थिये, तिन्हा बिच का इक्क मेरे का आया ते मेरे कने गल्लां करी के बोल्लेया, इत्ते आ, मैं तेरे जो दुल्हन मतलब उरणू री लाड़ी दिखादां।

¹⁰तां स्वर्गदूत मेरे जो पवित्रात्मा री ताकत कने इक्क बड्डे ते उच्चे पहाड़ पर लेई गेया, ते पवित्र नगर यरुशलेम सहर जो स्वर्ग का परमेश्वर रे नेड़े का उतरदे दिखाया।

¹¹से सहर परमेश्वर का आणे वाली बड़ी वरी रौसनी कने चमकेया करदा थिया। से कुसकी यशब रे कीमती मोत्ती सांई चमकेया करदा थिया।

¹²सहर रे चारो पास्से री सहरपनाह बड़ी ऊच्ची थी, ते तिसेरे बारा दुआरां पर बारा स्वर्गदूत थिये ते तिन्हा दुआरां पर इस्राएली देस रे बारा गोत्रां रे नां लिखित्ते रे थिये।

¹³पूरब रे पास्से त्रै दुआर, उत्तर रे पास्से त्रै दुआर, दक्षिण रे पास्से त्रै दुआर, ते पश्चिम रे पास्से त्रै दुआर थिये।

¹⁴तिन्हा ने सहर रे चारो पास्से दुआल बारा बड्डे-बड्डे बट्टेयां पर बणाए री थी। हर बट्टे पर तिस उरणू रे बारा प्रेरितां रे नां लिखित्ते रे थिये।

¹⁵जे स्वर्गदूत मेरे कने गल्लां करदा थिया, तिसेरे का सहर ते तिसेरे दुआरां ते तिसेरी सहरपनाह जो नपणे तांइ इक्क सोन्ने रा गज थिया।

¹⁶तिस सहर रे चार कुणे थिये, ते से सारे कुणे इक्क बराबर थिये। तिस स्वर्गदूत ने अपणे गज कने तिस सहर जो नाप्पेया, तिसेरी लम्बाई दो हजार चार सौ किलोमीटर थिये। तिसेरी चौड़ाई ते ऊंचाई तिसेरी लम्बाई रे ही बराबर थिये।

¹⁷तिसका बाद स्वर्गदूत ने तिस दुआल जो नाप्पेया, तिसने तिस दुआल जो मणूआं रे हिसाब कने नाप्पेया। से दुआल छियाठ मीटर ऊच्ची थी।

¹⁸से दुआल मैह्‍ंगे मोत्तियां री बणे री थी, जिन्हा जो यशब रे मोत्ती भी बोलदे। से सहर सोन्ने रा बणे रा थिया ते से साफ सीसा सांई चमकदा थिया।

¹⁹तिस सहर री नीं हर तरिक्के रे खूबसुरत मोत्ती कने सजाई गे री थी। नीं रा पैल्ला बट्टा यशब रा थिया, दुज्जा बट्टा नीलमणी रा, त्रिया बट्टा लालड़ी रा, चौथा बट्टा मरकत रा,

²⁰पजंमी गोमेदक री, छटी माणक्य री, सतमी पीत मणी री, अठमी पेरोज की, नौमी पुखराज री, दसंमी लहसनी री, ग्यारमी धुमर्कातं री, ते बारमी याकूत री थिया।

²¹बारो दुआर बारा मोतियां रे थिये। इक्क-इक्क दरवाज्जे इक्क-इक्क मोती रा बणे रा थिया नगर री सड़क साफ सीसे सांई साफ सोन्ने री थी।

²²मैं तिस बिच परमेश्वर रा मन्दिर नी दिख्खेया, किजोकी सर्वशक्तिमान प्रभु-परमेश्वर ते उरणू तिसेरा मन्दिर है।

²³तिस सहर जो रौसनी तांइ सूरज या चाँद री जरुरत नी थी, किजोकी परमेश्वर री चमक अप्पु तिस सहर पर चमकदी थी, ते तिस उरणू भी अप्पु तिस सहर री रौसनी री वजह थिया।

²⁴जाति-जाति रे लोक्कां ने तिसेरी रौसनी बिच चलणा-फिरणा, ते धरती रे राज्जेयां ने अपणा अपणा कीमती समान तिस सहर बिच लाणा।

²⁵तिसेरे दुआर धियाड़ी कदी बांद्द नी होणे, ते रात तित्ते नी होणी।

²⁶लोक्कां ने जाति-जाति ने अपणा कीमती समान तिस बिच लाणा।

²⁷पर तिस बिच कोई अपवित्र चीज, या बुरा कम्म करणे वाला, या झूठ रा गढणे वाला कुसकी तरिक्के कने तिस बिच आई नी सकणा, पर सिर्फ से मणू जिन्हेरे नां उरणू री जिन्दगी री कताब बिच लिख्खे रे हिन।