Read Chang Naga KAOBAK 1 Bible Online

KAOBAK 1 - Chang Naga bible

KAOBAK 1

¹Khangla Mühghaüei müh si kaodak yaükei.

²Hobaje kaodak kho ai ayeienko kongkong kiteikei, hoba nakthühbü kho yungnyu thüka kikei hoba Mühghaü soushou deitaka shongeiko kikei.

³Hobaje Mühghaüei laukei, “Ngesakbü kiashi” hoba ngesakbü kikei.

⁴Mühghaüei ngesakbü maia dogo chühenkei, hoba nakthüh ka ngesakbü janyinkei.

⁵Hobaje Mühghaüei ngesakbü to “Chalou” hoba nakthühbü to “Nangnak” dogo ngakei. Hobaje kho chasem si ngeyang kho shaangbounyet kikei.

⁶Hobaje Mühghaüei laukei, “Dei kho chela dangshuoktiashi hoba kho ka dei ka dei janyintiashi.”

⁷Hobaje Mühghaüei dangshuokbü kho küman thükkabou ka phangkabou kho bangnyintikei.

⁸Hobaje Mühghaüei mühkom khoto “Müh” dogo ngakei hoba chasem si ngeyang kikei. Hobaje kho nyibounyet kikei.

⁹Kheijinei Mühghaüei laukei, “Müh phanga kibü dei pendou kaoen chenei takshattiashi, hoba kaolin longtiashi,” hoba kho tegü kikei.

¹⁰Hobaje Mühghaüei kaolin kho to “Kaodak” dogo laukei hoba dei takshatbü kho to “Yungnyu” dogo laukei, hoba Mühghaüei kho maia dogo chühenkei.

¹¹Hobaje Mühghaüei laukei, “Kaoei langshangbü buhekdeihek, busidei hoba sang phang penko longtiashi” hoba kho tegü kikei.

¹²Hobaje kaoei buhekdeihek luluei lulu phang langshangko hekbü buhekdeihek, busidei hoba sang den lulu yemtikukei, hoba Mühghaüei kho maia dogo chühenkei.

¹³Hobaje nangnak si chasem kho sembounyet chalou kikei.

¹⁴Hobaje Mühghaüei laukei, “Müha mühkom khünei nangnak ka chalou bangnyinla shanga ngesakbü shuong kitiashi; hoba habü shangshen shanga, poanghongjih shanga hoba chalou hoba po shanga,

¹⁵hoba kaodak ngesakla shanga mühkoma ngesakbü kiashi,” hoba kho tegü kikei.

¹⁶Mühghaüei ngesak yaangbü penyi kümbei, yaangshangbou kho chanyu, kho chaloua songdakla, hoba hanshangbou ngesakbü kho litnyu, kho nangnak songdakla shanga; haoei tokei khanshoulitshou shuongkei kümbei.

¹⁷Mühghaüei kaodak ngesakla shanga,

¹⁸hoba chalou si nangnak songdakla shanga hoba nakthüh ka ngesakbü janyinla mühkoma khübü kho küman phokei, hoba Mühghaüei maian hapbei.

¹⁹Hobaje chasem si ngeyang ham kho chalou leiboubü kikei.

²⁰Hobaje Mühghaüei laukei, “Dei lang kibü yangsikok den pendouei shentiashi, hoba aushuong mühkoma sengeitiashi.”

²¹Hobaje Mühghaüei yungmang kabü molo dei yangsikok hoba deikabü yangsikok hoba kaakyembü au phang phang pakentikei; hoba Mühghaüei kho maiakei dogo chühenkei.

²²Hobaje Mühghaüei haoen haükuko laukei, “Lang hekko haayaangashi hoba deiei yungnyu shentiashi, hoba kaodaka aushuong haashi.”

²³Hobaje nangnak si ngeyang kho chalou ngaobounyet kikei.

²⁴Hobaje Mühghaüei laukei, “Kaodaka meisiau haoen lulu phang, samkeisamuk phang lulu hoba kaoa shanbü hoba haoen phang phang lulu longtiashi,” hoba kho tegü kikei.

²⁵Hobaje Mühghaüei meisiau phang lulu lulu hoba samkeisamuk shatsinam hoba kaoa shanbü yangsikok haoen lulu phang ajanjan pendou kümbei, hoba Mühghaüei kho maiakei dogo chühenkei.

²⁶Hobaje Mühghaüei laukei, “Senei müt sen tegü, sen phatbüa kümbho; hoba yungnyua ngau thüka hoba mühkabü aushuong thüka hoba samkeisamuk thüka hoba kaodak pendou thüka hoba kaoa paibü pendou thüka haoen bunyu yingshi.”

²⁷Hibü Mühghaüei hao tegü müt yaükei; Mühghaü phatbüa haoei haosi yaükei. Haoei haoen bousu hoba yaksa yaükei.

²⁸Hobaje Mühghaüei haosi haükukei; hoba Mühghaüei haosi to laukei, “Bukko haako hauashi, hoba juong haashi, hoba kaodak shentiashi hoba thepetashi. Hobaje yungnyu kabü ngau thüka hoba mühkabü aushuong thüka hoba kaodaka lang kibü ajanjan pendou thüka bunyu yingshi.”

²⁹Hobaje Mühghaüei laukei, “Chühashi, kaodaka kibü lilabü hekbü langshangbü buhekdeihek pendou hoba bunyu pendou laoboua hek hekbü ki ngei kan la kuda, kan shanga kho shausiyung kilabü.

³⁰Hobaje kaodaka meisiau pendou la hoba mühkabü au pendou la hoba kaoa shanbü pendou la buhekdeihek sangtüngbü shausiyung shanga kuda,” hoba kho tegü kikei.

³¹Hobaje Mühghaüei haoei kümbü pendou hapbei hoba ho aeibou maian kikei. Hobaje chasem si ngeyang kho chalou lakbounyet kikei.