Read Chang Naga KAOBAK 11 Bible Online

KAOBAK 11 - Chang Naga bible

KAOBAK 11

¹Kho jiha kaodak khümboa ngühyem che hoba ngühang che kikei.

²Hobaje haoen chaangbou aeto shoongjung haujinei haoenei Shinar kaoa yo che hapbei, hoba khünei kikei.

³Hobaje haoen si haoen joyoko laukei, “Kaiya, senei tham nyatan ipan wana yingko juokkho.” Hibü haoenei laang jeila tham juokbü kho lekei, hoba khangyola bunai lekei.

⁴Hobaje haoenei laukei, “Kaiya, senei sangnyua laangshong lapheishon che müha jakko yaüakho, khei yingsi seneibü nyen kilabü hoba kaonyudak shenko alinlabü.”

⁵Lausikei BUNYUBOU khunak shousi shuongei yaübü sangnyu hoba laangshong lapheishon chühla louyenkei.

⁶Hobaje BUNYUBOUei laukei, “Chühashi, haoen pendou phang che, hoba haoen pendou ngühyem che ong ki, hoba haoenei kümsilei ho tou khangbü ong hoba tou haoenei ai kümla maangangda, haoenei pendou thüklabü haang.

⁷Kaiya, sen yanakho hoba haoen cheei che aditenlabü lele haoeneibü ngühyem lusaktikho.”

⁸Hibü BUNYUBOUei haoen khüka kaonyudak shenko aatikei, hoba haoenei sangnyu yaübü nangkei.

⁹Hibü hoeibü nyen Babel dogo nyenkei, aieilausi khünei BUNYUBOUei khunakshousi ngühyem lusaktikukei hoba khüka BUNYUBOUei haoen kaonyudak shenko aatikei.

¹⁰Habü ho Shem mütli. Yungsen phainei nyibou poa Shem po 100 jai kijinei Arpakshad hapbei.

¹¹Hobaje Arpakshad bukan phaia Shem po 500 kijinei jayang nouyang shousi shuong kikei.

¹²Hobaje Arpakshad po 35 kijinei Shela hapbei;

¹³hoba Shela bukan Arpakshad po 403 lang kijinei jayang nouyangshousi bukkei.

¹⁴Shela po 30 kijinei Eber bukkei,

¹⁵kho phaia Eber bukan Shela po 403 kijinei jayang nouyangshousi kikei.

¹⁶Hobaje Eber po 34 kijinei Peleg kikei.

¹⁷Hobaje Peleg bukan phaia Eber po 430 kibü jiha jayang nouyangshousi kikei.

¹⁸Hobaje Peleg po 30 kijinei Reu kikei.

¹⁹Hobaje Reu bukan phaia po 209 kijinei toukei jayang nouyangshousi kikei.

²⁰Hobaje Reu po 32 kijinei Serug kikei.

²¹Hobaje Serug bukan Reu po 207 kijinei jayang nouyangshousi kikei.

²²Hobaje Serug po 30 kijinei Nahor kikei.

²³Hobaje Nahor bukan Serug po 200 kian jayang nouyangshousi kikei.

²⁴Hobaje Nahor po 29 kian Tera hapbei.

²⁵Hobaje Tera bukan Nahor po 119 salang kijinei jayang nouyangshousi kikei.

²⁶Hobaje Tera po 70 kijinei Abram, Nahor hoba Haran hapbei.

²⁷Habü ho Tera mütli. Tera ka Abram, Nahor hoba Haran pakkei; hoba Haran ka Lot pakkei.

²⁸Haobou Tera lang kijinei Haran, hao bukbü kao Khaldi kabü Ur sanga haikei.

²⁹Abram si Nahor chemdang yeikei, hoba Abrameibü yak nyen Sarai hoba Nahoreibü yak nyen Milka, sao kho Haraneibü shou hoba Isakeibü boukei hao ong kikei.

³⁰Sarai kho angkongbü; saoei shousi akitei.

³¹Teraei haoshou Abram hoba Haran shou Lot haoeibü shi hoba haoeibü shoumaonyu Sarai, hao yoa leian Kanan kaodak to haula shanga Khaldibü Ur sangnyu ka meimeijung haukei. Lausikei Haran sühko hauan haoen khünei kikei.

³²Tera po 205 kian Harana haikei.