Read Chang Naga KAOBAK 12 Bible Online

KAOBAK 12 - Chang Naga bible

KAOBAK 12

¹BUNYUBOUei Abram to laukei, “Kaibü kaonyek ka hoba kaibü chempen ka hoba kabou chem ka meimeijung ngei ka la lenlabü kaonyek to hauashi.

²Hobaje ngei ka ka phang yaangbü che yeitikulabü, hoba no haükulabü; hoba ngei kaibü nyen yaangentilabü,

³Hobaje aoyouei no haükulaje ngei haoen haükulabü, hoba aoyouei ka to khüklauoklaje ngei haoen la shedsikhau kulabü, hoba no danko kaodak phangshuong pendou haükulabü.”

⁴Hibü BUNYUBOUei hao to laubü tegü, Abram haukei; hoba Lot hao yoa haukei. Hobaje Haran ka meimeijinei Abram bukbü po anjinleito ngao kikei.

⁵Hobaje Abramei haoyak Sarai si shoumo Lot hoba haoenei thansheibü haoenei kibü pendou hoba haoenei Harana müt lajuche leisheikei, khübü pendou leian haukei; hoba haoen Kanan kao to meimeikei hoba haoen khonei sühlangkei.

⁶Hobaje Abram kho kaophei saabü Shekhema More kaoena saopobü bulong sühko loukei. (Kheijinei Kananbü kho kaonyua kiteikei).

⁷Hobaje BUNYUBOU Abram jungto longan laukei, “Kaibü lilabü la ho kaoen kulabü.” Hibü khonei hao la longan lenbou BUNYUBOU shanga haoei laangshong lemshon yaükei.

⁸Hobaje haoei kho ka Bethel chaangbou aenei hoba Ai chaangbou aenei apyoan haoei haoeibü neichem dangkei. Hobaje khünei haoei BUNYUBOU shanga laangshongei lemshon yaüan BUNYUBOU to lembei.

⁹Hobaje Abram Kanan yungthang aeto wakou athakko meimeijung haukei.

¹⁰Hobaje kho kaonyeka mühsinou kikei hoba Abram Ijepa kila yankei, aieilausi kaonyeka kaangbüsekbü mühsinou kikei.

¹¹Hobaje haoei Ijep to atla nyangko loujinei haoei haoyak Sarai to laukei, “Chühashi, no chühla saomaibü yaksa dogo ngei ngekei.

¹²Ladang Ijepbüei no haplaje haoenei laulabü, ‘Ho haoyak.’ Kheijinei haoenei ngo haitilabü, lausikei no langtilabü.

¹³No küna dogo haoen la lenshi; khei yingsije ka laüa kü to thounoulabü hoba kü langkei püetlabü.”

¹⁴Ladang Abram Ijep kaodak to loukei, Ijepbüei yaksa kho sao aeibou maietnyu hapbei.

¹⁵Hobaje Faraoeibü yaangenbü atei sao hapan Farao la sao hemaisaomai shangabü sangan lenkei hoba Farao chem to leibakei.

¹⁶Hobaje sao laüa haoei Abram to maian jungeikei, hoba hao la sanlon, masu, gadu pisipaang, sambü bousu, yaksa hoba ut dogo kukei.

¹⁷Lausikei BUNYUBOUei Abrameibü yak Sarai hangshong Farao hoba haoeibü chemdang shatlim yaangei sühtikei.

¹⁸Kheijinei Faraoei Abram ngaan laukei, “Nyi kü to kümbü kho ai? Sao kayak dogo aila alen?

¹⁹Nyi aila ‘Sao küna’ dogo laukei? Khoei ong ngei sao küyak la lekei. Kayak hanei kia, sao leilangashi!”

²⁰Hobaje Faraoei Abram shangabü hao mütshuong la ngühkhüm kuan hao hoba yak hoba haoei kibü pendou yoan Ijep ka sattikei.