Read Chang Naga KAOBAK 13 Bible Online

KAOBAK 13 - Chang Naga bible

KAOBAK 13

¹Hibü Abram, haoyak hoba haoei kibü pendou hoba Lot yoan Ijep kaodak ka meimeijung yungthang aeto sattikei.

²Abram samkeisamuk hoba chandinam si hona aeibou keian kikei.

³Hobaje khüka hao yungthang kao ka meimeijung hauan Bethel si Ai kanglanga laonei haoeibü neichem kiteikei, hoba haoei

⁴shaangbü laangshong lemshon yaükei kho Bethel sühlangkei. Khonei Abramei BUNYUBOU to lembei.

⁵Hobaje Lot ao Abram yoa haukei haoeikei sanshuong, masu shuong, hoba neichem kikei.

⁶Lausikei haoen liko kila kaoenei asou, aieilausi haoenei kibü juong yingsije haoen liko akien.

⁷Hobaje Abrameibü shatsinam lombü si Loteibü shatsinam lombü oyokei. Kheijinei Kananbü si Perizbü kho kaoena kiteikei.

⁸Hobaje Abramei Lot to laukei, “Seti kanglanga hoba kaibü masu lombou si ngeibü masu lombou kanglanga oyophetyo ai akitila ngei ka to sudajada; aieilausi seti jaisina ki. Kü jungka no lolo bangashi dogo ngei ka to sudajada.

⁹Nyi nanae lealonga ngo maiaeto haulabü; ayingsi nyi maiae lealonga ngo nanaeto haulabü.”

¹⁰Hobaje Lotei jembü nyek pükan Jordan pholi to chühkei, hoba BUNYUBOU bamang phatko kho kaijembo dei souko hapbei. (Kho BUNYUBOUei Sodom si Gomora mo amautijinei.) Ho kaodak Zoar aenei kibü Ijep kao tegü kikei.

¹¹Hibü Lotei hao shanga Jordan pholi pendou pienkei; hoba Lot chaang ae haukei. Khonei haosi bangkei.

¹²Abram Kanan kaoa kikei hoba Lot yosiyang sangnyu shuonga kikei, hoba haoeibü neichem Sodom sühko dangkei.

¹³Lausikei Sodombü shuong kho maangsha maangkok yembü hoba BUNYUBOU khulimbo shabü shonbü mütshuong kiteikei.

¹⁴Hobaje Lot bangan phaia BUNYUBOUei Abram to laukei, “No kishang ka kaibü nyek pükan yungkük hoba yungthang, chaang hoba chanep to chühashi.

¹⁵Aieilausi ai kaodak nyi hapda ho pendou ngei ka la hoba kaibü thensilen la thonsithak akiko kulabü.

¹⁶Hobaje ngei kaibü thensilen molo phetsen tegü yeitikulabü; hibü kho tegü müt cheei kaodak phetsen wela thükalonga kaibü thensilenkei wela thüklabü.

¹⁷Meimeiashi, kaodak süng si khaang danko paiashi, aishanga ngei ka la ho kulabü.

¹⁸Hibü Abramei haoeibü neichem sungbaan Hebrona Mamre saopobü bulong nyangko kikei; hoba haoei khünei BUNYUBOU shanga laangshongei lemshon che yaükei.”