Read Chang Naga KAOBAK 14 Bible Online

KAOBAK 14 - Chang Naga bible

KAOBAK 14

¹Kho jihsiphaia Shinarbü choba Amrafel hoba Elesarbü choba Ariok hoba Elambü choba Kedorlaomer hoba Goimbü choba Tidal haanga,

²haoenei Sodombü choba Bera hoba Gomorabü choba Birsha hoba Admabü choba Shinab hoba Zeboimbü choba Shemeber hoba Belabü choba (kho Zoar) yoa wapyo khangkei.

³Habü pendou Sidim pholi (Jem Yungnyu) a yoshaikei.

⁴Haoenei po anthüknyi sühko Kedorlaomer khangenkei, hoba po anthüksem boubüa haoenei hao khulimbo meimeikei.

⁵Hobaje po anthüklei boubüa Kedorlaomer hoba hao to thipbü choba shuongei Ashtoreth Karnaima Refaimbü, Hama Zuminbü, Shave-Kiriathima Emimbü

⁶hoba Horbü, haoen Edom shongh sangliphang nyangko kibü Elparan sühko shikei.

⁷Kheijinei haoen sepeijung En Mishpat (kho Kadesh) to louan Amalekbü kaodak hoba Hazaron Tamara kibü Amorbü kaodak khümbo shikei.

⁸Hobaje pendou haoen khulimbo Sodom choba, Gomora choba, Adma choba, Zeboim choba hoba Bela choba (kho Zoar) meimeikei hoba haoenei lason jaman Sidim pholi to wapyola haukei.

⁹Elam choba Kedorlaomer hoba Goim choba Tidal, hoba Shinar choba Amrafel hoba Elasar choba Ariok; haoen choba ngao khulimbo choba lei kho wapyokei.

¹⁰Tou Sidim pholia naipüngkhün thukukei hoba Sodom si Gomora choba satkei, hoba atje khüto atetkei, hoba haoen joubü shuong shongh to satetlangkei.

¹¹Hobaje choba leiei Sodom si Gomora nyaksinam pendou hoba haoeneibü shausiyung khümbo soan satkei.

¹²Hobaje haoenei Abrameibü shoumo Lot, ao Sodoma kikei, hao hoba haoeibü nyaksinam soan satkei.

¹³Hobaje satenbü che louan Ibribü Abram to ho shangabü lenkei. Hao Eshkol jaisina hoba Aner jaisina Amorbü Mamre saopobü bulong nyangko kikei; habü ho Abram to jiyomaiyobü shuong kikei.

¹⁴Hobaje ladang Abramei hao chempen langsena dogo ditkei, haoeibü chema bukbü haoei leiyenbü sambü müt 318 leian Dan sühko shijung haukei.

¹⁵Hobaje haoen khulimbo nangnak hao hoba haoeibü sambü shuong haoei janyinkei, hoba haoen kho thükkei; hoba Damaska yungküka kibü Hob sühko shijung haukei.

¹⁶Hobaje haoei peisilei pendou hoba haoeibü chempen Lotkei haoeibü peisilei yoa, yaksa shuong hoba lubü shuongkei langsenbü ka sepeinyu leian longeikei.

¹⁷Ladang Abramei Kedorlaomer si hao to thipbü choba shuong thükan longeikei, Sodom choba, Shave Yo (kho choba Yo) to hao shuokla loukei.

¹⁸Hobaje Salem choba Melkhizedekei wentek si ih sungbakei. Hao Thükkabou Mühghaüeibü Ungshedbou kikei.

¹⁹Hobaje haoei hao haükuko laukei, “Müh si kao kümbou BUNYUBOU Mühghaüeibü haübü Abram to kishi;

²⁰hoba aoei kaibü dangboulabou ka ikto kukei, hao Thükkabou Mühghaü to haübü yingshi!” Hobaje Abramei hao la pendou ka an phejan kukei.

²¹Hobaje Sodom Chobaei Abram to laukei, “Kü la mütshuong kho labü lausikei peisilei nyi leshima.”

²²“Lausikei Abramei Sodom choba to laukei, BUNYUBOU Mühghaü Thükkabou, müh si kao kümbou BUNYUBOU thedanga ngeibü ik tuokan lauda,

²³khei ngei leipem che ong yingsikei, ngoklüh che ong yingsikei nyi kibü aikei alelabü; aingenyu nyi, ‘Ngei Abram keitikei’ dogo laulabü.

²⁴Kü yoa haubü mütshuongeibü phejan hoba heshou shuongei ai shaukei kho to liman ngei ai alelabü: Aner, Eshkol hoba Mamre, haoenje haoen phejan letiashi.”