Read Chang Naga KAOBAK 15 Bible Online

KAOBAK 15 - Chang Naga bible

KAOBAK 15

¹Kho phaia BUNYUBOUei mangsanga Abram jungto louan laukei, “Tehüt, Abram, ngo kaibü aih hoba kaibü pailetbü yinglabü.”

²Lausikei Abramei laukei, “O BUNYUBOU Mühghaü, ngei shousi aki, hoba ngeibü chem phet phanlabü Damaskabü Eliezer kia; khei yingsije nyi kü la ai kula?”

³Hobaje Abramei laukei, “Chühashi, nyi kü la lilabü aikei aku; hoba chühashi, kü sambü che ngeibü phet phanlabü kia.”

⁴Hobaje chühashi, nyibou BUNYUBOUei hai lauko loukei, “Ho müt ho kaibü phetphanbou ayinglabü.”

⁵Hobaje haoei khong to leijung angan laukei, “Tou müh to chühashi, hoba kho weenalonga khanshoulitshou shuong wean chühashi.” Hobaje haoei hao to laukei, “Kho tegü kaibü lilabü kilabü.”

⁶Hobaje Abramei BUNYUBOU to mailembei; hoba kho danko Mühghaüei hao kho saopobü dogo weeikei.

⁷Hobaje haoei hao to laukei, “Ngo BUNYUBOU ki, aoei ka la ho kaonyu phet phantila Khaldi kaodak Ur ka leian loukei.”

⁸Lausikei Abramei laukei, “O BUNYUBOU Mühghaü, ngei ho phet phanlabü dogo ngei aiei ngela?”

⁹Hobaje haoei hao to jongaikei, “Kü shanga masu saoen che shatan po sem, hoba lonpaang che shatan po sem, sanlon paang che shatan po sem, hoba shujem dukutuk che hoba dukutuk che sungba.”

¹⁰Hobaje haoei khübü pendou sungbaan phei pheia nyangyoko phokei, aieilausi auje apheinyin.

¹¹Hobaje phe shaubü aushuong haibü mang thükto louyenkei, lausikei Abramei haoen shian sattikei.

¹²Hobaje chanyu nepbo kian Abram nyeket maiko yepbei; hoba hatlamoklabü nakthüh yaang hao thükto loukei.

¹³Hobaje BUNYUBOUei Abram to laukei, “Shangashatko ngeashi, kaibü thensilen haoeneibü ayingbü kaodak chenei kilabü hoba haoen khangenlabü; hoba haoenei haoen po saongao lei khonsaktilabü.

¹⁴Hobaje haoenei khangenbü phang ngei matjemlabü, hoba kho phaia haoen nyaksinam juong yoa longlabü.

¹⁵Lausikei no sangmaia kaibü bousishuong jungto haulabü; no tükde jailean khünlabü.

¹⁶Hobaje meten leiboubüa kaibü thensilen hato nyibou loungailabü; aieilausi Amorbü shieikoela haoenei shedbü akümphemkei.”

¹⁷Hobaje ladang chanyu nepbei, chühashi, wankhük longbü wanthep che hoba wanlongbü hantin che phejan kanglang to dankei.

¹⁸Kheijinei BUNYUBOUei Abram to thebülanbü che leko laukei, “Kaibü lilabü la ho kao kua. Ijep shumang ka shumang yaangbou Eufrates shumang sühko -

¹⁹Kenbü, Kenizbü hoba Kadmanbü,

²⁰Hitbü, Perizbü, Refaimbü,

²¹Amorbü, Kananbü, Girgashbü hoba Jebusbü kaodak pendou ngei kua.”