Read Chang Naga KAOBAK 17 Bible Online

KAOBAK 17 - Chang Naga bible

KAOBAK 17

¹Hobaje ladang Abram po anjinngao to gü onkei, BUNYUBOU hao jungto longan laukei, “Ngo pendou Thükenbou Mühghaü, kü thedanga paiashi, hoba ashedko kishi.

²Hobaje ngei ngeibü thesilan seti kanglanga phokho, hoba no juongnyu haatiyaangtilabü.”

³Hobaje Abramei haoeibü the khüman khüpetkei, hoba Mühghaüei hao to laukei,

⁴“Chühashi, ngeibü thesilan ka yoa kia, hoba ho phang juongeibü bou la yeilabü.

⁵Touje kaibü nyen Abram anyenlabü, lausikei Abraham dogo nyenlabü, aieilausi phang juongeibü bou ngei no yeitia.

⁶Hobaje ngei no lang juong hekbü yeitilabü, hoba ka ka ngei phang shuong longtikulabü hoba ka ka choba shuong longlabü.

⁷“Hobaje ka shanga hoba ka phainei kaibü thensilen shanga Mühghaü kila shanga seti kanglanga hoba ka phainei kaibü thensilen ham kanglanga meten pendoua thon akibü theyolanyobü kila shanga ngeibü thesilan kümlabü.

⁸Hobaje ngei ka la hoba ka phainei kaibü thensilen la, no paishang kaodak, Kanan kaodak pendou, ponpen kaneibü yingla kulabü, hoba ngo haoeneibü Mühghaü kilabü.”

⁹Hobaje Mühghaüei Abraham to laukei, “Nyije, no hoba kaphainei kaibü thensilen haoen meten pendoua ngeibü thesilan jungeijan.

¹⁰Ngeibü thesilan, laobou seti hoba kaphainei kaibü thensilen kanglanga kanei pholabü, khei kan yoa bousu pendou kipan apjan.

¹¹Kan kiplabü, hoba ho ngo hoba kan kanglanga thebülanbü tetsida kilabü.

¹²Loulabü metena kan yo kabü chalou set onbü bousushou, kan chema bukbü ayingsi yenbou ka namei jekbü, kaibü thensilen ayingsikei, haoen pendou kiplabü.

¹³Kaibü chema bukbü yingasikei, kaibü namei jekbü yingasikei pendou kiplabü. Hobaje ngeibü thebülanbü kaibü phea thon akibü thesilan shanga kilabü.

¹⁴Hobaje akipbü bousu, ao tangkabü phe akip, hao jembü mütli ka wapan aplabü; haoei ngeibü thesilan lulima.”

¹⁵Hobaje Mühghaüei Abraham to laukei, “Kayak Sarai shangakei saoeibü nyen Sarai dogo tenyen, lausikei sao Sara dogo kilabü.

¹⁶Hobaje ngei sao haükulabü, hoba tokei aei ngei sao danko ka la bousushou che kulabü, haü, ngei sao haükulabü, hoba sao phangshuongeibü nyu la yeilabü; phangeibü choba shuong sao ka longlabü.”

¹⁷Kheijinei Abraham the khüman nyikei hoba haoeibü maanga laukei, “Müt che bukan po saongao onan bousushou buklep lo? Hobaje Sara po anjinngao onan saoei shou buklep lo?”

¹⁸Kheijinei Abrahamei Mühghaü to laukei, “Ishmael ka thea kia yingma!”

¹⁹Hobaje Mühghaüei laukei, “Aying, kayak Saraei ka la jayangshou che bukkulabü, hoba nyi hao nyen Isak dogo nyenkulabü; hoba hao phainei haoeibü lilabü shanga thon akibü theyolanyobü kilabü lele ngei hao yoa ngeibü thebülanbü kümlabü.

²⁰Hobaje Ishmael shangabü nyi laubü ngei dida; chühashi, ngei hao haükua, hoba ngei hao lang hekbü yeitikulabü, hoba hao juong haatikulabü; hao choba anthüknyieibü bou la yeilabü, hoba ngei hao phangyaang yeitikulabü.

²¹Lausikei Isak, ao Saraei ngiempo ho jih tükdea buklabü ki, hao yoa ngeibü thesilan kümlabü.”

²²Hobaje haoei hao to joyobü nangkei, hoba Mühghaü Abraham jungka angkei.

²³Hobaje Abrahamei haoshou Ishmael hoba hao chema bukbü pendou hoba haoeibü namei jekbü pendou, haoeibü chema kibü müt yoka bousu pendou leijung louan, Mühghaüei hao to lenbü tegütham haoen phea tangkabü khop khünyettham kipan apbukei.

²⁴Hobaje Abrahamei haoeibü tangkabü khop kipan apjinei hao po anjinngaoto gü kikei.

²⁵Hobaje hao shou Ishmael, hao jembü tangkabü khop kipjinei po anthüksem kikei.

²⁶Khünyettham Abraham hoba haoshou Ishmael haosi ham kipbei.

²⁷Hobaje haoeibü chema kibü bousu pendou hoba chema bukbü si yenbou ka namei jekbü yoan hao yoa kipan apbei.