Read Chang Naga KAOBAK 18 Bible Online

KAOBAK 18 - Chang Naga bible

KAOBAK 18

¹Abraham chaloua aeibou sanglam jiha neichem koukhüna setan kijinei BUNYUBOU Mamre saopobü bulong nyangko hao jungto longan lenkei.

²Hobaje haoei tangko chühkei, hoba chühashi, müt sem hao thedanga lokei. Hobaje haoei haoen hapjinei hao neichem koukhün ka haoen to haüyola laangjung hauan kaoa sühko khüpetan laukei.

³“Ngeibü BUNYUBOU dan, ngei kan thea onou hapalonga kaibü sambü chema asühko tedan.

⁴Tou dei shisho sungbakho, hoba kan you makan bunyu long phanga haksoashi.

⁵Hobaje ngei wentek shisho sungbakukho, hoba kan haksoashi; kho phaia ong haushi; aieilausi kan kaneibü sambü jungto loukei.” Hobaje haoenei laukei, “Maiakei, nyi laubü tegü yingshi.”

⁶Hibü Abraham neichem to aeibou panteiko atan Sara to laukei, “Hali, wen inyaibü angsok sem jinan lamleashi, hoba kho nyatyoan wentek kümashi.”

⁷Hobaje Abrahamkei tongde masu shuong yoto haukei hoba masu shoushou netthembü che sungjung longeian haoeibü sambü shuong la kukei hoba haoei kho lamlekei.

⁸Hobaje haoei makon hoba sendei hoba masu shoushou laobou haoei lamlean kikei kho sungjung hauan haoen thedanga phokukei. Hobaje haoen shauji yungjinei hao haoen nyangko bunyu jungthema lokei.

⁹Kheijinei haoenei hao to laukei, “Kayak Sara lan ki?” hoba haoei jongaikei, “Sao neichema kia.”

¹⁰Hobaje haoen yoa cheei laukei, “Ladang ngiempo ho jihsiphai longeilaje, maimaitham ngo ka jungto loungailabü, hoba chühashi, kayak Saraei bousushou che buklabü.” Hobaje haoeibü phaidak ka Saraei ditkei.

¹¹Tou Abraham si Sara sinan kikei, hoba po danan kikei, hoba Sara to yaksaeibü haang thonan apan kikei.

¹²Saraei jembü maanga nyiko laukei, “Tou ngo nou lean ngei olinbü haplep lo?”

¹³Kheijinei BUNYUBOUei Abraham to laukei, “Ngo noushou la yeian apan maimaitham ngei na buklepsai dogo aila Saraei nyiko laukei?

¹⁴BUNYUBOUei athükaminlabü lele denche kia si? Ladang ngiempo ho jihsiphai longeilaje takletbü jiha ngo ka jungto loungailabü hoba Saraei bousushou che buklabü.”

¹⁵Kheijinei Sara hatkei, khoei sao yepeikei hoba laukei, “Ngo anyi.” Lausikei haoei laukei, “Maimaitham no nyia.”

¹⁶Hobaje mütshuong khüka meimeian Sodom aeto chühyantikei, hoba Abrahamei haoen hangan hautikei.

¹⁷Kheijinei BUNYUBOUei laukei, “Ngei ai kümla ki kho ngei Abraham ka huletlep lo?

¹⁸Maimaitham Abraham phangyaang yeilabü hoba hau kibü yeilabü, hoba kaodak phang pendou hao danko haülabü.

¹⁹Aishanga hao shousi hoba hao phainei haoeibü thensilen to ai saopobü janbü hoba ngühmai ki kho jungeiko BUNYUBOU lamnyua paiashi dogo sakkula shanga hoba haoenei ong kho kümalonga ngei Abraham to theletbü loushedtila ngei hao pienkei.”

²⁰Kheijinei BUNYUBOUei laukei, “Sodom si Gomora ngühbü yaang, hoba haoeneibü shabü yongko yaangsije,

²¹ngo tou yanan, kü jungto loubü ngühyobü tegü haoenei pendou aenei jungeilaoje chühkho; khei ayinglonga, ngei ngelabü.”

²²Hobaje mütshuong kho khüka sepeinyu Sodom aeto haukei, lausikei Abrahamje tokei BUNYUBOU thedanga lokei.

²³Hobaje Abrahamei nyangko louan laukei, “Nyi saopobü müt shabü shuong yoa mautilep lo?

²⁴Sangnyu khünei saopobü müt anjinsem kialonga nyi khünei kibü saopobü müt anjinsem nyena sangnyu kho asenetko mautilep lo?

²⁵Kho tegü jungeila ka jungka lounyu bang an kia; shedbü shabü müt yoa saopobü mautisi saopobü mütshuong shedbü shabü tegü yeilabü; kho ka jungka lounyu bangakei! Kaodak pendou matjembouei ngühmai ajungeilep lo?”

²⁶BUNYUBOUei jongaikei, “Ngei Sodom sangnyua saopobü müt anjinsem hapalonga haoen laüa sangnyu kho senetlabü.”

²⁷Hobaje Abrahamei jongaiko laukei, “Chühashi, thamngu si tapei BUNYUBOU to joyola maangpon yaangda;

²⁸saopobü müt anjinsem kho ngaoei apensi ngaoei abenbü shanga sangnyu kho mautilep sai?” Hobaje haoei laukei, “Ngei khünei saonyi to ngao hapalonga kho amautikulabü.”

²⁹Hobaje toukei haoei hao to joyoko laukei, “Khünei saonyi hapsi lai?” Hobaje haoei laukei, “Ngei saonyi shangakei kho ajungeilabü.”

³⁰Hobaje haoei laukei, “O BUNYUBOU khau tüangma, toukei ngei laukho, khünei müt khujin hapsi lai?” Hobaje haoei laukei, “Ngei khünei khujin hapalonga ajungeilabü.”

³¹Abrahamei laukei, “Tou chühashi, ngei BUNYUBOU to joyola maangpon yaangda; khünei saoche hapsi lai?” Hobaje haoei laukei, “Ngei saoche shanga kho amautilabü.”

³²Kheijinei haoei laukei, “O BUNYUBOU, khau tüangma, touje ngei che ong joyokho; khünei an hapsi lai?” Hobaje haoei laukei, “An shangakei ngei kho amautikulabü.”

³³Hobaje BUNYUBOUei Abraham to joyokhümbüyam satan apbei, hoba Abraham hao kishang to sepeian ngaikei.