Read Chang Naga KAOBAK 2 Bible Online

KAOBAK 2 - Chang Naga bible

KAOBAK 2

¹Kho tegü müh si kao pendou yeikei.

²Hobaje nyetbounyet Mühghaüei haoei kümbü pendou thonkei; hibü nyetbounyet haoei kümbü kümsilei pendou ka hao haksokei.

³Hobaje Mühghaüei chalou nyetbounyet kho haükuko saüenkei; aiei haoei yaübü kümsilei pendou khünei hao haksokei.

⁴Ho müh si kao kümbü meten. Ladang BUNYUBOU Mühghaüei müh si kao kümbei.

⁵Kaodaka bulong deilong ai akitei hoba kelang onglang mokhittei; aieilausi Mühghaüei kaodak to lang ayantiko kikei; hoba kao shapla khünei müt che ongkei akitei,

⁶lausikei kaonyu maang ka dei pakkei hoba deiei kaothe pendou to dei lakkei.

⁷Kheijinei BUNYUBOU Mühghaüei kao ka tham sungan müt kümbei hoba haoeibü kungkhüna lang kibü hak metan jinkukei, hoba müt kho lang kibü chela yeikei.

⁸Kheijinei BUNYUBOU Mühghaüei chaang aenei Edena ba che lekei; hoba khünei haoei kümbü müt kho phokei.

⁹Hobaje BUNYUBOU Mühghaüei kao ka hemaibü busidei hoba shaula maibü buhek yoan yemtikei. Bamang jenyua langkeibü bunyu hoba maibü amaibü ngebü bunyu haoei yemtikei.

¹⁰Bamang kho nyakko Eden ka shumang che koukei hoba kho ka shumang lei la jankei.

¹¹Shaangbou shumang nyen kho Pishon, hoei hon kibü Havila kaodak pendou jembo kouda,

¹²hoba kho kaodak kabü hon kho maibü; hoba khünei phülem hoba oniks laang kia.

¹³Nyiboubü shumang nyen kho Gihon; ho Kush kaijembo kouda.

¹⁴Hobaje semboubü shumang nyen kho Tigris, ho Assiria chaang aeto kouda. Hobaje leiboubü shumang kho Eufrates.

¹⁵BUNYUBOU Mühghaüëi müt kho Eden bamang to leijung hauan khünei kümlaleila hoba lomla apyokei.

¹⁶Hobaje BUNYUBOU Mühghaüei müt kho to ngühkhüm kuko laukei, “Nyi bamanga bunyu pendou ka shaula thükkei,

¹⁷lausikei maibü si amaibü ngebü bunyu ka nyi teshau; aieilausi nyi laobou chalou ka shaulaje khünyet ka no maimaitham hailabü.”

¹⁸BUNYUBOU Mühghaüei laukei, “Müt kho boushou kila amai; ngei hao shanga thuiyobü che kümbho.”

¹⁹Tou BUNYUBOU Mühghaüei kao ka yamkabü meisiau pendou hoba müh kabü au pendou küman phaia haoei ai nyen nyenkulaje dogo hao jungto leibakei; hoba müt khoei lang kibü meisiau yangsikok weko la nyen nyenkukei, hoba kho haoeibü nyen la yeikei.

²⁰Hibü müt khoei samkeisamuk pendou hoba mühkabü au pendou hoba yamkabü meisiau pendou la nyen nyenkukei, lausikei Adam shanga thuiyobü müt mubü che ühüpou.

²¹Hibü BUNYUBOU Mühghaüei müt kho nyeket maisho shitikei, hoba ladang yepan kikei, kheijinei haoei müt khoeibü hiplo che sungkei hoba kho kaoen kho phejakei shamtikukei;

²²hoba hiplo laobou BUNYUBOU Mühghaüei müt ka sungenkei, kho ka haoei yaksa che kümbei, hoba sao kho müt jungto leibakukei.

²³Kheijinei müt khoei laukei, “Ho tou ngeibü lo ka lo hoba ngeibü phe ka phe; Sao yaksa dogo nyenlabü, Aieilausi sao bousu ka sungenkei.”

²⁴Khoei bousuei jembü nyu si bou apyoan jembü yak to maangshikko paplepbo kilabü, hoba ham kho phe chela yeilabü.

²⁵Bousubou si yaksanyu ham mütkong kikei, hoba haosi ihimouyoko kikei.