Read Chang Naga KAOBAK 20 Bible Online

KAOBAK 20 - Chang Naga bible

KAOBAK 20

¹Tou Abraham khüka yungthang aeto meimeijung hauan Kadesh si Shur kanglanga kikei. Longche Gerara thüngkei,

²hoba khünei Abrahamei haoyak Sara shangabü lenkei, “Sao küna ki.” Kheijinei Gerarbü Abimelek Chobaei Sara leila hautikei hoba sao leibakei.

³Lausikei Mühghaüei Abimelek to nangnak manga longan lenkei, “Chühashi, yaksa laobou nyi lekei kho haangshong no hailabü lele ong kia, aieilausi sao chemkanbü yaksa ki.”

⁴Tou Abimelek sao nyangko mo ohaukei, hibü haoei laukei, “BUNYUBOU, nyi shed ashonbü phang mautilep lo?

⁵Haoei kü to ‘Sao ngeibü na’ dogo laukei ayingsi? Hobaje yaksanyueikei jembü lolo ‘Hao ngeibü jai’ dogo alau lo? Kü maangpon tangbü hoba ik hinseibüei ngei ho kümsilei kümbei.”

⁶Kheijinei Mühghaüei manga hao to laukei, “Haü, nyi kaibü maangpon tangbüei ho kümsilei kümbei dogo ngei ngeakei, hoba toukei ngo khulimbo shed shonlabü ka ngei no senetkei. Khoei ngei ka la sao to ameititi.

⁷Hibü müt khoeibü yak kho ngaitikuashi, aieilausi hao thuseibü, hoba haoei ka shanga sukujakulabü, hoba no langlabü. Lausikei nyi sao akungailonga tükde no hoba nyi kibü pendou hailabü.”

⁸Nyibounyet ngeyang enyu Abimelek pikei hoba hao phanga yaangbü shuong pendou ngashaikei hoba haoei haüthükbü pendou haoen to lenkei, hoba haoen aeibou hatkei.

⁹Kheijinei Abimelekei Abraham hao jungto ngaan hao to laukei, “Nyi kü thükto hoba kü sangle to shedbü hatetche sungbalabü lele ngei ka thedanga ai mashikkei? Ai ajungeijan ki kho nyi kü to jungeia.”

¹⁰Hobaje Abimelekei Abraham to phekei, “Nyi ho ai dambüei kümbei?”

¹¹Hobaje Abrahamei jongaikei, “Aieilausi ho kaoa Mühghaü to hatbü aki; khoei haoenei küyak laüa ngo haitilabü.

¹²Hobaje khüto limbo, sao maimaitham küna, küboueibü shou, lausikei kü nyueibü shou aying, hoba sao küyak la yeikei.

¹³Hobaje ladang Mühghaüei küboueibü chem ka ngo kükto thangto hautikei, kheijinei ngei sao to laukei, ‘Sen haushang pendoua “Hao küjai yingkei” dogo lauko nyi kaibü sanou kü to lenjan’ dogo laukei.”

¹⁴Kheijinei Abimelekei san hoba masu pongsu, hoba aaomüt bousu si yaksa hoba haoyak Sara hao la kungaikei.

¹⁵Hobaje Abimelekei laukei, “Chühashi, ngeibü kaodak ka thedanga kia; no kimangsühbüa kishima.”

¹⁶Hobaje Sara to haoei laukei, “Ngei kajai la chandinam hajar che kuda; chühashi, ho kayoa kibü pendou thedanga no ashedbü aukabü ki hoba pendou thea no matmaitia.”

¹⁷Hobaje Abrahamei Mühghaü to sukeijakei, hoba Mühghaüei Abimelek hoba haoyak, hoba haoeibü aaosao shuong shousi kilabü lele maitikukei;

¹⁸aishanga Abrahameibü yak Sara haangshong BUNYUBOUei Abimelek chema kibü yaksa shuong pendoueibü nasetshang khinkukei.