Read Chang Naga KAOBAK 21 Bible Online

KAOBAK 21 - Chang Naga bible

KAOBAK 21

¹Tou BUNYUBOUei haoei laubü tegü Sara to onoukei hoba BUNYUBOUei haoei thekubü tegü kümbei.

²Hobaje Sara mangakongko apan Abraham la, hao baushi sinan apan Mühghaüei haoei takletkubü chaloua bousushou che bukkukei.

³Hobaje Abrahamei hao la Saraei bukkubü jayangshou la Isak nyenkukei.

⁴Ladang Isak chalou set onkei Mühghaüei haola sakkubü tegü Abrahamei kipbukei.

⁵Haoshou Isak haola bukkujinei Abraham po saongao jai lean kiteikei.

⁶Hobaje Saraei laukei, “Mühghaüei ngo nyitikei; hoba ho shangabü ditbü shuong pendouei kü yoa nyilabü.”

⁷Hobaje saoei laukei, “Aoei Abraham to Saraei na yopbulabü dogo laula? Lausikei ngei hao jai lean hao la bousushou che bukkua.”

⁸Hobaje nashou kho chingko sen apyokei, hoba Abrahamei Isakei sen apyonyet lem yaangbü che kümbukei.

⁹Hobaje Ijep sao Hagareibü shou laobou saoei Abraham la bukkukei, Saraei saoeibü shou to hatlenko hapbei.

¹⁰Hibü saoei Abraham to laukei, “Ho aaosao si saoeibü shou shian sattiashi; aieilausi ho aao saoeibü shou kü shou Isak to phetphana ühamlabü.”

¹¹Khoei haoshou Ishmael laüa Abraham aeibou maanga amaiko kikei.

¹²Lausikei Mühghaüei Abraham to laukei, “Nashou si kaibü sambüsao shangabü no aolinko teki; Saraei ka to lenbü pendoua sao to ngüha leashi; aieilausi Isak danko kaibü lilabü weeilabü.

¹³Ngei sambü aaoeibü shou kakei phang che yeitikulabü, aieilausi hao kaibü lilabü ki.”

¹⁴Nyibounyet ngeyang enyu Abrahamei wentek si phekhun shongmok che deiei shenko jinan Hagar la kukei. Haoei kho saoeibü phaka tonan jinkukei hoba sao la na kho kuan hangan hautikei. Hobaje sao bangjung satan Beersheba phetsen kaodaka shoongeikei.

¹⁵Ladang phekhun shongmok kabü dei kho khümbei, saoei na kho buham phang chenei apyokei.

¹⁶Hobaje saoei hao thedang ka longche hauan, phak saosem thüng saan setkei; aishanga saoei lolo laukei, “Ngei na haibü to techühkho.” Hobaje sao khonei setan ngüh angko haapbei.

¹⁷Hobaje Mühghaüei nashou haapbü kho ditkei, hoba Mühghaü khuthük hangangbüei khuthük ka Hagar ngako laukei, “No ai kümda, Hagar? Tehüt, aieilausi Mühghaüei nashoubou hao kishanga haapbü dida.

¹⁸Meimeiashi, nashou kho phonan kaibü ikei jenan sungashi, aieilausi ngei hao ka phang yaangbü che yeitilabü.”

¹⁹Hobaje Mühghaüei saoeibü nyek ipbukei hoba dei kibü kaoen che hapbei; hoba saoei hauan phekhun shongmok kho deiei shenko khuan na la yungtikei.

²⁰Hobaje Mühghaü nashou yoa kikei, hoba hao chingkei; hoba yama kikei, hoba hao chingko lau jungbü müt che la yeikei.

²¹Hao Paran yama thüngkei, hoba haonyuei hao shanga Ijepsao che ngakukei.

²²Kho jihsiphaia Abimelek si Lajamleibou Fikolei Abraham to laukei, “Nyi kümbü ajanjan pendoua Mühghaü ka yoa kia

²³Hibü tou kü to Mühghaü nyen phongko khei nyi kü to hoba ngeibü shousi shuongto hoba ngeibü thensilen to akhüp alanglabü; lausikei ngei ka to jungeibü sanou tegü, nyi kü to, hoba ai kaodaka ong no thüngkei khüto jungeilabü dogo thekuashi.”

²⁴Abrahamei laukei, “Ngei thedalanda.”

²⁵Kheijinei Abrahamei Abimelek to deikhün laobou Abimelekeibü sambü shuongei sokei kho shanga ngühphe kikei.

²⁶Lausikei Abimelekei laukei, “Ho aoei kümbeije ngei angekei, nyikei kü to alen, tat ong ditda.”

²⁷Kheijinei Abrahamei san hoba masu pongsu sungbaan Abimelek la kukei, hoba haosi ham ngüh lanyokei.

²⁸Abrahamei sanlon saoen nyet sanshuong yoka pinyinan phokei.

²⁹Hobaje Abimelekei Abraham to laukei, “Habü sanlon saoen nyet pinyinan phobü kho tetlabü ai?”

³⁰Abrahamei jongaikei, “Ho deikhün ngei thukei dogo aukabü lela shanga sanlon shoushou nyet ho ngeibü ik ka sungletashi.”

³¹Hibü kho kaodak la Beersheba dogo nyenkukei, aieilausi haosi ham khünei theyolanyokei.

³²Kho tegü haoen Beershebaa theyolanyokei, hoba Abimelek si haoeibü Lajamleibou Fikol meimeijung Filistia kaodak to ngaikei.

³³Hobaje Abrahamei tamarisk bu che Beershebaa kekei, hoba Thonakibü Mühghaü BUNYUBOU nyena lembei.

³⁴Hobaje Abraham Filistia kaodaka chalou lounyu thüngkei.