Read Chang Naga KAOBAK 22 Bible Online

KAOBAK 22 - Chang Naga bible

KAOBAK 22

¹Jihsiphai tuisho hauan phaia Mühghaüei Abraham takteikei hoba hao to laukei, “Abraham!” Hobaje Abrahamei jongaiko laukei, “Ngo hanei kia!”

²Kheijinei Mühghaüei laukei, “Kashou, kashou jayangshou Isak, laobou nyi sanouda, hao leian Moria kaodak to hauashi. Hobaje khünei ngei ka la shean lenlabü shongh chenei nyi hao kü la juokbü lembü kuashi.”

³Nyibounyet ngeyang enyu Abraham pian haoeibü gadua setshang jinan, hao yoa sambü müt nyi hoba haoshou Isak yoan leikei, hoba haoei juokbü lembü shanga bu shenan meimeijung Mühghaüei hao to lenbü kaoen che khüto haukei.

⁴Sembounyet Abrahamei saabü ka kaoen to chühangtikei.

⁵Haoei haoeibü sambü nyi to laukei, “Kasi gadu yoa hanei haiyeiko kiteishi, hoba küshou küsi thito haulabü hoba künei leman nyibou kasi jungto longeilabü.”

⁶Abrahamei juokbü lembü shanga bu sungan haoshou Isak la küntikei, hoba haoei wan si in jungkei; hoba haosi ham liko haukei.

⁷Isakei laukei, “Abou.” Hobaje haoei jongaikei, “Küshou, ai ma?” Hobaje haoei laukei, “Wan si bu kia, lausikei lembü kula sanlon shoushou lan ki?”

⁸Hobaje Abrahamei jongaikei, “Küshou, Mühghaüei juokbü lembü shanga san shoushou lamlekulabü.” Hibü haosi ham liko haukei.

⁹Ladang haosi Mühghaüei lenbü kaoen sühkei, Abrahamei khünei laangshongei lemshang yaükei, hoba bu shean jaan phokei. Hobaje haoshou Isak khühan haoeibü lemshang thüka peithetnyu yeptikei.

¹⁰Kheijinei Abrahamei haoeibü ikei jembü shou haitila in tonenkei.

¹¹Lausikei BUNYUBOUeibü hangangbüei khuthük ka hao ngako laukei, “Abraham, Abraham!” Hobaje haoei jongaikei, “Ngo hanei kia.”

¹²Hobaje haoei laukei, “Na to ik tüt. Hobaje hao to ai teküm; Nyi Mühghaü to ngüha leda hoba hatda dogo ngei ngea; aishanga nyi kashou che ong kibü khokei aphokai.”

¹³Hobaje Abrahamei chühangtisi hao phainei sanlon paang che haoeibü laangei hama minetan hapbei, hoba yam to hauan sanlon paang kho sungan haoshou jeila juokbü lembü kukei.

¹⁴Hibü Abrahamei ho kaonyek la “Jihova-jire” dogo nyenkukei. Tat sühko lauyobü tegü, “BUNYUBOUeibü shongha kho kulabü.”

¹⁵Hobaje BUNYUBOU hangangbüei Abraham nyibou khuthük ka ngakei,

¹⁶hoba laukei, “BUNYUBOUei lauda: Nyi ho kümsilei kümsi hoba kashou che ong kibü aphokeisi ngei kü nyena thedalanda;

¹⁷hoba ngei no haükulabü hoba haabüyaangbüa ngei kaibü thensilen müha khanshoulitshou tegü hoba molo yungkoa kibü phetsen tegü haatilabü. Hobaje kaibü thensilenei haoeneibü dangbou koukhün kimlabü.

¹⁸Hobaje kaibü thensilen danko kaonyu phang pendou haükulabü; aieilausi nyi kü ngüha lekei.”

¹⁹Hibü Abrahamei jembü sambü nyi jungto ngaian, haoen liko meimeijung Beersheba to haukei. Hobaje Abraham Beershebaa kikei.

²⁰Jih tuisho kian phaia Abraham to hai laukei, “Chühashi, kaibü na Nahor lakei Milkaei shousi bukkua.”

²¹Uz, shaang bukbü, Buz, haoeibü na, Kemuel (Arameibü bou)

²²hoba Kesed, Hazo, Pildash, Jidlaf hoba Bethuel.

²³Hobaje Bethuelei Rebeka hapbei. Habü müt set Milkaei Abrahameibü na Nahor la bukkukei.

²⁴Hobaje haoeibü thangnyu nyenei Reuma, saoeikei Teba, Gaham, Tahash hoba Maaka, dogo bukkukei.