Read Chang Naga KAOBAK 23 Bible Online

KAOBAK 23 - Chang Naga bible

KAOBAK 23

¹Sara salang po saongaoto saotonyet kikei.

²Hobaje Sara Kanan kaodak Kiriat Arba (kho Hebron) a haikei, hoba Abraham Sara shanga mang haapla atkei.

³Hobaje Abrahamei haibü mang apyoan meimeijung haukei, hoba Hitbü shousi shuong to laukei,

⁴“Ngo kan yoa yenbou hoba küksithang ki, ngei ngeibü haibü mang khünla thüklabü lele kanei küla mang khünshang kaoen che yakbü.”

⁵Hitbü shuongei Abraham to jongaiko laukei,

⁶“Küneibü ngüha lebü, bunyubou. No kün yoa yaangenbou che ki, küneibü hee maiboua kaibü haibü mang khünashi. Nyi kaibü haibü mang akhünlabü lele kün aoeikei haoeibü hee asenetlabü.”

⁷Abraham loenkei hoba kho kaodak kabü mütshuong thedanga khüpetkei (kho Hitbü).

⁸Hobaje haoei haoen to joyoko laukei, “Ngei ngeibü haibü mang khünla kanei maanganga longa, kü to ngüha lekai, hoba Zoar shou Efron to,

⁹haoei haoeibü kao thonbüa kibü Makpela laangpob laobou haoeibü ki, kho kü la yakkula phekushi. Mu muko haoei ngeibü khünshang yingla kan thedanga kho kü la kutiashi.”

¹⁰Kheijinei Hit shousi shuong yoa Efron setan kiteikei, hoba Efronei Hit shousi shuong thedanga haoeibü sangnyu bakhün danjung angbü pendou thedanga Abraham to jongaiko laukei,

¹¹“Aying, bunyubou, kü ngüha lebü; kao kho ngei kala kuda, hoba khünei kibü laangpob ngei ngeibü eikshuong shousi shuong thedanga ngei kho kala kuda; kaibü haibü khünashi.”

¹²Hobaje Abrahamei kho kaodak mütshuong thedanga khüpetkei.

¹³Hobaje haoei kaonyek kabü mütshuong thedanga Efron to joyoko laukei, “Lausikei nyi maang angalonga kü to ngüha lekai, ngei ho kao munam kala kukho; ho küka leashi, hoba khünei ngeibü haibü khünkho.”

¹⁴Hobaje Efronei Abraham to jongaiko laukei,

¹⁵“Ngeibü BUNYUBOU, kü to ngüha lekai, kao che chandinam shekel saongao lei den seti kanglanga kho ai yingla? Hibü kaibü haibü khünashi.”

¹⁶Hobaje Abrahamei Efron ngüha lekei; hoba Abrahamei Efron la haoei Hitbü shousi shuong thedanga laubü tegü chandinam shekel saongao lei namseibü shuongei jungeibü hima kukei.

¹⁷Hibü Efronei ai kao Makpelaa kikei, laobou Mamre thedanga kikei, kao khünei kibü laangpob hoba kho kaijembo laobou ki, leilanga sühko kibü busidei pendou Abrahameibü la yeikei.

¹⁸Habü Hitbü thedanga haoeibü sangnyu danjung angbü müt pendou thedanga Abrahameibü yingla aukabü kukei.

¹⁹Kho phaia, Abrahamei Mamre thedanga kibü Makpela kao laangpoba Sara khünkei, ho Mamre Kanan kaodaka kibü Hebron to jetei.

²⁰Hibü kao kho hoba khünei kibü laangjakbü heekhün kho Abraham la khünshang shanga Hitbü shuongei aukabü leko kukei.