Read Chang Naga KAOBAK 25 Bible Online

KAOBAK 25 - Chang Naga bible

KAOBAK 25

¹Hobaje Abrahamei lubü yaksa che lekei, hoba saoeibü nyen Ketura kikei,

²hoba saoei hao la Zimran, Jokshan, Medan, Midian, Ishbak hoba Shua bukkukei.

³Hobaje Jokshan ka Sheba hoba Dedan pakkei. Hobaje Dedaneibü shousi shuong Ashurim, Letushim hoba Leumim kikei.

⁴Hobaje Midianeibü shousi shuong Efa, Efer, Hanok, Abida hoba Elda kikei. Habü pendou Keturaeibü lilabü kikei.

⁵Abrahamei haoei kibü pendou Isak la kukei hoba hao lang kian haoshou Isak jungka haoen chaangbou aeto sattikei.

⁶Lausikei Abrahamei ngabü thangnyu shuongeibü shousi la haoei jongsak kukei, hoba haoshou Isak jungka hao lang kian chaangbou aeto sattikei.

⁷Abraham langkei salang po saongaoto anjinleito ngao onbüa haikei.

⁸Hobaje Abrahamei haoeibü thonbü hak hinko haoeibü salangei muan haikei, müta jaishou, hoba poei onsapbü, hoba hao jembü mütli yoa yokei.

⁹Hao shounyi, Isak si Ishmaelei hao Hitbü Zohareibü shou Efron kaoa Mamre nyangko kibü Makpela heea khünkei.

¹⁰Abrahamei laobou kao Hitbü shousi shuong ka jekkei, khünei Abraham si haoyak Sara khünkei.

¹¹Hobaje Abraham haian phaia Mühghaüei haoshou Isak haükukei, hoba Isak Beer Lahai Roia kikei.

¹²Ijep sao Hagar, Sara sambüsaoei Abraham la bukkubü, Abrahameibü shou Ishmael thensilen ho,

¹³hoba Ishmaeleibü shousi theneithenko nyen shuong habü ho: Nebaiot, hoba Kedar, Adbil hoba Mibsam,

¹⁴Mishma, Duma, Masa,

¹⁵Hadad, Tema, Jetur, Nafish hoba Kedema.

¹⁶Khübü kho Ishmaeleibü shousi shuong haoen jembü sang hoba jembü kishangei haoeneibü nyen shenda hoba ho chung weko ka kongnyu müt anthüknyi.

¹⁷Hobaje Ishmaelkei salang po saongaoto khujinto nyet kijinei thonbü hak hinan haikei, hoba hao jembü mütli yoa yokei.

¹⁸Hobaje haoeibü thensilen Assiria aeto haujinei Ijep kaodak nyangko Havila ka Shur sühkoa haoen kikei; haoei jembü jaisina pendou to dangan ajiaphaiko kikei.

¹⁹Abrahameibü shou Isak meten ho: Abraham ka Isak pakkei,

²⁰hoba Isakei Padan Arama kibü Arambü Bethueleibü nouyang hoba Labaneibü na Rebeka hao yakla lela ngajinei hao po saonyi kikei.

²¹Hobaje Isakei yak shanga BUNYUBOU to welaukei, aieilausi sao angkong kikei, hoba BUNYUBOUei haoeibü welau jongaian hao yak Rebeka mangakongko apbei.

²²Hobaje saoeibü shimunga nashou kho aüyokei, hoba saoei laukei, “Hai kialonga ngo lai kümla?” Hobaje saoei BUNYUBOU to phela haukei.

²³BUNYUBOUei sao to laukei, “Kaibü nasetshanga phang penyi kia; phang penyi kaibü shimung ka bangtilabü. Phang che kho phang che to hau kibou kilabü; hoba jaishoubouei nashoubou khangenlabü.”

²⁴Ladang shou buklabü jih sühkei, chühashi, saoeibü nasetshanga phokbü shou kikei.

²⁵Shaangbou kho saklangtham, mang pendou wiei yuklepan bukkei, hoba haoenei hao nyen Esau nyenkukei.

²⁶Hobaje kho phaia na bukkei hoba haoeibü ikei Esaueibü youdema hatlepan kikei, hoba haoeibü nyen Jakob nyenkei. Rebekaei haosi bukjinei Isak po saosem kikei.

²⁷Hobaje shounyi kho chingkei; hoba Esau meikipbüa sonenbü hoba tanlambü müt che kikei; hoba Jakob eaaoabü müt hoba neichema kikei.

²⁸Isakei Esau to sanoukei, aishanga haoei Esauei kipbabü yamphe shaukei; lausikei Rebekaei Jakob to sanoukei.

²⁹Jakobei chakshoushik thungan kikei, hoba Esau yam ka mühei haiyetnyu lungkei.

³⁰Hobaje Esauei Jakob to laukei, “Hali, saklangle thungbü shik khüka kü la okbü; aishanga ngo mühphama!” (Khoei hao nyen Edom nyenkei, tetlabü ‘Saklangbü’).

³¹Kheijinei Jakobei laukei, “Shaangla kü la kaibü jaishoubou phet yaakbü.”

³²Hobaje Esauei laukei, “Ngo hailabü lele kia, hoba ngei jaishou phejan phet khoei ai pailetla?”

³³Lausikei Jakobei laukei, “Kü thedanga shaangla thealanashi.” Hibü Esauei hao to thekolanko haoeibü jaishou phejan phet kho Jakob la yaakkukei.

³⁴Kheijinei Jakobei Esau la wentek hoba wenshik si ngoulangshik thungbü okkei. Hobaje haoei shauan yungan meimeijung jembü lam to haukei. Kho tegü Esauei haoeibü jaishou phejan phet aweasüng.