Read Chang Naga KAOBAK 26 Bible Online

KAOBAK 26 - Chang Naga bible

KAOBAK 26

¹Thedangto Abrahameibü jihsiphaia mühsinou kibü to liman kho kaodaka uangmuang lubü che kikei. Hobaje Isak Filistiabü choba Abimelek jungto Gerar to haukei.

²Hobaje BUNYUBOU hao jungto longan laukei, “Ijep kaodak to teyan, ngei no ai kaodaka kishi dogo lenlaje khünei kishi.

³Ho kaodaka thüngshi, hoba ngo ka yoa kilabü hoba no haükulabü. Aishanga kala hoba kaibü thensilen la ngei ho kaodak pendou kulabü, hoba ngei kabou Abraham to theyolanyobü loushadtikulabü.

⁴Hobaje ngei kaibü thensilen müha khanshoulitshou tegü juong haatikulabü, hoba kaibü thensilen la ho kaodak khümbo kulabü hoba kaibü lilabüa kaodak pendou haülabü.

⁵Aieilausi Abrahamei kü ngüha lekei, hoba ngei sakkubü, ngeibü ngühkhüm deikhüm hoba ngeibü songsido jungeikei.”

⁶Hibü Isak Gerara kikei.

⁷Hobaje khünei kibü mütshuongei hao to haoyak shangabü phekei, hoba haoei “Sao küyak” dogo laula hatsi “Sao küna” dogo laukei. “Aingenyu khünei kibü mütshuongei Rebeka laüa ngo haitilabü; aieilausi sao chühla saomaiakei.”

⁸Ladang hao khünei chalou lounyu kikei, Filistiabü choba Abimelekei koulom ka chühkei, hoba chühsi haoei Isakei yak Rebeka to sanouyoko hapbei.

⁹Hobaje Abimelekei Isak ngaan laukei, “Maimaitham sao kayak yingakei, hoba nyi ailai ‘Sao küna’ dogo laukei?” Kheijinei Isakei hao to jongaiko laukei, “Aieilausi ngei dambei, aingenyu ngo sao hangshong hailabü.”

¹⁰Hobaje Abimelekei laukei, “Nyi kün to ai kümbei? Mütshuong yoa cheei kayak yoa sosotham yepenakei, hoba nyi kün thükto shedbü sungbakhoulabü.”

¹¹Kheijinei Abimelekei müt pendou la ngühkhüm kuko laukei, “Aoyouei ho müt ayingsi haoyak to ik atlaje, hao tükde haitilabü.”

¹²Isakei kho kaodaka youli saakkei, hoba kho poathama saongao juong latkei, aishanga BUNYUBOUei hao haükukei.

¹³Hobaje müt kho akeiayaang shongko hao aei aei kiko haako haukei.

¹⁴Hobaje haoeibü san si masu shuong shuonga hoba sambü juong kiko chemdang yaang yeisi Filistiabüei hao to nyekto shatkei.

¹⁵Hobaje haoboueibü sambü shuongei Abraham haanga thuenbü deikhün pendou Filistiabüei thamei thuan shamtikei.

¹⁶Hobaje Abimelekei Isak to laukei, “Kün jungka kukashi; aieilausi no künto hau kibou yeia.”

¹⁷Kheijinei Isakei khüka kukjung satkei, hoba Gerar pholia neichem dangan khünei kikei.

¹⁸Hobaje Isakei haobou Abraham haanga thubü deikhün nyibou thungaikei, aieilausi Abraham haian phaia Filistiabüei khübü kho thuan shamtikukei, hoba haoei haobouei nyenkubü nyen khübüla nyenngaikukei.

¹⁹Hobaje Isakeibü sambü shuongei yomanga yungdei pakbü deikhün che thuenkei.

²⁰Lausikei Gerarbü sanlombü shuongei Isakeibü sanlombü shuong to oyoko laukei, “Dei kho küneibü! Hibü haoei kho deikhün nyen Esek dogo nyenkei, aieilausi haoenei hao to oyokei.”

²¹Hobaje haoenei nyibou deikhün che thukei, hoba haoenei khokei soyokei; hoba haoei kho nyen Sitna dogo nyenkei.

²²Hobaje haoei kho ka hauan, lubü deikhün che thukei, hoba kho aoei asoyo. Hobaje haoei khoeibü nyen Rehobot dogo nyenkei hoba laukei, “Aieilausi touje BUNYUBOUei sen la kishang kua, sen kaonyua haakoyaangko kilabü.”

²³Khüka hao Beersheba to angkei.

²⁴Khüyou BUNYUBOU hao jungto longan laukei, “Ngo kabou Abraham Mühghaü. Tehüt, aishanga ngo ka yoa kia; hoba ngei no haükulabü hoba ngo khangenbou Abraham nyena ngei kaibü thensilen haatikulabü.”

²⁵Hobaje Isakei khünei laangshongei lemshon che yaükei hoba BUNYUBOU to lembei. Khünei haoei neichem dangkei hoba haoeibü sambü shuongei deikhün che thukei.

²⁶Kheijinei Abimelek Gerar ka hao thangbou Ahuzzat yoa, haoeibü sepai shuong lajamleibou Fikol yoa Isak to haüyola haukei.

²⁷Kheijinei Isakei haoen to phekei, “Kanei küto the shouda, hoba kan jungka bangtikei, kholonga kan kü jungto aila louda?”

²⁸Hobaje haoenei jongaikei, “BUNYUBOU kayoa kia dogo künei maisho hapa; hibü künei laukei, ‘Sen kanglanga theyolanyoko ditenyobü che kümbho’

²⁹kho khei künei kala ai akümbubü tegü, hoba künei kato maibü to liman aikei akümbü tegü, hoba no sangmaia bangtibü tegü, nyi kün khon asaktilabü lele no tou BUNYUBOUei haükua.”

³⁰Hobaje Isakei haoen shanga lem likuko shaukei yungkei.

³¹Hobaje haoen ngeyang enyu pian haoen cheei che to theyokei. Hobaje Isakei haoen hautikei hoba haoenei hao ka sangmaia bangkei.

³²Khünyettham Isakeibü sambü shuongei louan haoenei thubü deikhün shanga lenkei, hoba hao to laukei, “Künei deikhün hapa.”

³³Haoei khola “Sheba” nyenkukei; khoei ho sangnyu to tat sühko Beersheba dogo lauda.

³⁴Esau po saonyi kijinei, haoei Hitbü Beerieibü nouyangshou Judit, hoba Hitbü Eloneibü nouyangshou Basemat yakla ngakei.

³⁵Haoenei Isak si Rebekaeibü langkei aeibou maangnoutikei.