Read Chang Naga KAOBAK 27 Bible Online

KAOBAK 27 - Chang Naga bible

KAOBAK 27

¹Ladang Isak baushi sinkei hoba haoeibü nyek yukmetan haoei ühüp, haoei haoshou jaishoubou Esau ngaan hao to laukei, “Küshou.” Haoei jongaikei, “Ngo hanei kia.”

²Isakei laukei, “Ngo tou baushi sina, hoba hailabü chalou angekei.

³Hibü ngei kato sudajada, kaibü laujin phot hoba kaibü lau jungan yamto kouan küla meishi phe sungba.

⁴Ngei mühbü tegü shaula ngeibü sembunga maibü shausiyung lamlean küla sungba, ngei kho shauan ngo ühaijinei ngei no haükulabü lele.”

⁵Tou Isakei jembü shou Esau to joyojinei Rebekaei ditkei. Hobaje Esau meishi kipbala yamto koukei.

⁶Hobaje Rebekaei haoshou Jakob to laukei, “Lo, kabouei kajai Esau to joyobü ngei dida.

⁷Haoei hai laukei, ‘Küla meishi kipbaan ngei maikubü shausiyung lamleashi, hoba ngei kho shauan ngo ühaitoua no BUNYUBOU thedanga haükulabü lele.’

⁸Tou, küshou, ngei kala lenbü ditashi hoba kü ngüha leko kümashi.

⁹Tou sanshuong yoto hauan khüka shoushou penyi küla sungba, hoba ngei khoei kabouei mühbü tegü hao sembunga maibü shausiyung lamlekukho.

¹⁰Hobaje nyi kabou jungto kho jungan hauashi; haoei kho shauan hao ühaijinei no haükulabü haang.”

¹¹Hobaje Jakobei haonyu to hai laukei, “Küjai Esau wi angbü müt, hoba ngo lenglengbü.

¹²Aingenyu kübouei küto makan chühlabü, hoba hao thedanga ngo khüpbülangbü yinglabü hoba küla haülabü ayingko shedsikhau ong khüpan jinngailabü.”

¹³Hobaje haonyuei hao to laukei, “Küshou, kaibü shedsikhau küto yingshi, kü ngüha ong leko khübü kho küman sungba.”

¹⁴Hibü haoei hauan khübü lapan haonyu jungto sungbakei, hoba nyuei haoboueibü sembunga maikubü tegü lamlekukei.

¹⁵Rebekaei haoshou jaishoubou Esaueibü neisimei saoei chema kibü maiboutham sungbaan shou nashoubou Jakob la yukkukei.

¹⁶Tokei saoei haoeibü ika hoba haoeibü ngüm lenglengbüa loneibü khon yukkukei.

¹⁷Hobaje saoei lamlebü meimaibü shausiyung hoba wentek kho haoshou Jakob ika kukei.

¹⁸Hao bou jungto hauan laukei, “Abou,” hoba haoei laukei, “Ngo hanei kia, küshou. No laobou yingkeima?”

¹⁹Jakobei bou to laukei, “Ngo Esau, kashou jaishoubou; nyi lenbü tegü ngei küma; sanoudambo pian nyi ngo haükulabü lele ngeibü meishi phe shauashi.”

²⁰Hobaje Isakei haoshou to phekei, “Nyi ho ailai tongde hapbei, küshou?” Haoei laukei, “Aieilausi BUNYUBOU ka Mühghaüei ngeibü kümsilei sokosepbo kümtikei.”

²¹Kheijinei Isakei Jakob to laukei, “Nyangko kaishima; ngei kato meitiko no tükde küshou Esau yinglaoje ngela shanga.”

²²Jakob bou jungto nyangko haukei; haoei hao to meitiko laukei, “Ngühje Jakobeibü ngüh, ikje Esaueibü ik.”

²³Hobaje haoei hao ashen, aieilausi haojai Esau tegü haoeibü ik wiei yuklepan kikei; hibü haoei hao haükukei.

²⁴Hobaje haoei laukei, “No tükde küshou Esau sai?” Hobaje haoei jongaikei, “Ngo yingkei.”

²⁵Kheijinei haoei laukei, “Kü jungto nyangko sungba, ngei haülabü shanga küshoueibü meishi phe kho shaukho.” Jakobei kho hao jungto nyangko sungbaan shaukei hoba ihkei hao jungto nyangko sungbaan yungkei.

²⁶Kheijinei haobouei hao to laukei, “Tou kü jungto nyangko louan sembung shepshi küshou.”

²⁷Kho tegü hao nyangko hauan haoeibü sembung to shepbei. Ladang haoei haoeibü nei lüm jemenkei, haoei hao haükuko laukei, “Chühashi, küshoueibü lüm BUNYUBOUei haükubü yambabü sanglüm maimai;

²⁸Mühghaüei kala mühkabü nindei ka hoba kaodak haabü ka youshou si ih juong kushi.

²⁹Mütshuongei no khangenshi, hoba phangshuongei kato khüpetshi. Kaibü jaisinasi shuong thüka bunyu yeishi; hoba kanyueibü shousi shuongei ka thedanga khüpetashi. Kato khükbüokbü shuong pendou to khüksiuok yingshi, hoba no haükubü shuong haükushi.”

³⁰Isakei Jakob haükuan Jakob haobou jungka satsilengko jai Esau meikipbü ka lungkei.

³¹Hobaje haoeibü sembunga maikubü shausiyung lamlean bou jungto sungbakei, hoba haoei bou to laukei, “Abou, nyi ngo haükulabü lele pian kashoueibü meishi phe shauashi.”

³²Haobou Isakei laukei, “No ao?” Haoei jongaikei, “Ngo kashou jaishoubou.”

³³Isak sensentham lühko laukei, “Khülonga, aoei kü jungto meishi phe sungbakei? No aloujinei ngei hao ka hian shauan hao haükua. Haü, hao haüko kilabü.”

³⁴Ladang Esauei kho ngüh ditkei, haoei maang pakko aeibou khauko haapbo ngekkei hoba haobou to laukei, “Abou kaibü haülabü ka ongkei labü.”

³⁵Lausikei Isakei laukei, “Kana kokshua louan kaibü haülabü langa.”

³⁶Esauei laukei, “Haoeibü nyen tükde Jakob nyenkei aying lo? Haoei ngo tou hoei nyibou huonda; haoei ngeibü jaishou phejan phetkei langkua, hoba tou chühashi, haoei ngeibü haülabü sunglangkua!” Hobaje haoei phekei, “Kü shanga nyi haülabü che ongkei ajoulet lo?”

³⁷Isakei Esau to jongaiko laukei, “Chühashi, ngei hao bunyu yeitia, hoba jaisina chempen pendou haoeibü sambü la lela hao la kua, hoba nyak si ihei ngei hao haükua. Khülonga ngei ka shanga ai kümla küshou?”

³⁸Esauei haobou to laukei, “Kaibü haülabü che ongkei jouan kialonga küla labü,” dogo ngekko haapbei.

³⁹Haobou Isakei hao to jongaiko laukei, “No kishanga haabü teibü kaonyu si mühkabü nindei akilabü.

⁴⁰No inlouei lang kilabü hoba nyi kana khangenlabü. Lausikei no ladang toplaje kaibü ngüm ka haoeibü kaangkhüh yukthelabü.”

⁴¹Haobouei Jakob haükubü shanga Esauei hao mangsenkei; hoba Esauei haoeibü maangpona laukei, “Kübou mang haaplabü chalou sühdabü kheijinei ngei Jakob haitilabü.”

⁴²Ladang shou jaishouboueibü ngüh kho Rebeka to lenkei, saoei shou nashoubou Jakob ngala hautiko laukei, “Chühashi, kajai Esauei no haitila lamleko hao lolo maang sungaida.

⁴³Hibü küshou, kü ngüha leashi, hoba meimeijung küjai Laban jungto Haran kaodak to satashi.

⁴⁴Hobaje kajai maangsak longbü asem shongko hao yoa longche khüpashi.

⁴⁵Kajai khauang ka asepei shongko hoba nyi hao to jungeibü ama shongko kiteishi. Kho phaia ngei no ngala hautiko khüka no leingailabü. Kasi ham nyetchenei ong kü jungka aila maula?”

⁴⁶Kheijinei Rebekaei Isak to laukei, “Hit sao habü ho tegübü yoa kibüei ngo oanshema. Jakobeikei Hit sao habü yoka, habü kaodak kabü yak ngaalonga ngo lang akibü ong sobou.”