Read Chang Naga KAOBAK 28 Bible Online

KAOBAK 28 - Chang Naga bible

KAOBAK 28

¹Hibü Isakei Jakob ngakei hoba hao haükukei, hoba hao la maangsanglabü ngüh lenko laukei, “Nyi Kanan sao yakla tenga.

²Kanyueibü bou Bethuel chemto Padan Aram to meimeijung hauashi, hoba khünei kanyueibü jai Labaneibü nouyangshou ka müt che leashi.

³Hobaje Pendou Thükenbou Mühghaüei no haükushi, hoba no haatishi, hoba no phangshou phangna bou la ayeishongko ka ka juong yeitishi.

⁴No tou yenla lean kibü kaonyu, laobou kaodak Mühghaüei Abraham la kukei, kho nyi leoulabü lele haoei Abraham la kubü haülabü ka la hoba kaibü thensilen la naku.”

⁵Hobaje Isakei Jakob hautikei, hoba haoei Jakob si Esaueibü nyu Rebekaeibü jai Arambü Bethuel shou Laban jungto Padan Aram to hautikei.

⁶Tou Isakei Jakob haükuan hautia dogo ditkei hoba haoei hao haükujinei, “Nyi Kanan sao shuong yoka yaksa telema,” dogo hao la ngühkhüm kubü,

⁷hoba Jakobei nyusiboueibü ngüha leko Padan Aram to haua dogo Esauei ngeenkei,

⁸hoba Esauei Kanan sao ngabüei Isak maang ühaiko hapbei.

⁹Hibü Esau Ishmael jungto hauan jembü shaangbü yaksi thükto Abraham shou Ishmaeleibü nouyangshou Nebaioteibü na Mahalat yakla ngakei.

¹⁰Hobaje Jakob Beersheba ka meimeijung Haran to haukei.

¹¹Hao kaoen che to loukei, hoba khünei hao langyang sünga thüngkei, aieilausi chanyu nepan kikei. Hobaje haoei khünei kibü laang che sungan haoeibü khuaüla lean khünei yepla lengkei.

¹²Hobaje haoei mangh che likei, hoba chühashi, chung che kaoa jaan chung hotenei khuthük sühko onlangkei; hoba chühashi, khuthük hangangbü khonei ang louyan dogo hapbei.

¹³Hobaje BUNYUBOUei kho thüka loan laukei, “Ngo BUNYUBOU kabou Abraham Mühghaü hoba Isak Mühghaü. No loan kibü kao ho ngei ka la hoba kaibü thensilen la kulabü.

¹⁴Kaibü thensilen kaodak phetsen tegü yeilabü, hoba no chaang, chanep, yungkük, yungthang sühko haajung haulabü. Hobaje no hoba kaibü thensilen danko kaodak mütshuong pendou haükulabü.

¹⁵Hobaje chühashi, ngo ka yoa kia, hoba no laeto ong haulaje ngei püetlabü, hoba no nyibou ho kaodak to leian loungailabü; aieilausi ngei ka la thekubü aküm shongko ngei no üpyolabü.”

¹⁶Ladang Jakob yepbü ka pienkei haoei laukei, “Maimaitham BUNYUBOU ho kaoena kia; hoba ngei ho ange.”

¹⁷Hao hatko kikei, hoba haoei laukei, “Ho latetche hatlabü kaoen ki! Ho lubü aying, Mühghaü chem, ho khuthük bakhün.”

¹⁸Hobaje Jakobei ngeyang enyu pian haoei khuaüla lebü laang kho sungan kekei, hoba kho thüka oliv onang jonkei.

¹⁹Hobaje haoei kho kaoen la Bethel nyenkukei, (lausikei shaangla ho sangnyu nyen Luz nyenan kikei.)

²⁰Hobaje Jakobei thekolanko laukei, “Mühghaü kü yoa kialonga hoba ngo haushanga ngo püetalonga hoba kü la shausiyung kualonga, hoba neila neisimei kualonga,

²¹hoba nyibou kübou chem to sangmaia loungaitia longa, kheijinei BUNYUBOU kü Mühghaü kilabü,

²²hoba ngei phonan kebü laang ho Mühghaü chem yeilabü; hoba nyi kü la kubü pendou ka ngei ka la an phejan kulabü.”