Read Chang Naga KAOBAK 29 Bible Online

KAOBAK 29 - Chang Naga bible

KAOBAK 29

¹Kheijinei Jakob haoeibü wakoua chaang aekabü kaodak to loukei.

²Hobaje haoei chühsi, khünei khongthua deikhün che nyangko san si lon shuong tan sem phetetnyu yepan hapbei, aieilausi kho deikhün ka haoenei sanshuong la dei yungtikei. Hobaje deikhün sembunga laang yaangbünyu kikei.

³Ladang sanshuong pendou takshatlaje haoenei deikhün sembung kabü laang kho kukan sattian san shuong la dei yungtian laang kho nyibou hao phoshang deikhün sembung to ngaitiko lekei.

⁴Jakobei sanlombü shuong to phekei, “Jaisinasi shuong, kan laka loukei?” Haoenei jongaikei, “Kün Haran ka.”

⁵Haoei haoen ka phekei, “Kanei Nahoreibü shou Laban ngekeilao?” Haoenei jongaikei, “Haü, künei hao ngeakei.”

⁶Haoei phekei, “Hao maisho kiakouba lo?” Haoenei jongaikei, “Hao maisho kia, hoba chühashi, haoshou nouyangshou Rachel san yoa hato louada.”

⁷Jakobei haoen to laukei, “Chühashi, tou chakung angombei hoba sanshuong leisheilabü jih mosüh, hibü sanshuong la dei inla hoba lamshaula leian hauashi.”

⁸Kheijinei haoenei laukei, “Sanshuong pendou ayoshai shongko hoba haoenei deikhün sembung ka laang kho khokan üpbu shongko künei athük; khoei kho khokan apan phaia ong künei san la dei inda.”

⁹Haoei haoen to joyoko kitoua Rachel boueibü sansilon shuong leian loukei; aieilausi saoei haoen lombei.

¹⁰Ladang Jakobei haonyueibü jai Labaneibü nouyangshou Rachel hoba hao kou Labaneibü san hapbei, Jakobei nyangko hauan deikhün ka laang khokan apbuan haokou Labaneibü san shuong la dei inkei.

¹¹Hobaje Jakobei Rachel sembung to shepbei, hoba ngüh angko haapbei.

¹²Kheijinei Jakobei Rachel to hao saoeibü bou chempen hoba Rebekaeibü shou dogo lenkei; hoba saoei laangjung hauan bou la lenkei.

¹³Ladang Labanei haonaeibü shou shangabü ngühlang ditkei, haoei hao shuokla laangjung haukei. Haoei hao bamlepan sembung shepbei, hoba haoei hao chem to leiyetkei.

¹⁴Kheijinei Labanei laukei, “Maimai no kü phe hoba kü sii;” hoba lit che mauko hao khünei kikei.

¹⁵Labanei Jakob to laukei, “No chempen yingbü shangakei nyi kü la kong kümbula ayingbü kaibü mu shanga kü la lenbüma.”

¹⁶Tou Labanei nouyangshou müt nyi kikei; noushounyueibü nyen Lea hoba nashounyueibü nyen Rachel.

¹⁷Lea nyeka hau aki, lausikei Rachel saomaibü hoba süngsilop maibü che kikei.

¹⁸Jakobei Rachel sanoukei; hoba haoei laukei, “Ngei kashou nashounyu Rachel shanga po nyet khangenkho.”

¹⁹Hobaje Labanei jongaiko laukei, “Ngei lubü müt la kubü khantoje ka la kubü maibou; kü yoa kishi.”

²⁰Jakobei Rachel shanga po nyet khangenkei; lausikei kho chalou shisho tegü ong dambei; aishanga haoei sao sanoukei.

²¹Jakobei Laban to laukei, “Kü yak kü la labü, chalou pena.”

²²Hibü Labanei khünei kibü pendou ngashaian lem okkei.

²³Lausikei nangnak haoei haoeibü nouyangnyu Lea hao jungto leibakei; hoba hao sao jungto atkei.

²⁴Hobaje Labanei haoshou nouyangnyu Lea la saoeibü samnyu lela haoeibü samnyu Zilpa kukei.

²⁵Hobaje ngeyang chühsi kho Lea kiteikei. Hibü haoei Laban to laukei, “Nyi kü to jungeibü ho ai? Ngei Rachel shanga no khangenkei ayingsi? Aila nyi ngo khüpettikei?”

²⁶Labanei jongaikei, “Kün kaodaka noushounyu to shaang nashounyu akuda.

²⁷Ho yaksa leiyetbü bale pentishi, hoba künei lubü sao khokei kukho; laobou shanga toukei nyi kü yoa po nyet khangenlabü.”

²⁸Hobaje Jakobei khei kümbei. Haoei Lea yoa kho bale pentikei hoba Labanei hao la haoshou Rachel yakla kukei.

²⁹(Hobaje Labanei haoshou Rachel la samnyu la lela haoeibü samnyu Bilha kukei.)

³⁰Jakobei Rachel to jambei hoba haoei Lea toje Rachel aei sanoukei. Hobaje haoei toukei po nyet Laban khangenkei.

³¹Ladang Lea to asanouda dogo BUNYUBOUei hapbei, sao la nasetshang ipbukei; lausikei Rachel angkong kikei.

³²Hobaje Lea mangakongko apbei hoba saoei bousushou che bukkei, hoba saoei hao nyen Reuben nyenkukei; aishanga saoei laukei, “BUNYUBOUei ngo khonsaka chühkei; touje külaoei kü to sanoulabü.”

³³Sao nyiboukei mangakongko apbei, hoba saoei laukei, “Aiyeilausi ngo asanouda dogo BUNYUBOUei ditkei, khoei haoei kü la ho jayangshoukei kukei.” Hobaje saoei hao nyen Simeon nyenkei.

³⁴Sao toukei mangakongko apan bousushou che bukkei, hoba laukei, “Touje kü laoei kü to maangshiklabü, aieilausi ngei hao la bousushou sem bukkua.” Khoei hao la Levi nyenkukei.

³⁵Toukei sao mangakongko apan bousushou che bukkei; hoba saoei laukei, “Touje ngei BUNYUBOU nyen sangkho.” Hibü saoei hao la Juda nyenkukei. Kho phaia sao nabuk thonkei.