Read Chang Naga KAOBAK 3 Bible Online

KAOBAK 3 - Chang Naga bible

KAOBAK 3

¹Tou BUNYUBOU Mühghaei kümbü meisiau pendou yo ka pinyu kho aei khüpbülangbü kikei. Haoei yaksanyu to laukei, “Tükde Mühghaüei ka to bamanga kibü buhek den che ka ongkei teshau laukei sai?”

²Yaksanyuei pinyu to jongaiko laukei, “Bamang kabü buhek pendou shaula thükkei,

³lausikei laobou bamang jenyua ki, kho buhek ka teshau hoba temeiti khei ayinglonga kan hailabü,” dogo Mühghaüei laukei.

⁴Lausikei pinyuei yaksanyu to jongaiko laukei, “Maimaitham kan ühailabü.

⁵Aieilausi ladang kanei ho shaulaje kheijineitham kan nyek iplabü hoba kan Mühghaü tegü maibü amaibü ngeko yeilabü, dogo Mühghaüei ngekei.”

⁶Ladang yaksanyuei bunyu kabü buhek kho shaula maibü hoba nyekto loubü hoba songsihon hapla dühlabü che dogo hapbei, saoei kheian shaukei hoba saoei laolakei kukei hoba haoei shaukei.

⁷Kheijinei haosi ham nyek ipbei, hoba haosi mütkong dogo ngean apbei; hoba haosiei bhukyik shiyoan haosieibü mang küplepbei.

⁸Kheijinei BUNYUBOU Mühghaü chaloua yemphanga bamanga paibü langh haosiei ditkei hoba haosi BUNYUBOU Mühghaü thedang ka bamanga kibü buphanga hukei.

⁹Lausikei BUNYUBOU Mühghaüei Adam ngako laukei, “No lanei k?”

¹⁰Haoei jongaikei, “Ngei bamanga kaibü ngüh ditan ngo mütkong yingbüei hatko hukei.”

¹¹Hobaje haoei laukei, “No mütkong dogo ka to aoei lenkei? Ngei ka to teshau dogo laubü buhek kho ka nyi shaukei sai?”

¹²Kheijinei müt khoei laukei, “Laobou yaksa nyi kü yoa kila kukei, saoei kho buhek kü la kukei hoba ngei shaukei.”

¹³Kheijinei BUNYUBOU Mühghaüei yaksanyu to laukei, “Nyi ho ai kümbei?” Yaksanyuei laukei, “Pinyuei ngo khüpettikei hoba ngei shaukei.”

¹⁴Kheijinei BUNYUBOU Mühghaüei pinyu to laukei, “Nyi hai kümabü langkeibü meisiau pendou hoba yangsikok pendou to no shedsikhau yinglabü; shimungei no shanlabü hoba kaibü langkei salang sünga thamngu shaulabü.

¹⁵Hobaje ngei no si yaksanyu kanglanga hoba kaibü lilabü si saoeibü lilabü kanglanga dangbou phokulabü; haoei kaibü khu naknyinkulabü hoba nyi haoeibü youdema püplabü.”

¹⁶Haoei yaksanyu to laukei, “Ngei no na shia künbü onat aei yeitilabü; hoba no na hapbü onat aei yeitilabü; khei yingasikei no kaibü lao to dühbü kilabü, hoba haoei ka thüka songdaklabü.”

¹⁷Hobaje Adam to haoei laukei, “Ngei teshau laubü bunyu laobou ka nyi ka yakeibü ngüha leko shaukei ka hangshong kaonyua shedsikhau bauda. Kaibü salang sünga khünei hüanmangan shausiyung haplabü.

¹⁸ka la sang si jak angbü yemtikulabü, hoba nyi khübü yamkabü pikshik shaulabü.

¹⁹No kao la ayeingai shongko jembü thenyek ka lem longan ong shausiyung haplabü; aieilausi no kao ka sungenkei hoba no kao ki, hoba nyibou no kao la yeilabü.”

²⁰Adamei haoyak la Ev nyenkukei, aieilausi sao khunakshousi pendoueibü nyu ki.

²¹BUNYUBOU Mühghaüei Adam si haoyak la phekhonei mangyuk shian yukkukei.

²²BUNYUBOU Mühghaüei laukei, “Chühashi, müt kho sen tegü maibü amaibü ngeko yeia; haoei tou ik shingan langkeibü buhek ka kheian shauko ponpen langkei akitilabü.”

²³Hibü BUNYUBOU Mühghaüei laobou kao ka hao sungenkei, kho thutila shanga hao Eden bamang ka sattikei.

²⁴Kho tegü haoei müt kho shian sattikei; hoba langkeibü bunyu lomla Eden bamang chaangbou aenei kaakyembü kherabim hoba pendou ae sepeibü jajalalabü inlou che phokei.