Read Chang Naga KAOBAK 30 Bible Online

KAOBAK 30 - Chang Naga bible

KAOBAK 30

¹Ladang Rachelei Jakob la shou che ongkei abukkuda dogo saoei hapbei, Rachelei nou to nyekto shatkei, hoba saoei Jakob to laukei, “Kü la shou labü, khei ayinglonga ngo hailabü.”

²Hobaje Jakob Rachel khulimbo maangpokkei, hoba laukei, “Na hekshang ka ka senetbü Mühghaü jeiko ngo ki sai?”

³Kheijinei saoei laukei, “Ngeibü sambü sao Bilha hanei kia, saoei kü la shou bukkulabü lele sao to jamashi hoba kho danko ngeikei chemdang huonglabü.”

⁴Hobaje saoei sambü sao Bilha yakla lela hao la kukei hoba Jakob sao to jambei.

⁵Hobaje Bilha mangakongko apbei hoba Jakob la bousushou che bukkukei.

⁶Rachelei laukei, “Mühghaüei kümat maitikei hoba subüjabü ditan kü la bousushou che kukei;” khoei saoei hao la Dan nyenkukei.

⁷Rachel samnyu Bilha nyibou mangakongko apbei hoba Jakob la nyiboula bousushou che bukkukei.

⁸Rachelei laukei, “Ngo kü nou to maiko longyoan ngei künou thükkei.” Hobaje saoei hao la Naftali nyenkukei.

⁹Ladang Leaei sao nabuk thonbü ngekei, saoei saoeibü samnyu Zilpa leijung louan yakla lela Jakob la kukei.

¹⁰Hobaje Leaeibü samnyu Zilpaei Jakob la bousushou che bukkukei.

¹¹Leaei laukei, “Thu maisepa!” Hibü saoei hao la Gad nyenkukei.

¹²Leaeibü sambüsao Zilpaei nyiboubü bousushou bukkukei.

¹³Kheijinei Leaei laukei, “Ngo latetche olinda! Saoshuongei kü to haünyu, dogo ngalabü.” Hibü saoei hao la Asher nyenkukei.

¹⁴Whet youshou latbü jiha, Reuben sek to koukei, hoba haoei seka moliqhe hapan haonyu Lea jungto sungbakei. Rachelei Lea to laukei, “Kashoueibü moliqhe ka kü la shisho labü dogo sudajada.”

¹⁵Lausikei Leaei sao to laukei, “Nyi külao sobü kho hanbümanbü sai? Nyi Küshoueibü moliqhekei langkulep lo?” Hobaje Rachelei laukei, “Khülonga kashoueibü moliqhe shanga tao hao ka yoa yepla thükkei.”

¹⁶Ladang Jakob chasem sek ka lungkei, Lea hao shuokla hauan laukei, “No kü junga yepjan; aishanga ngei no küshoueibü moliqheei jektheda.” Hibü khüyou hao sao yoa yepbei.

¹⁷Mühghaüei Lea to ditkukei hoba sao mangakongko apan saoei Jakob la shou ngaoboubü bukkukei.

¹⁸Hobaje Leaei laukei, “Mühghaüei kü la mu kua, aishanga ngei külao la ngeibü samnyu kukei.” Hibü saoei hao nyen Issakar nyenkukei.

¹⁹Lea toukei mangakongko apan, Jakob la bousushou lakboubü bukkukei.

²⁰Kheijinei Leaei laukei, “Mühghaüei kü la namsek mu maibü kua; touje külaoei ngo sungletlabü, aishanga ngei hao la bousushou lak bukkukei.” Hibü saoei hao la Zebulun nyenkukei.

²¹Kho phaia saoei yaksa shou che bukkei hoba sao la Dina nyenkukei.

²²Kheijinei Mühghaüei Rachel damenkei; hoba sao la ditkukei hoba saoeibü na setshang ipbukei.

²³Sao mangakongko apan bousu shou che bukkei, hoba saoei laukei, “Mühghaüei ngeibü himou langkua.”

²⁴Hobaje saoei hao la Josef nyenkukei, hoba laukei, “BUNYUBOUei kü la toukei bousushou che kubüma.”

²⁵Rachelei Josef bukan phaia Jakobei Laban to laukei, “Ngo ngeibü kishang hoba jembü kaodak to hautikai.

²⁶Kü la yaksi shuong hoba kü shousi aoyou shanga ngei no khangenkei haoen labü, hoba ngo hautikai. Ngei no latetche khangenkei kho nyi ngeakei.”

²⁷Lausikei Labanei hao to laukei, “Ngo ong ka nyek to loualonga, haiteishi, aishanga BUNYUBOUei ka shanga ngo haükukei dogo ngei thuseia ngea.”

²⁸Haoei toukei laukei, “Kaibü mu lenbü, hoba kho ngei ka la kukho.”

²⁹Jakobei hao to laukei, “Ngei no lai khangenkei, hoba kaibü samkeisamuk lai pangtei thounoukei kho nyi no lolo ngeakei.

³⁰Ngo aloujinei nyi shisho ong kibü juong haa; hoba ngo haushang pendoua BUNYUBOUei no aeibou haükua. Lausikei kü chemdang shanga ladang kümla?”

³¹Labanei laukei, “Ngei ka la ai kula?” Jakobei jongaikei, “Nyi kü la ai teku; nyi kü shanga maang angalonga ngei nyibou kaibü san shuong lombukho:

³²Ngo tat kaibü sanshuong pendou danjung haukho, hoba panpan lanlanbü si kapnakbü pendou, hoba san yo ka nakhübü pendou hoba lon yoka kapnakbü pendou janyinkho hoba kho ngeibü mu kilabü.

³³Hibü loulabü jiha nyi ladang ngeibü mu shanga damanchühlaje ngühmaanglanbü chongchinglabü. Lon yoa laobou ong apanbü hoba kap anakbü kü shangabüa yoan kilaje, hoba san yoa anakhübü yoan kilaje khoje kokbü dogo weshi.”

³⁴Labanei jongaikei, “Hoat, kho tegü kümshi.”

³⁵Hobaje khünyet Labanei lon paang shangshang langlangbü hoba kapnakbü hoba lon nyu jakjak laklakbü hoba kapnakbü pendou, ainei thupaibü kikei, hoba san yoa nakhübü pendou, haoei janyinan jembü shou ikto kukei.

³⁶Hobaje hao si Jakob kanglanga semnyet lam kaangtikei. Jakobei Labaneibü joubü shatsinam pangteikei.

³⁷Jakobei poplar bulong, almond bulong, hoba plane bulong ka bhek wapan sungan kho ka khop aangan apan phodonga thupaibü longtian panpanlanlan kümbei.

³⁸Kheijinei haoei khop aangan apbü phodong kho dei dangshang, laonei sanshuongei dei yungla louda, khünei sanshuong thedangatham phokukei. Hobaje ladang ong nakjih sühkei hoba dei yungla loukei,

³⁹haoenei phodong thedanga nakkei hoba shoushou thüngkei. Hobaje haoenei shoushou shatjinei panpan lanlan ayingsi dolosüngsüng ayingsi kap nakan shatkukei.

⁴⁰Hobaje shoushou kho Jakobei lulu bangnyinkei hoba sanshuongeibü thenyek Labaneibü sanshuonga kibü panpan lanlanbü hoba nakhübü kibü aei sepeian phokukei. Kho tegü haoei haoeibü sanshuong lulu phokei hoba Labaneibü sanshuong yoa apho.

⁴¹Ladang ong shuong yoa sekokbü shuong laangeida kheijinei Jakobei phodong kho dei yungshanga toktian phokukei;

⁴²lausikei sanshuong nyibutham kialonga haoei kho toktian aphoku. Hibü hau akibü kho Labaneibü hoba hau kibü kho Jakobeibü yeikei.

⁴³Kho tegü müt kho aeibou haakei, hoba haoeibü sanshuong juong hoba bousu si yaksa sambü hoba ut si gadu kikei.