Read Chang Naga KAOBAK 31 Bible Online

KAOBAK 31 - Chang Naga bible

KAOBAK 31

¹Hobaje Labaneibü shousi shuongei, “Jakobei seneibü boueibü ajanjan pendou langa hoba seneibü bou kibü danko haoei habü nyaksinam pendou hapbei,” dogo lenyoko Jakobei ditkei.

²Hobaje Jakobei Laban to chühsi hao shangiedbü thechüh tegü ayingko hapbei.

³Hobaje BUNYUBOUei Jakob to laukei, “Kabou habü kaodak to hoba ka chempen jungto sepeijung ngaiashi, hoba ngo ka yoa kilabü.”

⁴Hibü Jakobei haoeibü sanshuong kishang khongthu to Rachel si Lea ngaan sungkei.

⁵Hobaje haoei haosi to laukei, “Ngei kaboueibü thenyek shaanglabü thenyek tegü ayingko hapda; lausikei küboueibü Mühghaü küyoa kia.

⁶Hobaje ngei ngeibü hau pendouei kabou khangenkei dogo kanei kan lulu ngeakei.

⁷Lausikei kaneibü bouei ngo khüpettikei, hoba ngeibü mu annepenko jeileikukei. Khei yingasikei Mühghaüei haoei küto amaibü kümbü ka senetkei.

⁸‘Kapnakbü kaibü mu yinglabü,’ dogo ladang laulaje kheijinei sanlon pendouei kapnakbü shat; hoba ‘Panpan lanlanbü kaibü mu yinglabü,’ dogo haoei laualonga kheijinei san shuong pendouei panpan lanlanbü ong shatkei.

⁹Hibü Mühghaüei kaneibü boueibü sanshuong sungan kü la kukei.

¹⁰“Sanlon laangeibü jihsiphaia mangha ngei chühsi lon paang panpanlanlan, kapnakbü cheei laangeiko hapbei.

¹¹Mangha Mühghaü khuthük hangangbüei kü to laukei, ‘Jakob,’ hoba ngei laukei, ‘Ngo hanei kia.’

¹²Hobaje haoei laukei, ‘Kaibü nyekei chühashi, hoba chühko kisi laangeibü lon paang pendou kho panpan lanlanbü, hoba kapnakbü hoba jakjaklaklakbü kikei, aishanga ngei Labanei kato jungeibü pendou hapa.

¹³Ngo Bethel Mühghaü, laonei nyi laanga onang nangkukei, hoba kü to theletlanletbü che lekei. Toutham ho kaodak apyoashi hoba no bukbü kaodak to ngaiashi.’ ”

¹⁴Kheijinei Rachel si Lea hamei jongaiko laukei, “Kübou chema kün phejan ayingsi onat denche kilao?

¹⁵Haoei kün yenbou hima jungeida aying lo? Aishanga haoei kün yaakkei, hoba kün shangabü namkei haoei shauan apbua.

¹⁶Mühghaüei abou ka langbü nyaksinam kho seneibü hoba sen shousi shuong shangabü; hibü Mühghaüei ai ong kato lenkei kho jungeiashi.”

¹⁷Kheijinei Jakobei haoeibü shousi yaksi shuong pendou ut thüka settikei.

¹⁸Hobaje haoei, haoei Padan Arama thansheibü shatsinam si nyaksinam pendou haobou Isak jungto Kanan kaodak to haula shanga thedangto hauteitikei.

¹⁹Laban haoeibü san wi kipla hautoua Rachelei boueibü chemdang heangsho kokkei.

²⁰Jakobei Arambü Laban la alenko huonan kokshoua satkukei.

²¹Hobaje hao haoei kibü pendou thonan satkei, hoba hao meimeijung Eufrates shumang kho danjung haukei; hoba haoei Gilead shongh ae haoeibü thenyek sepeikei.

²²Sembounyet Laban to Jakob kokshoua sada dogo lenkei.

²³Hobaje haoei haoeibü jaisinasi hao yoa leian, haoei chalou nyetnyet lam to shijung hauan haoei Jakob Gilead shongha laphetkei.

²⁴Hobaje Mühghaüei Arambü Laban jungto nangnak mangha longan hao to laukei, “Nyi Jakob to maibü yingasikei amaibü yingasikei aikei akümla no lolo maangsangashi.”

²⁵Jakobei shongha haoeibü neichem dangan kijinei Labanei laphetkei; hoba Laban yoa haoeibü jaisinasi shuongei Gilead shongha neichem dangkei.

²⁶Kheijinei Labanei Jakob to laukei, “Ngei angeko nyi huphanga ngeibü nouyangshousi shuong, wapyoa langsenbü hima langbü kho nyi ai kümbei?

²⁷Ailaibü ka nyi küka hukoshepbo satkei? Tegüje ngei lemlemtham hoba langh langhko no hangan hautikhoulabü, nyi aila küla alen?

²⁸Ailaibü nyi küla küshisi hoba nouyangshousi shuong to sembung ashepti? Nyi ngoualoua küma.

²⁹Kato amaiko jungeila küto hau kia, lausikei kabou Mühghaüei miou küto joyoko lenkei, ‘Nyi Jakob to maibü yingasikei amaibü yingasikei aikei ajoyola maangsangashi.’

³⁰Tou nyi kabou chem waangko no ngaila khambeilonga, aila nyi ngeibü mühghaü shuong kokkei?”

³¹Hobaje Jakobei Laban to jongaiko laukei, “Aieilausi nyi kaibü nouyangshou nyi küka sungngailep yingkao dogo hatkei.

³²Lausikei aoyoa nyi kaibü mühghaü shuong haplaje, hao langkei akilabü. Hobaje kün chemdanga kü yoa kaibü ai ki nyi lolo shean lenshi hoba hapoualonga kho nyi leshi.” Tou Rachelei kho kokkei dogo Jakobei ange.

³³Hibü Laban Jakobeibü neichem hoba Leaeibü neichem hoba samnyu nyieibü neichem to atkei, lausikei haoei khübü kho ühüp. Hao Leaeibü neichem ka longan Racheleibü neichem to atkei.

³⁴Tou Rachelei chemdang heangsho kho sungan ut setshanga jinkei, hoba khübü thüka setkei. Labanei neichem pendou aeto sepeisaiko chühsikei ühüp.

³⁵Hobaje saoei bou to laukei, “Ngo ka thedanga lola amaibü küto temangpokma; aishanga yaksa haangei küto sühakei.” Kho tegü haoei lambei lausikei chemdang heangsho kho ühüp.

³⁶Kheijinei Jakob khauangkei, hoba laukei, “Ngeibü shedbü ai? Nyi ngo hainyu khausakko shieilabü lele ngeibü shabü ai?

³⁷Nyi ngeibü peisilei pendou to peman chühsikei nyi kaibü chembabü peisilei pendou ka ai hapbei? Kho haoei ngeibü jaisinasi shuong si kaibü jaisinasi shuong thedanga phoashi, hoba haoenei seti kanglanga mat najema.

³⁸“Ngo ka yoa po saoche kikei. Kaibü sanlon pi hoba lon piei jembü shou aleilu, ayingsi kaibü sanshuong ka sanlon paang yoka ngei ashau.

³⁹Laobou yamyangei taketnyu shaukei kho kajungto asungba; ngei lolo shembei. Chaloua kokbü yingsikei nangnak kokbü yingasikei kho nyi kü la shemtikei.

⁴⁰Küthu hainyu kikei: Chaloua ngo aubüei hoba nangnak khamei khonkukei, hoba ngo nyeket alou.

⁴¹Ngo ka chemdanga po saoche kikei. Ngei kashou nouyangnyi shanga po anthüklei hoba kaibü sanshuong shanga po lak dogo kümbeileikei, khei yingankei nyi ngeibü mu annepenko jeileikei.

⁴²Kübou Mühghaü, Abraham Mühghaü, hoba Isakei Souhatbü kü yoa aki tegüje, maimaitham nyi ngo toukei mütkong sattian kikhoulabü. Ngo khonsakbü hoba ikküm iklei Mühghaüei hapbei, hoba haoei miou kato lenkei.”

⁴³Labanei Jakob to jongaiko laukei, “Sao nyi ho ngeibü nouyangshou hoba shousi shuong khokei ngeibü hoba sanshuong hokei ngeibü. Nyi hapbü pendou kho ngeibü. Lankei tat chaloua ngei ngeibü nouyangnyi hoba sao nyiei bukbü shousi shuong shanga ai kümla?

⁴⁴Hibü kaiya, senei ngüh linyokho; ngo hoba no, hoba seti kanglanga ho aukabü kishi.”

⁴⁵Hibü Jakobei laang che sungjung louan, kho laangthaonyu shanga kean phokei.

⁴⁶Hobaje Jakobei haoeibü jaisina to laukei, “Laang yoshaiashi.” Hibü haoenei laang yoshaikei hoba laangshang kümbei; hoba haoen laangshang nyangko shaukei yungkei.

⁴⁷Hobaje Labanei hoto Jegar Sahadutha dogo laukei, lausikei Jakobei hoto Galeed dogo laukei.

⁴⁸Hobaje Labanei laukei, “Laangshang ho tat seti kanglanga aukabü ki.” Khoei hoeibü nyen Galeed dogo laukei.

⁴⁹Hobaje laangthaonyu to Mizpa dogo laukei, aishanga haoei laukei, “BUNYUBOUei seti bangan kijinei lombo kishima.

⁵⁰Nyi ngeibü nouyangnyu nyi khonsaktia longa ayingsi ngeibü nouyangnyu nyi khulimbo lubü yaksa ngaalonga, sen yoa müt ao akisi dogokei seti kanglanga Mühghaü aukabü kia.”

⁵¹Labanei toukei Jakob to laukei, “Ho laangshang to chühashi, hoba laangthaonyu to chühshi, laobou seti kanglanga ngei phokukei.

⁵²Laangshang ho aukabü yingshi hoba laangthaonyu ho aukabü yingshi; khei amaibü kümla shanga ngo ho laangshang danko kajungto aloulabü, hoba nokei ho laangshang hoba laangthaunyu danko kü jungto amaibü kümla aloulabü.

⁵³Abraham Mühghaü, Nahor Mühghaü, hoba haoeneibü bou Mühghaüei seti kanglanga matjemshi.” Hibü Jakobei haobou Isak to Souhatbü nyena thekeilankei.

⁵⁴Jakobei shongha juokbülembü kukei hoba haoei hao chempen shuong oknyinla ngakei. Haoenei shauan yungan langyang sünga shongha khüpbei.

⁵⁵Hobaje nyibounyet ngeyang enyu Labanei shisi shuong hoba haoeibü nouyangshou nyi to sembung shepbo haükukei; hoba khüka hao kishang to ngaikei.