Read Chang Naga KAOBAK 32 Bible Online

KAOBAK 32 - Chang Naga bible

KAOBAK 32

¹Jakob jembü lama haukei, hoba Mühghaü hangangbü hao to haüyokei.

²Ladang Jakobei haoen hapbei, haoei laukei, “Ho Mühghaü lakjaibü shuong kishang!” Hibü haoei kho kaonyek la Mahanaim nyenkukei.

³Jakobei hao to shaang jai jungto Edom kaonyeka Seir kao to youkobü hautikei.

⁴Haoei haoen la sakkuko laukei, “Kanei ngeibü bunyubou Esau to hai laushi, ‘Kaibü sambü Jakobei hai lauda, Ngo Laban yoa tou sühko thüngan kikei.

⁵Ngei masu, gadu, sanlon, lonmai shuong, sambü hoba samnyu, dogo kia. Tou ngei ngeibü bunyubou to lenla hautikei, khei ngei ka thedanga onou haplabü lele.’ ”

⁶Ladang youkobü shuong Jakob jungto nopjung longeikei haoenei laukei, “Kün kajai Esau jungto haüyola haukei, hoba hao kato haüyola müt saongao lei yoan louada.”

⁷Jakob aeibou mokkei hoba maangmaukei. Hobaje haoei hao yoa kibü müt, san shuong, masu shuong, hoba ut shuong tan nyila jankei.

⁸Haoei dambei, “Esauei louan shuong che shemtialonga kheijinei joubü shuong che kho satenlabü.”

⁹Kheijinei Jakobei hai welaukei, “O kübou Abraham Mühghaü, hoba kübou Isak Mühghaü, O BUNYUBOU, aoei küto laukei, ‘Kaibü kaodak to hoba ka chempen jungto sepeiashi, hoba ngei kato mailabü,’

¹⁰nyi kaibü sambü to onou hoba ngühmai lenbü pendou yoka kü shanga hanbüshou ongkei amu; aishanga ngei ngeibü juloei ho Jordan danjung haukei, hoba ngo touje tan nyila yeia.

¹¹Küjai Esau ik ka ngo püetashi, aishanga ngo hatda; aingenyu haoei ngo hoba kü yokabü nashou yaksa pendou shemtilabü.

¹²Lausikei nyi laua, ‘Maimaitham ngei no naang maitilabü hoba kaibü thensilen yungnyu phetsen tegü wesikei awekhümbo juongnyu haatikulabü.’ ”

¹³Khüyou langyang khünei dantikei hoba haoei kibü ka haojai Esau la jongsakla hai janletkukei:

¹⁴lonnyu saoan hoba lonpaang saoche,

¹⁵shoushou thonan ut nyunyu khujin, masu pi saonyi hoba pongsu an, hoba gadu nyunyu saoche hoba paang an.

¹⁶Haoei khübü kho sambü shuong ika tan weko lulu kukei; hoba haoei haoeibü sambü shuong to laukei, “Kü thedang to hauashi, hoba tan tan kanglanga tuibang kaangan phoshi.”

¹⁷Haoei shaangbou to sakkuko laukei, “Ladang küjai Esauei kato haüyoan, ‘No aoeibü? hoba no lato hauda? hoba ka thedanga kibü habü ho aoeibü?’ dogo phelaje,

¹⁸kheijinei nyi hai jongaiashi, ‘Habü ho kaibü sambü Jakobeibü. Habü ho ngeibü bunyu Esau la küntibü jongsak ki; hoba haokei kün phainei louada.’ ”

¹⁹Haoei nyiboubü to hoba semboubü to hoba shatsinam tan leibü pendou to lenkei, “Kanei Esau to haüyojinei hao to jeteibü ngüh lenshi.

²⁰Tokei hai lenshi, ‘Chühashi, kaibü sambü Jakob kün phainei louada.’ ” Aieilausi haoei dambei, “Ngei kü thedanga hautibü jongsakei hao khauang sotilabü hoba kho phaia ngei haoeibü the haplabü; aingenyu haoei ngo sungletlabü yinglabü.”

²¹Hibü jongsak kho hao thedangto hautikei hoba haoje khüyou shuong yoa kikei.

²²Khüyou Jakob meimeijung yaknyi hoba samnyunyi hoba haoeibü shousi müt anthükche leian Jabbok Shumang danjung haukei.

²³Hobaje haoei haoen shumang danjung hautian phaia haoei kibü pendou jungan hautikei.

²⁴Hobaje Jakob hao mütpem apyokei; hoba ngeyang langesaoko müt che to khuyokei.

²⁵Ladang müt khoei Jakob athüketko apbei haoei Jakobeibü ilo khengokkukei.

²⁶Kheijinei müt khoei laukei, “Ngo litikai, aishanga langesaoa.” Jakobei laukei, “Nyi ngo ühaütiku shongko ngei no alitilabü.”

²⁷Müt khoei hao to phekei, “Kaibü nyen ao?” Haoei laukei, “Jakob.”

²⁸Haoei laukei, “Tou ka jaüan kaibü nyen Jakob anyenlabü, lausikei Israel dogo nyenlabü; aishanga nyi Mühghaü si müt to longyokei hoba thükkei.”

²⁹Jakobei laukei, “Sanoudambo küla kaibü nyen lenbü.” Hobaje haoei laukei, “Nyi ngeibü nyen aila pheda?” Khünei haoei Jakob haükukei.

³⁰Hibü Jakobei ho kaonyek la Peniel nyenkukei, aishanga haoei laukei, “Ngei Mühghaü theshuok hapbei, khei yingasikei ngo lang kia.”

³¹Hobaje hao Peniel danjung haujinei chanyu hao junga longkei, hoba hao youshi loei soke ombo ombo paikei.

³²Khoei tat sühko Israel shousi shuongei youshi bempou phejak ashauda; aishanga haoei Jakobeibü youshi ilo youshi bempou phejaka meitikei.