Read Chang Naga KAOBAK 35 Bible Online

KAOBAK 35 - Chang Naga bible

KAOBAK 35

¹Kheijinei Mühghaüei Jakob to laukei, “Bethel to angan khünei kiashi, hoba kajai Esau jungka no satkujinei ka jungto longbü Mühghaü la lemshang che yaükuashi.”

²Hibü Jakobei haoeibü chempen hoba hao yoa kibü pendou to laukei, “Kan yoa kibü küksithang mühghaü apashi hoba kan lolo saüenashi, hoba kaneibü neisimei jeiashi.

³Sen meimeijung Bethel to angkho; hoba ngo khonsakbü chaloua küto jongaibou hoba ngo haubü lama kü yoa kibou Mühghaü shanga ngei khünei lemshang che yaükho.”

⁴Hibü haoenei Jakob la haoeneibü ika kibü küksithang mühghaü pendou hoba haoeneibü noua jibü chimen kukei; hoba Jakobei khübü Shekhem nyangko kibü yembu chungthema khünkei.

⁵Ladang Jakob meimeikei, sangnyu pendou thükto hatbümokbü longkei, khoei haoenei Jakobeibü shousi shuong phaito ashi.

⁶Kho khei Jakob hoba hao yoa kibü mütshuong pendou Kanana kibü Luz (kho Bethel) to hao hoba hao yoa kibü müt pendou loukei.

⁷Haoei khünei lemshang che yaüan khoto ElBethel dogo laukei, aishanga hao haojai jungka satjung haujinei khünei Mühghaü hao jungto tangkhitkei.

⁸Hobaje Rebekaeibü thuinyu Debora haikei, hoba sao Bethel phanga kibü yembulong phanga khünkei. Hibü kho Alon Bakuth nyenkei.

⁹Jakob Padan Aram ka longeian phaia, Mühghaü nyibou Jakob jungto longkei, hoba hao haükukei.

¹⁰Hobaje Mühghaüei hao to laukei, “Kaibü nyen Jakob; tou ka jaüan kaibü nyen Jakob anyenlabü, lausikei kaibü nyen Israel dogo nyenlabü.” Hibü Mühghaüei haoeibü nyen Israel dogo nyenkukei.

¹¹Hobaje Mühghaüei hao to laukei, “Ngo pendou Thükenbou Mühghaü; bukko haako juong haashi, phang che hoba phangshuong che kilabü, hoba choba shuong kaka longlabü.

¹²Ngei Abraham hoba Isak la kubü kao kho ngei kala kulabü, hoba kaphainei kaibü thensilen lakei kho kao kulabü.”

¹³Kheijinei Mühghaüei hao to joyoshang ka angan apbei.

¹⁴Jakobei hao to joyoshang khünei laang che phonan kekei, hoba kho thüka lembü yunglabü jonkei, hoba khünei onangkei jonkei.

¹⁵Jakobei Mühghaüei hao to joyoshang kaoen khoto Bethel dogo laukei.

¹⁶Kheijinei haoen Bethel ka kukkei, hoba Efrat sühla toukei longche kian Rachel na hapla shat longko aeibou khonkukei.

¹⁷Hobaje nabuk shat longko kijinei nabuk thuinyuei sao to laukei, “Tehütma, aieilausi tou nyi bousushou che buklabü.”

¹⁸Lausikei sao haila thonbü hak hinda yingsije saoei shou la BenOni nyenkukei. Lausikei haobouei hao la Benjamin nyenkukei.

¹⁹Hibü Rachel haikei hoba Efrat (kho Bethlehem) lama sao khünkei.

²⁰Jakobei saoeibü hee thüka laang che kekei, kho tat sühko Racheleibü hee laangkee dogo kia.

²¹Hobaje Israel meimeijung haukei, hoba haoeneibü neichem Eder laangshong danan dangkei.

²²Israel kho kaodaka kijinei, Reubenei hauan haoboueibü thangnyu to yepbei, hoba Israelei ho shangabü ditkei. Israelei shousi anthüknyi kikei.

²³Leaeibü shousi shuong ho: Jakobeibü shou jaishoubou Reuben hoba Simeon, Levi, Jehuda, Issakar hoba Zebulun.

²⁴Racheleibü shousi: Josef hoba Benjamin.

²⁵Racheleibü samnyu Bilhaeibü shousi: Dan hoba Naftali;

²⁶hoba Lea samnyu Zilpaeibü shousi: Gad hoba Asher, habü ho Jakob shousi aoyou Padan Aram kaoa hao la bukkukei.

²⁷Jakobeibü bou Isak jungto Mamre, Kiriath-Arba (kho Hebron) to loukei, laonei Abraham si Isak kikei.

²⁸Hobaje Isak langkei salang po saongaoto saolei kikei.

²⁹Kheijinei hao thonbü hak hinan haikei, hoba hao jembü mütli yoa yokei, hoba haoshou Esau si Jakobei hao khünkei.