Read Chang Naga KAOBAK 37 Bible Online

KAOBAK 37 - Chang Naga bible

KAOBAK 37

¹Jakob Kanan kaodaka haobou kishanga kikei.

²Ho Jakobeibü chemdang ngühli. Josef po anthüknyet heshou, hoba hao haobou Jakobeibü yak Bilha si Zilpa shuousi shuong, hao jaisishuong yoa san lombo kikei; hoba Josefei jaisi shuongei kümsilei amaibü kümbü ngühlang haobou jungto sungbakei.

³Tou Israelei hao shousi shuong pendou to aeila Josef to sanoukei; aishanga hao hao la baushilamto bukkukei; hoba haoei hao la son juong kakbü nei lamlekukei.

⁴Ladang hao jaisi shuongei haoeneibü bouei pendou yoka hao to aei sanouda dogo chühenkei, haoenei hao to mangsenkei hoba hao to sanou ngüh alau.

⁵Youche, Josefei mangh che likei, hoba haoei kho haoen la lenkei; khoei haoenei hao aei ong mangsenkei.

⁶Haoei haoen to laukei, “Lo, ngeibü mangh lenkho ditashi.

⁷Sen pendou liko seka youshou thepjinei, chühashi, ngei thepbü youshang kho lokei, hoba chühsi, kaneibü youthep shuong kaijembo loukei hoba ngeibü youthep to khüpetan lembei.”

⁸Hao jaisi shuongei hao to laukei, “Khülonga maimaitham no küneibü choba yeilep lo hoba nyi kün thüka songdaklep lo?” Haoeibü mangh si haoeibü ngüh hangshong haoenei hao aei mangsenkei.

⁹Kho phaia toukei, Josefei mangh che likei, hoba kho hao jaisi shuong to lenkei. “Ditashi, toukei ngei mangh che lia; hoba chühashi, chanyu si litnyu hoba khanshoulitshou anthükcheei ngo lembei.”

¹⁰Ladang haoei kho haobou si hao jaisi shuong la lenkei, haobouei hao to hakko laukei, “Nyi libü mangh ho ai? Ngo hoba kanyu hoba kaibü jaisi shuongei maimaitham kaoa khüpetan no lemlep sai?”

¹¹Hao jaisi shuongei hao to the shouan apbei; lausikei haobouei ngüh kho maanga phokei.

¹²Nyetche haoboueibü san shuong lamshautila hao jaisi shuong Shekhem kaophei to haukei.

¹³Hobaje Israelei Josef to laukei, “Kaibü jaisi shuong Shekhem aenei sanshuong lamshautibü nyi ngeakeibü ngei no khüto hautimang sühda.” Josefei jongaikei, “Ngo lamleakei.”

¹⁴Hibü haoei hao to laukei, “No hauan ka jaisi shuong si sanshuong maisho kilaoje ngühlang sungbaan kü la lenbüma.” Hobaje haoei hao Hebron yomang ka hautikei, hoba hao Shekhem to loukei.

¹⁵Hobaje müt cheei hao sekmanga paiko hapan hao to phekei, “Nyi ai lamda?”

¹⁶Haoei jongaikei, “Ngei kü jaisi shuong lamda. Haoenei sanlon shuong lan lamshautidaje nyi kü la lenla thükasao?”

¹⁷Müt khoei laukei, “Haoen haka kuka. Ngei haoenei, ‘Sen Dothan to haukho’ dogo lauyobü dida.” Hibü Josef jaisi shuong phaito haukei hoba haoei haoen Dothan nyangko hapbei.

¹⁸Lausikei haoenei hao saabüa hapan, hao alousühtoua hao haitila huon takkei.

¹⁹Haoen cheei che to laukei, “Manghlibou kho hato louada!

²⁰Tou kaiya, senei hao haitian püngkhün che to tekan jinan, meisiau amaibüei suian apa dogo laukho. Kheijinei haoeibü mangh kho ai loushedlaje senei chühkho.”

²¹Ladang Reubenei ho ditkei, haoei hao haoeneibü ik ka khümenla haujembei. Haoei laukei, “Senei haoeibü langkei temautikho,

²²sii hansho ongkei tüangti. Phetsena kibü püngkhün to tekan jinkho, lausikei hao to ik tüet.” Reubenei haoeneibü ik ka hao khümenan haobou jungto leian ngaikula shanga laukei.

²³Hibü ladang Josef hao jaisi shuong jungto loukei, haoenei haoeibü son kakbü namsekbü neisimei kho haoeibü mangka khokan sungkei,

²⁴hoba haoenei Josef lapan püngkhün to jaangan attikei. Lausikei püngkhüna dei adangko ulangtham kikei.

²⁵Phaisho haoen shaula yungla setan kijinei, haoenei chühlitisi saabüa Ishmaelbü namyak namseibü tan che louko hapbei. Haoenei bu ka tühjung lotbü jen hoba mou moli hoba ponlemhibü peisilei ut taka thongtian Gilead ka Ijep kaodak to hauko kikei.

²⁶Kheijinei Jihudaei jaisinasi shuong to laukei, “Senei seneibü na haitisi hoba haoeibü sii küplepsi ai pailetla?

²⁷Ishmaelbüla hao yaakkukho; aieilausi hao seneibü na, hoba seneibü phe.” Haoeibü jaisinasi shuongei haoeibü ngüha lekei.

²⁸Hibü ladang Midianbü namyak namseibü shuong haoen jungto loukei, haoenei Josef püngkhün ka sungenan nam saoche lu Ishmaelbü la yaakkei, hoba haoenei Josef Ijep kaodak to leian haukei.

²⁹Ladang Reuben püngkhün to sepeijung ngaian chühkei, Josef püngkhüna akitei, hoba haoei haoeibü neisimei jitnyinkei.

³⁰Hobaje nasi shuong jungto sepeinyu ngaian laukei, “Na kho aki! Ngo tou lato haula?”

³¹Kho phaia haoenei lon paang che haitian khünei Josefeibü mangyuk khoneikei;

³²hoba son kakbü mangyuk kho bou jungto hautiko lentikei, “Künei ho hapbei. Ho kashoueibü mangyuk yinglaoje chühshi!”

³³Haoei kho chühenan laukei, “Haü, hoje kü shoueibü mangyuk! Yamyang amaibü atei hao haitia! Kü shou Josef netla phoula yeitia!”

³⁴Jakobei maangto shatko haoeibü nei jitnyinan shenjanga senounei shenan chalou lounyu shou shanga mang haapbei.

³⁵Haoeibü nouyang jayang shousi shuongei hao maang sula haujembei, lausikei haoei maang hak somang asühko laukei, “Ü, ngo mang haapbo küshou jungto yemto haulabü.” Kho tegü bouei jembü shou shanga mang haapbei.

³⁶Kho jihsiphaia, Midianbü khoei Ijep choba Faraoeibü lombou konglebou Potifar la Josef yaakkei.