Read Chang Naga KAOBAK 38 Bible Online

KAOBAK 38 - Chang Naga bible

KAOBAK 38

¹Kho jihsiphaia Jihudaei haoeibü jaisinasi shuong apyoan Hira nyenbü Adulambü che yoa kila yanan kikei.

²Khünei Jihudaei Kananbü Shuaeibü nouyangnyu hapbei. Haoei sao lekei hoba sao yoa yepbei;

³hoba sao mang akongko apan bousushou che bukkei, hoba haoei hao la Er nyenkukei.

⁴Toukei sao nyibou mang akongko apbei hoba bousushou che bukkei, hoba hao la Onan nyenkukei.

⁵Saoei toukei bousushou che bukkei, hoba hao la Shela nyenkukei. Saoei hao Kheziba bukkei.

⁶Jihudaei haoshou jaishoubou Er shanga yaksa che lekukei hoba saoeibü nyen Tamar kikei.

⁷Lausikei Jihuda shou jaishoubou Er kho BUNYUBOU thedanga shedbü kisije BUNYUBOUei hao haitikei.

⁸Kheijinei Jihudaei Onan to laukei, “Kajaieibü yak to yepan sao to laoeibü janbü kümsilei kümashi, hoba kajai shanga lilabü longtiashi.”

⁹Lausikei Onanei lilabü kho haoeibü ayinglabü dogo ngean, haoei haojaieibü yak to jamjinei haoei haojai la lilabü akula shanga jotdei kaoa ong apbo lekei.

¹⁰Haoei jungeibü kho BUNYUBOU thedanga shedbü kikei, hoba BUNYUBOUei haokei haitikei.

¹¹Kheijinei Jihudaei hao shoueibü yak Tamar to laukei, “Küshou Shela aching shongko kabou chema latnyu leko kishi.” Aieilausi haoei dambei, “Aingenyu haokei hao jainyi tegü haibüla.” Hibü Tamar ngaian haobou chema kikei.

¹²Hobaje longche kian Shua nouyangnyu, Jihuda yak haikei. Ladang Jihuda maang haksokei hao hoba hao thangbou Adullambü Hira yoa haoeibü san wi kipbou jungto Timna to angkei.

¹³Müt atei Tamar to lenko laukei, “Chühashi, kalaoeibü bou haoeibü san wi kipla Timna to angda.”

¹⁴Saoei saoeibü latnyu neisimei hangletan saoeibü thenyek sepeian neikhu yukan nei neian, Timna to haubü lam nyangko kibü Enam sang bakhüna setkei; aieilausi saoei Shela chinga dogo ngekei, hoba hao la yakla lela sao aku.

¹⁵Ladang Jihudaei sao hapbei, sao suonlamnyu dogo dambei; aieilausi saoei neikhu yukkei.

¹⁶Hobaje haoei lamkoa sao jungto hauan laukei, “Kaiya, ngo ka junga yeptikaima.” (Aieilausi haoei sao kho hao shoueibü yak dogo ange.) Saoei laukei, “No kü yoa yepbü shanga nyi kü la ai kula?”

¹⁷Haoei laukei, “Ngei lon shuong yoka lon paangshou che küntikho.” Hobaje saoei laukei, “Nyi kho akünti shongko aukabü shanga denche kuasaoma?”

¹⁸Hobaje haoei laukei, “Ngei aukabü shanga jeila ai kula?” Saoei jongaikei, “Kaibü shensinge lüh thonan hoba kaibü ika kibü ju.” Hibü haoei khübü kho kuan sao yoa yepbei, hoba sao mangakongko apbei.

¹⁹Sao meimeijung satan apbei hoba saoei thenyeka yukbü nei hangletnyu phoan saoei latnyueibü neisimei lengaikei.

²⁰Kheijinei Jihudaei yaksanyueibü ik ka chongchingla kubü peisilei nyibou sungngaila shanga hao thangbou Adullambü ik danko lonshou kho küntikei, lausikei haoei sao ühüp.

²¹Kheijinei haoei saoeibü sangbü Enaimbü to pheko laukei, “Enaim sanga lamkoa kibü suonlamnyu kho lan ki?” Haoenei laukei, “Hanei suonlamnyu aokei aki.”

²²Hao Jihuda jungto ngaian, “Ngei sao ühüp,” dogo laukei, hoba sangbü shuongei hanei suonlamnyu aokei aki dogo laukei.

²³Jihudaei laukei, “Saoei photeibü khübü kho saoei nale, ayinglonga sen himou bautilabü. Chühashi, ngei lonshou kho küntikei, lausikei nyi ühüp.”

²⁴Lit sem phaia ngüh kho Jihuda to lenkei, “Ka shoueibü yak Tamarei asangalan jungeia; hoba toukei chühashi, suonlambüei sao mang akongko kia.” Jihudaei laukei, “Sao leijung louan wana juokettiashi.”

²⁵Ladang sao leibakei, saoei jembü laoeibü bou jungto ngühlang hautiko laukei, “Habü ho aoeibü yingkeije hoei ngo mang akongko kia.” Hobaje saoei laukei, “Ho aoeibü shensinge lüh hoba ju yingkeije lenashi, dogo ngei ka to sudajada.”

²⁶Jihudaei habü ho shenan laukei, “Sao kütokei tangbou yingkei; aieilausi ngei sao kü shou Shela la angaku.” Kho phaiaje haoei sao to ajam.

²⁷Sao na hapla jih sühjinei saoeibü na setshanga phokbü shou kibü ngeenkei.

²⁸Sao na hapla shejinei cheei ik angtikei; hibü na hapjinei thuibü saoei haoeibü ikngüma lei saklangbü shenkuko laukei, “Ho shaang bukkei.”

²⁹Lausikei haoei haoeibü ik sungngaijinei haona shaang bukkei hoba saoei laukei, “Hainyu kümbo nyi kaibü haang wayetkei,” Hibü hao la Perez nyenkukei.

³⁰Kho phaia jai, aola saoei ikngüma lei saklangbü shenkukei, kho bukkei hoba hao la Zera nyenkukei.