Read Chang Naga KAOBAK 39 Bible Online

KAOBAK 39 - Chang Naga bible

KAOBAK 39

¹Tou Josef Ijep kaodak to leian yankei; hoba hao leian yanbü Ishmaelbü shuong ik ka, Farao phanga kibü lombou konglebou Ijepbü Potifarei hao jekkei.

²BUNYUBOU Josef yoa kikei, hoba hao naang maikei hoba haoeibü bunyu Ijepbü chema kikei.

³Ladang BUNYUBOU hao yoa kia, hoba haoei kümbüleibü pendoua haükuda dogo bunyuei chühenkei,

⁴kheijinei hao thedanga Josefei onou hapbei, hoba haoei hao khangenkei; hoba bunyuei jembü chema hao ikjai letikei, hoba haoeibü peisilei pendou haoeibü ikjai phanga phokukei.

⁵Haoeibü chema hoba haoei kibü pendou thüka haola ikjai letibü ka jaüan Josef laüa BUNYUBOUei Ijepbou chema kibü pendoua haükukei. Potifar chem si seka kibü pendou thüka BUNYUBOU haülabü kikei.

⁶Hibü haoei kibü pendou Josef ikjaia yoshaian phokukei; hoba shaula yunglabü to liman Josefeibü ika kibü peisilei shangabü bunyuei ai angeko kikei. Josef süngsilop maibü hoba hesihaang maian kikei.

⁷Longche kian bunyuboueibü yakei Josef to maang dühan saoei hao to laukei, “Kü yoa yepashi, kaiya.”

⁸Lausikei Josefei ngüha aleko, sao to laukei, “Chühashi, ho chema ai peisilei ong kü yoa ki bunyuei angekei, haoei haoeibü peisilei khümbo kü ikto kuakei.

⁹Ho chema kü to yaangbou ao aki. Ngeibü bunyuei ka to liman kü la akubü ai aki, aieilausi no hao yak. Hibü ngei ho tegü amaibü jungeiko Mühghaü khulimbo lai shabü shonla?”

¹⁰Kho phaiakei saoei chalou angbüa Josef to joyosikei, haoei sao yoa yepla ayingsi sao yoa kila ngüha ale.

¹¹Lausikei nyetche Josef kümsilei denche shanga chem maang to atkei, kheijinei sambü yoka che ongkei chema akitei.

¹²Saoei Josefeibü neia senetan laukei, “Kü yoa yepashi kaiya!” Lausikei Josefei saoeibü ika haoeibü nei apyoan satkukei.

¹³Ladang Josefei saoeibü ika haoeibü nei apyoan satkua dogo ngekei,

¹⁴saoei saoeibü chem kabü sambü shuong ngashaian laukei, “Chühashi, sen aweasüngla ong bunyuei Ibribü che leian loukei! Hao küto jamla chem to lotkei, lausikei ngei ngekkei.

¹⁵Ladang ngei kaang ngekbü ditkei haoei haoeibü nei kü junga apyoan tangto angkei.”

¹⁶Saoei lao alongei shongko Josefeibü nei sao junga phokei.

¹⁷Kheijinei saoei hao to jeteibü ngühli kho lenkei: “Nyi laobou Ibribü sen chemto leian loukei, haoei ngo louyola lela ngeibü shemjang to lotkei.

¹⁸Lausikei ngo ngekko haapsi hao haoeibü nei kü junga apyoan chem ka satkei.”

¹⁹Ladang saoeibü yakei, “Kaibü sambüei ngo hainyu jungeikei,” dogo laubü ngühli ditkei, hao aeibou khauangkei.

²⁰Hobaje Josefeibü bunyuei hao lapan Chobaeibü thüngbü shuong thüngshang to jinkei.

²¹Lausikei ladang Josef thüngdanga kikei, kheijinei BUNYUBOU hao yoa kikei, hoba hao to onoukei hoba thüngdang lombou la sanoutikei.

²²Hibü thüngdang lombouei thüngchema kibü thüngbü shuong pendou Josef ika phokukei; khoei haoenei khünei ai ong kümbei kho Josefei kümtibü ong kikei.

²³Hobaje Josefeibü ika ai ki, kho thüngdang lombouei ai achüh, aieilausi hao yoa BUNYUBOU kikei; hoba haoei kümbü pendoua BUNYUBOUei thüksimin kukei.