Read Chang Naga KAOBAK 4 Bible Online

KAOBAK 4 - Chang Naga bible

KAOBAK 4

¹Adamei haoyak Ev to jambei hoba sao mang akongko apbei, hoba saoei Kain bukkei, hoba laukei, “BUNYUBOUei thuibüei ngei bousushou che hapa.”

²Hobaje tokei saoei haona Abel bukkei. Hobaje Abel sanlombü kikei, lausikei Kain sekmoubü kikei.

³Hobaje jih sühbüa Kainei haoeibü langle ka BUNYUBOU jungto lembü jungkei.

⁴Hobaje Abeleikei sanshuong yoka shaang shatbou hoba khoeibü haabü sungbakei. Hobaje BUNYUBOUei Abel hoba haoeibü lembü sungletkei.

⁵Lausikei Kain hoba haoeibü lembü asunglet; khoei Kain aeibou khauangkei, hoba hao the khümbei.

⁶Hobaje BUNYUBOUei Kain to laukei, “No aila khauangda, hoba no aila the khümda?

⁷Nyi maibü kümalonga no asungletlep si? Hobaje nyi maibü akümlonga shabü kho koukhüna semattiko kia, hoba haoei ka to dühda, lausikei nyi kho thükenjan.”

⁸Hobaje Kainei haona Abel to laukei, “Seti yamto koukho.” Hobaje ladang haosi seka kikei, kheijinei Kainei haona Abel khulimbo meimeikei hoba hao haitikei.

⁹BUNYUBOUei Kain to phekei, “Kana Abel lanei ki?” Haoei jongaikei, “Ngei angekei. Ngo küna lombou si?”

¹⁰Kheijinei BUNYUBOUei laukei, “Nyi ai kümbei? Kanaeibü siiei kao ka kü to ngekda.

¹¹Hobaje tou kaoei kanaeibü sii sungletla haakouan ki hoba kho kao ka ka to shedsikhau bauda.

¹²Nyi ladang kao moulaje kaoei ka la kesiong ayemtikulabü; kaonyudaka no sateibü hoba shoongaibü chela yeilabü.”

¹³Kainei BUNYUBOU to laukei, “Ngeibü kayang kho ngei natenlabü to kei kaangbou.

¹⁴Tat nyi ngo kaothe ka shian sattida; hoba kathe ka ngo hulabü, hoba kaodaka ngo satbümaubü hoba shoongaibü che la yeilabü hoba aoei ngo haplaje haoei ngo haitilabü.”

¹⁵Lausikei BUNYUBOUei hao to laukei, “Kho khei aying; aoei Kain haitilaje hao to nyetnei sühko phoklamlabü.” Hibü BUNYUBOUei atei hao hapan haitisi amaibüla dogo Kain la shensinge shangjinkukei.

¹⁶Hobaje Kain BUNYUBOU jungka satkei, hoba Eden chaang aenei Nod kaodaka kikei.

¹⁷Kain haoyak to jambei hoba sao mang akongko apbei hoba bousushou che Enok bukkukei. Kheijinei Kainei sangnyu che kümbei hoba khola haoshou Enok nyen nyenkukei.

¹⁸Hobaje Enok la Irad bukkukei; hoba Irad kho Mehujaeleibü bou; hoba Mehujael kho Methushaeleibü bou hoba Methushael kho Lamekeibü bou kikei.

¹⁹Hobaje Lamekei yak nyi ngakei; cheeibü nyen Ada, hoba lubü cheeibü nyen Zila kikei.

²⁰Hobaje Adaei Jebal bukkei; hao neichema kibü hoba samkeisamuk kibü shuongeibü bou kikei.

²¹Hobaje haoeibü na nyen Jubal kikei, hao kongkin si pithung jungeibü shuongeibü bou kikei.

²²Hobaje Zilaei Tubal Kain bukkei, ao chinam hoba nameibü peisilei pendou jangbü müt kikei; hoba Tubal Kaineibü na yaksa Naama kikei.

²³Lamekei haoeibü yaksi shuong to laukei, “Ada si Zila, kü ngüh ditashi: Kan Lamekeibü yaksi shuong, ngeibü ngüh ditashi: Ngo leilutibü shanga ngei müt che, hoba kü la aktibü shanga ngei heshou che haitia.

²⁴Kain haitisi langkei nyet lealonga, Maimaitham ngo haitibou toje anjinlei to nyetnei phoklamlabü.”

²⁵Hobaje Adamei jembü yak to tokei jambei hoba bousushou che bukkei, hoba haoeibü nyen Seth nyenkukei. Saoei laukei, “Mühghaüei Abel jeiko kü la lilabü lubü che pienkukei; aieilausi Kainei hao haitikei.”

²⁶Hobaje Seth lakei bousushou che bukkukei; hoba haoei hao nyen Enosh dogo nyenkukei. Kheijinei mütshuongei BUNYUBOU saopobü nyen jungeiko ngala khangkei.