Read Chang Naga KAOBAK 40 Bible Online

KAOBAK 40 - Chang Naga bible

KAOBAK 40

¹Longche kian phaia, Ijep choba thungjungbou si wentek kümbü leiyeibou nyiei choba khulimbo mat angkei.

²Hobaje Farao chobaei thungjungbou jaishoubou si wentek ngoubü jaishoubou haosi ham to maangpokkei,

³hibü lombou shuong thüka leiyeibou phanga thüngbou chem laoboua Josef kikei, khünei haosi lapan jinkukei.

⁴Hobaje lombou shuong leiyeibouei müt nyi khokei Josef yoa kitikei, hoba haoei haoen khangenkei. Haoen longche thüngshanga kian phaia,

⁵youche Chobaeibü thung jungbou si wentek ngoubou hamei thüngdang chema mangh che che likei, hoba haosieibü mangh tetlabü lulu kiteikei.

⁶Ngeyang enyu Josef haosi jungto hauan chühsi haosi the khümphüman kikei.

⁷Kheijinei haoei haosi to laukei, “Kasi tat aila the angesakko kida?”

⁸Haosiei laukei, “Küsiei mangh cheche likei. Lausikei kho tetenkulabü müt ao aki.” Hibü Josefei haosi to laukei, “Tetenkulabü kho Mühghaüeibü aying lo? Sanoudaman kü la mangh kho lenbü.”

⁹Kheijinei thung jungbou jaishoubouei Josef to mangh lenkei: “Ngeibü mangha semlüh che kü thedanga ngei hapbei,

¹⁰hoba lüha bhek sem kikei, hoba khünei nyem longan pon pungan semlüh hek shenshena hekkei.

¹¹Hobaje ngeibü ika Faraoeibü thung kikei, hoba ngei semlüh shen kheian Faraoeibü ikmanga jinkukei.”

¹²Kheijinei Josefei laukei, “Ho tetlabü hai: bhek sem kho chalou sem.

¹³Semnyet kanglanga Farao Chobaei ka la amai apbuan no shangiedbü kümsileia pienngaitilabü, hoba shangied haoeibü thung jungbü tegü nyi Faraoeibü ik to haoeibü thung kulabü.

¹⁴Lausikei no ladang maian yeilaje ngokei damenshima, hoba sanoudambo Farao to joyoko ho chem ka ngo leiyentishi.

¹⁵Aieilausi ngo Ibri kaodak ka thamtham senjung loubü, hoba haneikei haoenei ngo thüngshang laangpoba phola muko ngei ai shedbü aküm.”

¹⁶Ladang wentek ngoubü jaishoubou khoei hao jamboueibü mangh tetlabü kho maian hapbei, haoei Josef to laukei, “Ngeikei mangh che lia, hoba chühashi, ngeibü khua wentek kam sem tonan kikei.

¹⁷Hobaje kam thükkaboua Farao shanga shausiyung ngoubülebü phang phanga kikei; lausikei aushuongei ngeibü khua kibü kam ka kho shaukei.”

¹⁸Josefei jongaikei, “Ho tetlabü kho: Kam sem kho chalou sem.

¹⁹Semnyet kanglanga Faraoei no sengan kaibü khu thetlabü; hoba bua saülabü hoba au shuongei kaibü phe shaulabü.”

²⁰Kho phaia Farao bukbü chaloua haoei hao phanga yaangbü shuong ngaan lem liko tomtikei, kheijinei haoei haoeibü sambü yoa thung jungbou jaishoubou hoba wentek ngoubü jaishoubou yaangbü shuong thedanga lotikei.

²¹Josefei laubü tetlabü tegü thung jungbou jaishoubou toukei haoeibü thung jungla pentikei; hibü haoei Farao ika thung jinkukei.

²²Lausikei wentek ngoubou jaishoubou haoei phenetnyu haitikei.

²³Khei yingsikei thung jungbou jaishoubouei Josef adamen; haoei hao maan apbei.