Read Chang Naga KAOBAK 41 Bible Online

KAOBAK 41 - Chang Naga bible

KAOBAK 41

¹Po nyi onan phaia Faraoei mangh che likei; hoba chühashi, hao Nail yungkoa loan kikei.

²Chühsi, shumang ka masu pi netbü nyet phokeilabü che longan sang lamshauko kikei.

³Khübü phaia mangsenlabü che hoba koplintham masu pi nyet Nail shumang ka longan shaangla longbü masu yoa yungkoa lokei.

⁴Hobaje mangsenlabü koplinbü masu shuong khoei phokeilabü masu netbü nyet kho shaukei. Kho phaia Farao pienkei.

⁵Hao toukei nyibou ngakkei, hoba nyiboukei mang che likei; chühsi, youlong chenei youman haangmaibü nyet longkei.

⁶Hobaje chühsi, kho phaia sho hoba chaangbou yeiei bungan aptibü lubü youman nyet longkei.

⁷Hobaje khübü youman pungbü khoei youman maibü langshangbü nyet kho suikei. Kho phaia Farao pikei, hoba chühsi, kho nangnak mangha kiteikei.

⁸Ngeyang hao senyüh ashembü ka Ijep kaodaka huonseibü, hoba songnge dongebü shuong pendou haoei ngashaikei, hoba Faraoei haoen la mangh kho lenkei; lausikei haoeibü mangh tetenkulabü ao akitei.

⁹Kheijinei thung jungbouei Farao to laukei, “Tatje ngei ngeibü shedbü damenakei.

¹⁰Shangied Faraoei haoeibü sambü to maangpokjinei ngo hoba wentek ngoubou küsi Chobaeibü lombou lakjaibou thüngshang chema thüngan phokei.

¹¹Hobaje küsi hamei you chenei ong mangh che che likei, hoba küsi lulu thüngthüng manghtet likei.

¹²Kheijinei lakjaiboueibü sambü Ibribü heshou che kün yoa kikei. Küsiei hao la lulueibü mangh lensi haoei küsi la lulueibü mangh tetlabü lenkei.

¹³Hobaje haoei tetenkubü tegü tükde haüthükkei: ngoje shaangla penbü pentikei, hoba jenabouje phenetnyu haikei.”

¹⁴Hibü Faraoei Josef leila hautikei, hoba haoenei thüngshang laangpob ka hao tongde leibakei. Hobaje hao khu shuan hoba nei jeian phaia Farao jungto loukei.

¹⁵Faraoei Josef to laukei, “Ngei mangh che likei, hoba kho tetlabü lenla ao aki. Lausikei nyije mangh tetenkuda dogo ka shangabü lauko ngei ditkei.”

¹⁶Josefei Farao to jongaikei, “Ngei ho athüklabü, lausikei Mühghaüei Faraoei mangsühbü kho kulabü.”

¹⁷Kheijinei Faraoei Josef to laukei, “Mangha ngo Nail yungkoa loan kikei,

¹⁸hoba chühsi, netbü hoba phokeilabü masu pi maibü nyet shumang ka longan thakdu laaka sang lamshaukei,

¹⁹kho phaia dei ka mangsenlabü koplinbü masu pi nyet longkei. Ngei ladangkei Ijep kaodaka ho tegübü masu hapan achüh.

²⁰Hobaje koplintham mangsenlabü masu nyetei shaangla longbü pi netbü nyet kho shaukei.

²¹Lausikei haoenei kho suiankei asuibü tegü ong hapbei; aieilausi haoen shangiedbü yam ong mangsenlabü che kikei. Kheijinei ngo pikei.

²²Ngei toukei mangha youshou youlong chenei youman langshangbü maibü nyet longan hapbei.

²³Kho phaia, chaang aekabü yeiei souan pungtibü youman nyet longkei,

²⁴hoba youman pungbü khoei youman maibü nyet kho suikei. Ngüh kho ngei huonseibü dan la lenkei, lausikei aoeikei kü la kho atetenku.”

²⁵Kheijinei Josefei Farao to laukei, “Faraoeibü mangh penyi ham kho tetlabü che ong. Mühghaüei ai kümla ki kho Farao la lena.

²⁶Masu pi maibü nyet kho po nyet hoba youman maibü nyet kho po nyet; penyi ham manghtet che ong.

²⁷Hobaje kho phaia longbü masu pi kopbü hoba mangsenlabü nyet, hoba chaang aekabü yeiei souan pungtibü youman nyet tetlabü kho, po nyet mühlabü.

²⁸Ngei Farao thedanga lenbü tegütham: Mühghaüei ai kümla kho Farao to lena.

²⁹Chühashi, po nyet sühko Ijep kaodak pendoua phenganyenga kilabü;

³⁰kho phaia po nyet mühsinou kilabü, hoba Ijep kaodaka phenganyenga kibü kho maalabü hoba mühsinou khoei uangmuang anglabü.

³¹Mühsinou loubüei kaodaka shangied apsileko kibü kho adamenlabü; aieilausi müh yongko kaanglabü.

³²Farao la mangh penyi thentibü kho Mühghaüei mudonga takletbü, hoba haoei tongde kümlabü.

³³“Hibü tou Faraoei damanchühbü hoba songsido kibü müt che Ijep kaoa settiashi.

³⁴Hobaje kho mütei kaonyeka ikjaibü shuong pienla Faraoei sakkuashi, hoba Ijep kaodaka langle maibü po nyet kibü chaloua shusiphon ka phejan ngaoa che Faraoei heashi.

³⁵Haoenei khübü pomai jihsiphaia shausiyung pendou takshattiashi, hoba shaula yungla shanga Farao hauei sang pendoua thanan phoan lomtiashi.

³⁶Hibü Ijep kaodaka loula kibü mühsinou po nyet shanga punga kho thanan phosi mühjinei kaodak aleilulabü.”

³⁷Kümthen kho Farao si hao phanga yaangbü shuong pendou la maikukei.

³⁸Hibü Faraoei haoen to laukei, “Mühghaü soushou kibü ho tegübü müt senei ao hapla?”

³⁹Kheijinei Faraoei Josef to laukei, “Mühghaüei ngüh ho pendou ka la ngetikei, khoei no tegübü damanchühbü hoba songbüdobü ao aki.

⁴⁰No kü sanglea bunyu yeishi, hoba kü phanga yaangbü pendouei ka ngühkhüma lelabü. Khei choba setshanga ong ka to ngo yaangbou kilabü.”

⁴¹Hobaje Faraoei Josef to laukei, “Chühashi, Ijep kaodak pendou thüka ngei no ikjai piena.”

⁴²Kheijinei Faraoei haoeibü ik ka nyendobü ikjikhap hangan sungan Josef la kukei. Hao la nei maiboutham neikukei, hoba ngüma honeibü yangmen yakkukei.

⁴³Haoei haoeibü nyiboubü kailonga hao settikei; hoba haoenei hao thedanga hao la, “Lam kaangkuashi! Lam kaangkuashi!” dogo ngekkei. Kho khei haoei hao Ijep kaodak pendoua thükkabou yeitikei.

⁴⁴Kheijinei Faraoei Josef to laukei, “Ngo Farao, lausikei ka ngüh ayoko Ijep kaodak pendoua aoeikei ik yingsikei you yingsikei atonenlabü.”

⁴⁵Faraoei Josef la Zafenath-Panea nyenkukei, hoba hao yakla lela shanga On kabü ungshedbou Potifera nouyangnyu Asenat kukei. Hobaje Josef Ijep kaodak pendou shoongko paikei.

⁴⁶Hobaje Ijep choba Faraoeibü kümtoleito atjinei Josef po khujin kiteikei. Hobaje Josef Farao jungka satan Ijep kaodak pendoua paikei.

⁴⁷Naangmaibü po nyet khünei kaonyuei shusiphon apsileko longtikukei.

⁴⁸Ijep kaodaka po nyeta latshaibü nyak kho pendou haoei yoshaian sangnyu weko thankei; sangnyu shuong kaijembo kibü sek ka longbü shausiyung pendou haoei khünei thankei.

⁴⁹Kho tegü Josefei molodei phetsen tegü nyak thankei, khei, yongko juongsapsi haoei aweko nangkei.

⁵⁰Müh aloubü thedangto Ona ungshedbou Potifera nouyangnyu Asenatei Josef la bousushou nyi bukkukei.

⁵¹Josefei jaishoubou la Manasse nyenkukei, hoba laukei, “Aishanga ngo khonkubü pendou hoba kübou chempen pendou Mühghaüei maatikei.”

⁵²Hobaje nyiboubü shou la Efraim nyenkukei hoba laukei, “Aishanga ngo khonkubü kaodaka Mühghaüei ngo hekbü bulong yeitikei.”

⁵³Hobaje Ijep kaodaka naangmaibü po nyet kho thonkei,

⁵⁴hoba Josefei laubü tegütham, po nyet mühla khangkei. Kaodak pendoua mühkei, lausikei Ijep kaodak pendoua shausiyung kikei.

⁵⁵Ladang Ijep kaodak pendoua mühsinou khangkei, Ijepbüei Farao to shausiyung shanga ngekkei, kheijinei Faraoei haoen to laukei, “Josef jungto hauashi, hoba haoei ai lenlaje kho kümshi.”

⁵⁶Ladang kaonyu pendoua mühkei, kheijinei Josefei bung ipbei hoba Ijepbü la yaakkukei; aishanga Ijep kaodaka müh yongko kaangkei.

⁵⁷Kaodak pendou nyak nola Ijep kaodak to Josef jungto loukei; aishanga kaodak pendoua mühsinou yongko kaangan kikei.