Read Chang Naga KAOBAK 42 Bible Online

KAOBAK 42 - Chang Naga bible

KAOBAK 42

¹Ladang Jakobei Ijep kaodakaje nyak kia dogo ditkei haoei haoeibü shousi shuong to laukei, “Kan aila chühyoko ong shaida?”

²Haoei athakko laukei, “Ngei Ijepa nyak kia dogo ditda; hibü sen mühei ashemlabü lele khüto yanan sen shanga nyak jekba.”

³Hibü Josefeibü jaisi shuong müt an kho Ijep kaodak to nyak jekla yankei.

⁴Lausikei Josefeibü na Benjaminje, Jakobei jaisi shuong yoa ohauti, aieilausi thushed denche kühshuoksi amaibüla dogo hao hatkei.

⁵Hibü lubü nyak jekla haubü shuong yoa Israeleibü shousi shuongkei haukei, aishanga Kanan kaodakakei mühsinou kikei.

⁶Tou Josef Ijep kaodaka bunyubou yeian, haoei kaodak pendou kabü mütshuong la nyak yaakkukei. Hibü ladang Josefeibü jaisi shuongkei lousühkei, haoenei hao thedanga kaoa khüpetkei.

⁷Kheijinei Josefei haoeibü jaisi shuong hapbei hoba haoen tongde shenkei, lausikei yenbou to tegü shoulole jongaiko haoen to laukei, “Kan laka louda?” Haoenei jongaikei, “Kanan kaodak ka nyak jekla louda.”

⁸Josefei haoeibü jaisi shuong shenasikei, haoeneije hao ashen.

⁹Josefei haoen shangabü mangh kho damenko haoen to laukei, “Kan kokpheibü mütshuong! Kün kaodak hau akibü chühla loukei.”

¹⁰Haoenei hao to jongaikei, “Aying, ngeibü bunyubou, kün kaibü sambü shuong nyak jekla ong loukei.

¹¹Kün pendou bou cheeibü shou ki. Künje ngühmaanglanbü mütshuong, kün kokpheibü shuong aying.”

¹²Kheijinei haoei haoen to laukei, “Aying! Kan kün kaodak hau akibü chühla loukei.”

¹³Lausikei haoenei laukei, “Kaibü sambü shuong kün jaisina müt anthüknyi Kanan kaodaka kibü müt cheeibü shou, hoba chühashi, kün yoka nashouboutham abou yoa kia, hoba cheje aki.”

¹⁴Kheijinei Josefei haoen to laukei, “Kan kokpheibü shuong dogo ngei lauanai!

¹⁵Hoei kan takteilabü: Faraoeibü nyena ngei kan to thedalanda, kaneibü na napeibou hato leian aloulonga, kan haka asattilabü.

¹⁶Kan yoka che hautian napeibou kho leiba, hoba kanje thüngan photeilabü, khoei ong kaneibü ngüh tükde si jije ngelabü. Amlang yingan kialonga Faraoeibü nyena thekolanko lauda, kan kokpheibü.”

¹⁷Hobaje haoei haoen jemala semnyet sühko thüngshanga thüngan phokei.

¹⁸Sembounyet Josefei haoen to laukei, “Kanei hai kümashi hoba langkei kishi, aieilausi ngei Mühghaü to hatda.

¹⁹Kan ngühmaanglanbü müt yingalonga kaneibü na che thüngshang hanei phokushi, hoba kaneibü chem to müh shanga nyak künan hauashi.

²⁰Hobaje kaneibü na napeibou kho kü jungto leiba, kheijinei kaneibü ngüh ngühmai yinglabü hoba kan ühailabü.” Hobaje haoenei kho kümla khangkei.

²¹Kheijinei haoenei sangkuko laukei, “Maimaitham sen seneibü na shangabü shedbü kia; aieilausi haoei sen to aeibou sujijajinei hao maang leilubü hapsikei senei ngüha ale. Khoei kho khonsak sen jungto louda.”

²²Kheijinei Reubenei laukei, “Ngei kan to nashoubou khulimbo shedbü teküm dogo alausi? Lausikei kanei ngüha ale! Tou chühshima, hao haibü sii sen thükto loungaida.”

²³Josefei haoen ai lauyoda kho ditan kikei, lausikei haoenei haoei aditenda dogo dambei, aieilausi Josefei ngüh japbou phoan joyokei.

²⁴Kheijinei Josef haoen thedang ka thenyek sepeian haapbei hoba toukei hao nyiboukei haoen jungto sepeinyu longeian haoen to joyokei, hoba haoen yoka Simeon lapjung louan haoenei hapbo hao khühkei.

²⁵Kheijinei Josefei haoeneibü neimoka shaubü shenko jinkula, haoen wekoeibü neimoka lulueibü nam jinngaikula hoba walama shaulakei kushi dogo ngühkhüm kukei; hoba haoen to kho khei kümbei.

²⁶Kho phaia haoenei lulueibü gadua künlekei hoba haoen khüka meimeikei.

²⁷Hobaje nangnak yepshanga haoen yoka cheei haoeibü gadu la oknyinla neimok sengsi haoeibü nam neimok sembunga kiteikei.

²⁸Kheijinei haoei jaisinasi shuong to laukei, “Ngeibü namje ngaitikuakei. Hanei ngeibü neimok sembunga kia.” Hibü haoen on tokan maangpangko joyoko laukei, “Mühghaüei sen to ho ai kümbei?”

²⁹Ladang haoenei Kanan sühkei, haoen to ai kümbei kho pendou bou Jakob to lenkei.

³⁰Haoenei laukei, “Khei Ijep kaodak bunyubouei kün to kaangkosekko joyokei, hoba kaodak kokpheibü shuong dogo laukei.

³¹Lausikei künei hao to, ‘Kün ngühmaanglanbü mütshuong; kün kokpheibü aying,’ dogo jongaikei.

³²Kün bou cheeibü shou müt anthüknyi hoba cheje haia; napeibou kho ong Kanan kaodaka abou yoa kia.”

³³Kheijinei kho kaodak bunyubouei kün to laukei, “Kan ayepeibü müt yingalonga hoei ngei ngelabü; kan jaisina yoka müt che kü yoa phokuashi hoba chema mühbünoubü shanga nyak künan ngaishi.

³⁴Lausikei kaneibü na napeibou kho kü jungto leiba, khei yingsi ong kan kokpheibü aying, tükdebü müt yingkei dogo ngei ngelabü. Kheijinei kaneibü na kho kan la ngaitikulabü hoba kün kaodaka kan namyak namseiko kila thükkei.”

³⁵Kho phaia neimok ka shaubü haakletsi mütpem wekoeibü nam lulueibü neimoka hapbei. Hobaje haoenei hoba bouei namsen kho hapan aeibou hatyokei.

³⁶Haoeneibü bou Jakobei haoen to laukei, “Kanei ngo shousi akibüla yeitia. Josef aki, Simeonkei aki, hoba tou Benjaminkei kanei leian haumang sühda. Pendou kho kükhu limbo ki.”

³⁷Kheijinei Reubenei bou to laukei, “Ngei hao ka jungto nyibou aleibalonga küshou nyi ham kho haitishi. Hao kho kü la nongkushi, hoba ngei ka jungto leingaibakho.”

³⁸Kheijinei haoei laukei, “Kü shouje kan yoa ohautilabü; aieilausi haojai haian hao ong jouakei, hibü kaneibü walama denche thushed kühshuokalonga kanei ngo khuthu phaman maangmaua heekhün to attilabü.”