Read Chang Naga KAOBAK 43 Bible Online

KAOBAK 43 - Chang Naga bible

KAOBAK 43

¹Tou Kanana müh kho aei kaangbou kikei.

²Kheijinei haoenei Ijep kaodak ka sungbabü nyak pendou kho shaukhümsije, bouei haoen to laukei, “Toukei ngaian sen shanga nyak shisho jekba.”

³Lausikei Jihudaei hao to laukei, “Müt khoei kün to maisho lena, ‘Kanei kaneibü na kho aleibalonga kanei kü the ühüplabü.’

⁴Hibü küneibü na kho kün yoa hautialonga künei ka la nyak jekbala haukho;

⁵lausikei nyi hao ohautilonga kün tohaukho, aieilausi müt khoei kün to lena, ‘Kaneibü na kan yoa athonlonga kanei kü the ühüplabü.’ ”

⁶Kheijinei Israelei laukei, “Kanei kü shanga aila amaibü sungbako kaneibü na toukei che kia dogo müt khola lenkei?”

⁷Kheijinei haoenei laukei, “Müt khoei kün shanga hoba sen chempen shanga kaangko pheko laukei, ‘Kaneibü bou tou sühko lang kiakaoba lo? hoba kaneibü na che kia lo?’ Künei haoei phebü ngüh ong jongaikei. ‘Kaneibü na kho hato leiba,’ dogo laulep dogo künei lai ngela?”

⁸Kheijinei Jihudaei haobou Israel to laukei, “Na kho kü yoa hautiashi, hoba kün tongde meimeijung haukho; khei yingsi ong kün hoba küneibü shousinasi shuong ühaiko lang kilabü.

⁹Hao shanga ngo aukabü yingkho; kü ik ka nyi hao hishi. Ngei ka jungto hao aleibalonga hoba ka thedanga aphokulonga kü langkei sünga ngo ka thedanga shedbü yinglabü.

¹⁰Aieilausi kün aphai tegüje touje hoei nyibou longeian kikhoulabü.”

¹¹Kheijinei haoeneibü bou Israelei laukei, “Khei yingalonga kanei khei kümshima; müt khola jongsak shanga sen kaodaka longbü buhek maibü, moumoli shisho, naodei shisho, shikmeimaitibü, ponlemhibü, pistakhio hoba almond buhek, khübü shisho dogo ona lamlean künashi.

¹²Hobaje kanei lulueibü ika nam phejan nyibang künashi, aishanga kaneibü neimok sembunga jinngaikubü nam khokei künngaijan. Aingenyu denche mashikan kilabü.

¹³Kaneibü nakei leian müt kho jungto tongde sepeinyu ngaiashi.

¹⁴Thükenbou Mühghaüei kaneibü na lubü che yoa Benjamin thonan kan yoa longeitilabü lele müt kho thedanga kan la üeisanou nahaptima. Kü shangaje ngo shousi akibüla yeitialonga, shousi aki dogo setkho.”

¹⁵Hibü haoenei jongsakla peisilei hoba ika nam phejan nyi hoba Benjamin leian Ijep kaodak to hauan Josef thedanga lokei.

¹⁶Ladang Josefei haoen Benjamin yoa hapbei haoei haoeibü ikjaibou to laukei, “Habü mütshuong chem to leiyetashi hoba kü yoa chajih nyakshau shanga shatsinam ka haitian shausiyung lamleashi.”

¹⁷Josefei laubü tegü müt khoei haoen Josef chem to leian loukei.

¹⁸Tou Josef chem to leian lousi haoen hatkei hoba laukei, “Shaangla seneibü neimoka jinngaikubü nam shanga sen hato leian louda. Haoei sen la shedbü kuko sen lapan hoba gadu sunglangkuko sen aaola leko phola kümda.”

¹⁹Hibü haoen Josefeibü ikjaibou jungto hauan koukhüna joyokei.

²⁰Haoenei laukei, “O ngeibü bunyubou, shaangla kün hato nyak jekla che louyenkei.

²¹Lausikei nangnak yepshanga sühsi künei neimok sengkei hoba chühsi kün mütpem wekoeibü neimoka nam penko hapbei; kho künei künbangaiakei.

²²Hobaje künei toukei khoto jinyoan jungan louyenkei, nam kho küneibü neimoka aoei jinkukeije künei angekei.”

²³Kheijinei haoei laukei, “Kan maang temau hoba tehüt. Kaneibü Mühghaü hoba kaneibü boueibü Mühghaüei kaneibü neimoka nam phokukei; ngeije kaneibü nam hileda.” Kheijinei haoei Simeon haoen jungto leibakei.

²⁴Ikjaibou khoei mütshuong kho Josef chem to leian louan you sakla dei kukei, hoba haoenei haoeneibü you makkei, hoba haoeneibü gadu la youho nyaitikei.

²⁵Chajihboua Josef chemto mo alongeitoua haoenei jongsak kho lamlekei; aieilausi haoen khünei shaula yunglabü dogo ditkei.

²⁶Kho phaia Josef chem to longeisi haoeneibü ika kibü jongsak kho chemto jungan angan hao thedanga phokuan haoenei hao thedanga kaoa khüpetkei.

²⁷Haoei haoen shangabü pheko laukei, “Kaneibü jailebü bou che shangabü kanei kü la lenbü kho lai ki? Hao toukei lang kiakaoba lo?”

²⁸Haoenei jongaiko laukei, “Küneibü bou kaibü sambü kho maisho kia.” Hobaje haoenei soumo kuko khüpetkei.

²⁹Kheijinei haoei tangko chühan, haonyueibü shou, na Benjamin hapan laukei, “Kanei kaneibü napeibou shangabü kü la lenbü kho ho sai?” Hobaje haoei laukei, “Mühghaüei ka to onoushima, küshou.”

³⁰Josefei na shangabü sanouko damsije haapshang lambo panteiko haoeibü shemjang to hauan khünei haapbei.

³¹Kho phaia hao the nyetan tang to longan haoeibü maangpon küpjemeian laukei, “Shausiyung shomashi.”

³²Kheijinei haoenei hao la, haoeibü jaisishuong la, hoba hao yoa shaulabü Ijepbü la lulu lulu khümsoka lamlekukei; aieilausi Ibribü yoa Ijepbü liko shaulabü kho janbü aying. Aieilausi Ijepbü shanga kho mangsenlabü kikei.

³³Kho phaia hao thedanga, bukbü phetphan tegü jaishou ka thenko settikei, hibü haoen chühyoan maangpangkei.

³⁴Ladang Josefeibü khümsok ka haoen la shausiyung shombukei, kheijinei Benjamineibü phejanje lubüeibü to phejan ngaoei juongbou kikei. Kho tegü haoenei shaukhüm yungkhüman hao yoa olinyokei.