Read Chang Naga KAOBAK 44 Bible Online

KAOBAK 44 - Chang Naga bible

KAOBAK 44

¹Kho phaia Josefei haoeibü chem bunyubou to lenkei, “Mütshuong la haoenei sühthüng haoeneibü neimoka shaubü jinkuashi, hoba haoen müt wekola haoeneibü nam haoeneibü neimok sembunga jinngaikuashi.

²Hobaje napeiboueibü neimok sembunga ngeibü chandinam thung kho nam yoa jinkushi.” Hobaje haoei Josefei lenbü tegü kümbei.

³Ngeyang enyu haoen haoeneibü gadu yoa hangan hautikei.

⁴Haoen sangnyu ka lalok ohauko Josefei haoeibü chem ikjaibou to laukei, “Meimeiashi, mütshuong kho phai shijung hauashi, hoba haoen laphetjinei laushi, ‘Kanei maibü jeiko aila amaibü kungaikei?

⁵Thung kho ngeibü bunyubouei yungbü thung hoba kho phaang pakbü tetsida lebü thung aying lo? Kanei ho kaang shedtia!’ ”

⁶Haoei haoen laphetan phaia ho ngüh nopmaiko laukei.

⁷Lausikei haoenei hao to laukei, “Küneibü bunyubouei aila hainyutham laudama lo? Kaibü sambü shuongei kheinyuje tekümbao?

⁸Chühashi, küneibü neimok sembunga kibü nam künei hapbü khokei künei Kanan kaodak ka ka jungto sungngaibakei. Khülonga kaibü bunyubou chem ka hon ayingsi chandinam künei ainei lela kokla?

⁹Kaibü sambü shuong yoa aoeibü ona kilaje hao haitishima, hoba künkei seneibü bunyuboueibü aaola lekhoma.”

¹⁰Hobaje haoei laukei, “Kanei laubü tegü yingshi: aoeibü ika kho haplaje hao ngeibü aaola lelabü, hoba kan joubü shuong tanglabü.”

¹¹Kheijinei haoenei panteiko lulueibü neimok sembunga khühbü sengkei.

¹²Kheijinei haoei jaishoubou ka napeibou sühko aakkei. Hobaje thung kho Benjamineibü neimoka hapbei.

¹³Kheijinei haoenei haoeneibü nei jitnyinkei. Hobaje lulueibü gadu la on künngaitian sangnyu to ngaikei.

¹⁴Hobaje Jihuda si haoeibü nasi shuong Josef chem to haukei, aieilausi kheijinei hao chema kiteikei; hoba haoen hao thedanga shingennyu khüpetkei.

¹⁵Josefei haoen to laukei, “Kanei ho ai kümsilei kümbei? Ngo tegübü mütei maimaitham phaang pakla thükkei dogo kanei angekei lo?”

¹⁶Kheijinei Jihudaei laukei, “Küneibü bunyubou thedanga künei ai lenla? Ayinglonga künei kün lolo ai matmaila? Kaibü sambü shuongeibü Mühghaüei tang khittia. Chühashi, kün hoba aoeibü ika thung hapbei, hao yoa künkei ngeibü bunyuboueibü aaola lekho.”

¹⁷Lausikei Josefei laukei, “Kho tegü ngei ladangkei ajungeilabü! Touje aoeibü ika thung hapbei hao kho ong ngeibü sambula lelabü; lausikei kanje kaneibü bou jungto maisho ngaiashi.”

¹⁸Kheijinei Jihudaei hao nyangko hauan laukei, “O ngeibü bunyubou, kaibü nouei ditko kaibü sambouei ngüh che laula ngei sudajada. No Farao him yingasikei, ka sambou to temangpokma.

¹⁹Ngeibü bunyubouei ka sambü shuong to hai phekei, ‘Kaneibü bou ayingsi lubü na kilao?’

²⁰Hobaje künei jongaikei, ‘Künei jailebü bou kia, hoba hao jai lean bukbü na che kia. Haoeibü jaije haia hoba nyuei bukbü yoa hao che ong jouan kia, khoei bouei hao to sanouda.’

²¹Hobaje nyi kaibü sambü dan to laukei, ‘Kanei hao kü jungto leian kayen, ngei hao to chühkho.’

²²Hobaje künei ngeibü bunyubou to jongaikei, ‘Nashoubou kho bou ka abangenlabü, aieilausi haoei bou ka bangalonga bou kho hailabü.’

²³Lausikei nyi kaibü sambü to laukei, ‘Kaneibü na napei kho kan yoa leian aloulonga kanei kü theje ladangkei ühüplabü.’

²⁴“Kho phaia kün kaibü sambü, küneibü bou jungto hauan kün to küneibü bunyubouei joyobü khümbo abou la lenkei.

²⁵Kheijinei küneibü bouei, toukei hauan shaubu shisho jekba dogo laukei.

²⁶Lausikei künei laukei, ‘Küneibü napeibou kün yoa kisi ong kün haulabü. Küneibü napeibou kün yoa akishongko künei kho müteibü thenyek ühüpenlabü.’

²⁷Kheijinei kaibü sambü küneibü bouei laukei, ‘Kü yakei küla shou müt nyi bukkukei kho kanei ngekei;

²⁸ngei laukei, touje cheje kü jungka satsije, maimaitham netla yeia, hoba ngei tou sühko hao ühüpda.

²⁹Tou kanei haokei kü jungka leian satan denche thushed kühshuoka longa kanei ngo khuthu phaman maangmaua heekhün to attilabü.’

³⁰“Khei yingbü khoei, kaibü sambou küboueibü langkei napeieibü langkei to phenyoan kibüei ngo kübou jungto ladang ngailaje hoba na kho kün yoa athonlaje kheijinei

³¹kübouei na kho ühüplonga hao hailabü. Kaibü sambü shuongei küneibü khuthu phambü bou maangmaua heekhün to attilabü.

³²Aieilausi ngo kaibü sambouei na shanga aukabü leko ho hai kübou to laukei, ‘Hao ka jungto leian alongei longa ngo ponpen kübou thedanga shed yinglabü!’

³³Khei yingbü khoei ngei sukojako lauda, khei na jeiko ngo bunyuboueibü aaola leko kikho; hoba na kho jaisishuong yoa ngaitiashi.

³⁴Aishanga na kü yoa athonlonga kübou jungto ngo lai haula? aieilausi abou khonsak chühko lai ong akien.”