Read Chang Naga KAOBAK 48 Bible Online

KAOBAK 48 - Chang Naga bible

KAOBAK 48

¹Longche kian phaia müt atei Josef to, “Kabou shatda” dogo lenkei. Hibü haoei haoeibü shounyi, Manasse si Efraim leian haukei.

²Ladang Jakob to, “Kabou Josef ka jungto louakei,” dogo lenkei, kheijinei Israelei haoeibü hau kingaian yepshanga setkei.

³Jakobei Josef to laukei, “Pendou to hau yaangbou Mühghaü Kanan kaodak Luz sanga kü jungto longkei, hoba ngo haükukei.

⁴Hobaje haoei kü to laukei, ‘Chühashi, ngei no bukkohaako juong haatikulabü. Hobaje ngei no phangyaang mütli yeitilabü, hoba ngei ka phainei kaibü thensilen la ponpen shanga bunyu yeiko kimla ho kaodak kulabü.’

⁵“Ngo aloujinei Ijep kaodaka kala bukkubü shounyi kho ngeibü; Efraim si Manasse kei Reuben si Simeon tegü ong küshou yinglabü.

⁶Touje haoen phainei kala lajuche bukkulaje kho kashou la lelabü; hoba haoenei jaisi shuongeibü nyena haoenei kaobunyu yeibü nyen nyenlabü.

⁷Ngoje Padan Aram ka Kanan kaoa Efrat sühla nyangko Rachel lama kü thedanga haikukei, hoba ngei sao khünei Efrat (kho Bethlehem) to haubü lama khünan apyokei.”

⁸Kho phaia Israelei Josef shousi shuong hapan phekei, “Habü ho aoyou?”

⁹Josefei haobou to jongaikei, “Khünyi kho Mühghaüei küla hanei Ijepa kubü shousi ki.” Kheijinei Israelei laukei, “Ngei haosi haükulabü lele haosi kü jungto leiba.”

¹⁰Tou Israel baushi sinan kisije haoeibü nyek yuian maisho achühen. Hibü Josefei haosi hao nyangko leian loukei, hoba haoei haosi himlepan sembung shepbei.

¹¹Toukei Israelei Josef to laukei, “Ngei kathe haplep dogo adam; lausikei chühashi, Mühghaüei touje kaibü shousikei küla haptia.”

¹²Kheijinei Israeleibü you phang ka haoeibü shounyi leian sungan hao thedanga kaoa khüpetkei.

¹³Kho phaia Josefei ham leian jungan, Efraim Jakobeibü nanaenei hoba Manasse maiaenei dogo jenan lotikei.

¹⁴Lausikei haoeibü mai ik shingan Efraim khua shangkei, hao nashoubou yingasikei; hoba haoeibü ik peiyoan, haoei haoeibü nanae ikei Manasse khua shangkei, hao shaangbü shou yingasikei.

¹⁵Tou haoei Josef haükuko laukei, “Laobou Mühghaü thedanga shangied küpi kübousi shuong, Abraham hoba Isak paikei, laobou Mühghaüei tou sühko ngeibü langkei salang sünga ngo sambei:

¹⁶Hobaje laobou hangangbüei amaibü pendou ka ngo püetkei, haoei nashou nyi ho haükushima. Hobaje ngeibü nyena hoba shangied küpi kübousi shuong Abraham si Isak nyena haoen ngalabü; hoba kaodaka haoen aeibou haako yaangko kitishima.”

¹⁷Ladang Josefei boueibü mai ikei Efraimeibü khua shangetan hapbei, hao maang ühai, hoba Efraimeibü khu ka Manaseeibü khua shangettila shanga boueibü ika jungkei.

¹⁸Hobaje Josefei bou to laukei, “Abou, kho khei touma, ho jaishoubou haoeibü khua kaibü mai ikei shangetshima.”

¹⁹Lausikei bouei ngüha aleko laukei, “Ngei shenakei. Küshou ngei ngeakei, ho phangyaang che yeilabü, hoba yaangenbü che yeilabü. Lausikei haona kho hao to yaangbou yinglabü, aishanga haoeibü thensilen kho phangshuong yaangbü che la yeilabü.”

²⁰Khünyet chalou haoei haoen haükuko laukei, “Ka nyen phongko Israelei haülabü kuko laulabü, ‘Mühghaüei no Efraim si Manasse tegü yeitishi.’ ” Kho khei Jakobei Manasse to Efraim shaangtikei.

²¹Kheijinei Jakobei Josef to laukei, “Chühashi, ngo haida, lausikei Mühghaü kan yoa kilabü, hoba haoei kan pi kaodak to leian ngailabü.

²²Hobaje kala, ao jaisi shuong thüka ki, ngei laobou Amorbü ka ngeibü inlou si laujinei soletbü haabü kaophei Shekhem ki, kho aeila kuda.”