Read Chang Naga KAOBAK 49 Bible Online

KAOBAK 49 - Chang Naga bible

KAOBAK 49

¹Kheijinei Jakobei hao shousi shuong ngaan laukei, “Kan yoshaiashi, khei ngiet phaia kan jungto ai loula kho ngei kan la lenkho.”

²“Jakob shousi shuong, liko yoshaian ditashi: kaneibü bou Israeleibü ngüh ditashi.

³“Reuben, küshou jaishoubou, ngeibü hau, tetsida khangbü. No soumoa haangenbou, hoba no seia sonenbou.

⁴No küp ajembü dei tegü, no jaila leko ühanglabü, aishanga no kaboueibü shen to nguikei; No ngeibü thangnyu shuong to jambei, hoba nyi kaboueibü shen shatikei.

⁵“Simeon si Levi tükdebü jaisina ki. Haosiei ik shatyobü kaangbüsekbü shanga insiaubu jungeikei.

⁶Haosi kok shakyobüa ngo ayolabü, ayingsi haosi sangkuphelambüa ngei phejan alelabü, Aishanga haosiei khauanga mütshuong haitikei, hoba haosiei louyola masu pongsu yaküp thettikei.

⁷Haosi khauanga shedsikhau yingshi, aishanga kho kaangbü sekbü. Hobaje haosi khau lotbüa shedsikhau yingshi, aieilausi kho onou akak. Ngei haoen Israel kaonyu pendoua aatilabü. Israel mütli yoa ngei haoen lintilabü.

⁸“O Jihuda, noje kaibü jaisinasi shuongei sanglabü. Nyi kaibü ikei kaibü dangboueibü ngüma nyatlabü. Kaboueibü shousi shuongei ka to khüpetlabü.

⁹O Jihuda, no molosaonyu shoushou tegütham. Küshou, no mei taketshang ka longeida; hao molosaonyu hima leketnyu lengakei, aoei hao pitila?

¹⁰Hao yemsang to alou shongko Jihuda ka Chobaeibü songdak julo, hoba hao you jungka songdak-julo akuklabü, hoba mütshuongei haoeibü ngüh ditkulabü.

¹¹Semlühlonga haoeibü gadu phenan, hoba semlühlong maibouthama haoeibü gadu shoushou phenan; Haoei haoeibü neisimei ihei, hoba haoeibü neisimei sii hima sakbü semlüha saklabü.

¹²Ihei haoeibü nyek saklanglabü, hoba sendeiei haoeibü hauh thupailabü.

¹³“Zebulun yungnyu yungkoa kilabü; hoba hao yungkoa longchem yaangbü phoshang yinglabü. Sidon kaodak to hao leilang khümlabü.

¹⁴“Issakarje sekokbü gadu che onkün penyi kanglanga shingetnyu yepbü him.

¹⁵Haoei haksoshang maibü che hapda, hoba kaonyu kho chühsebü maibü ki. Hibü on künla haoeibü taak thokuda, hoba aao che la yeiko kümtileitida.

¹⁶“Danje Israelbü yoa mütli che tegü, jembü mütli shanga mat jembulabü.

¹⁷Dan lamkhonga kibü pinyu, lamnyua kibü kom kibü pinyu, Haoei Kolieibü youa püpda, khei yingbüei khonei setbü taakphai to atlabü.

¹⁸“O BUNYUBOU, ngei kaibü leiyenbü chüheida.

¹⁹“Gadje koklaklakbü danei shieilabü. Lausikei phailaje haoei haoen youdema japbo shilabü.

²⁰“Ashereibü kaonyu ka haabü shausiyung longlabü. Hobaje Chobaei shaula mubü jemoubü shausiyung kümenlabü.

²¹“Naftali meishi hima wenbou ki. Haoei ngühang ngühlam ngean lauda.

²²“Josefje maihekbü semlüh, yungko kabü shenmaibü semlühlong phatkei. Haoeibü bhek kümthanga khuida.

²³Lau jungbü dangbou shuongei hao amaiko komda, hoba lau si laujin jungan kipbo hao shida.

²⁴Lausikei haoeibü lau maietnyu kikei; Jakobeibü Yaangenbou phak danko, Israeleibü Sanlombou hoba Laangnyudak danko, haoeibü phem shoulotham yeikei.

²⁵Kaboueibü Mühghaüei ka to thuida, Thükenbou Mühghaüei müh ka lang yantikuko no haükuda. Hobaje kaonyu maang ka haübü dei, shatsinam hoba shisi shousi juongnyu haülabü.

²⁶Kaboueibü haülabü shuong kho, shangiedbü shongh shuongeibü haülabü tokei yaangbou. Khübü haülabü pendou Josefeibü khua, khei haoeibü jaisinasi shuong yo ka phangche shanenboueibü khüngjaa baulabü.

²⁷“Benjamin yamkabü sholou phatko ki; ngeyang haoei mei taketda, hoba chasem soletbü phet janda.”

²⁸Habü ho pendou Israel phang anthüknyi ki, hoba lulu to paplepbü haülabü shanga lenko haoeneibü bouei haülabü kukei.

²⁹Kho phaia haoei haoen to ngüh maisho lenkei: “Touje ngo haibüa kü mütli yoa yolabü chalou süha. Hibü, Hitbü Efron sekphaia kibü heelaaka ngeibü pisibousi shuong yoa,

³⁰Kanana Mamre nyangko, Hitbü Efron ka heelaak shanga Abrahamei sekphai thonan phoubü Makpela sekshui laangkhün khonei ngo khünshi.

³¹Khonei Abraham si haoyak Sara khünkei; Isak si haoyak Rebeka khünkei hoba khünei ngei küyak Lea khünkei.

³²Kho sekshui hoba khünei kibü laangkhün kho Hitbü ka jekngaikei.”

³³Ladang Jakobei hao shousi shuong to joyokhümbei, haoeibü you yepshanga thopbei hoba thonbü hak hinan haikei, hoba hao mütli shuong yoa yokei.