Read Chang Naga KAOBAK 50 Bible Online

KAOBAK 50 - Chang Naga bible

KAOBAK 50

¹Kheijinei Josefei boueibü thenyeka thenan haapbo sembung shepbei.

²Kho phaia Josefei moli ngebü to haoboueibü mang anyaütila ponlem hibü naangkushi dogo lenkei. Hibü haoenei Israeleibü manga anyaülabü moli naangkukei.

³Hobaje Israeleibü mang naanglepla nyishou tegü chalou saonyi lekei, hoba Ijepbü shuongei hao shanga chalou anjinlei mang haapbei.

⁴Ladang mang haapbü chalou shuong wankei, Josefei Faraoeibü yaangbü shuong to laukei, “Kanei kü to sanoualonga, sanoudambo Farao la ho ngüh lenkushi:

⁵‘Kübouei kü to thetilantiko lenkei: Chühashi, ngo haida, hibü Kanan kaodaka ngei kü shanga ai hee kümbei khünei ngo khünshima;’ khoei ngei sudajada, khoei ngo küboueibü mang khünla hautikai, hoba ngo nyibou longeilabü.”

⁶Faraoei laukei, “Hauashi hoba kabouei ka la thetilantibü tegü nyi hao khünashi.”

⁷Hibü Josef boueibü mang khünla haukei. Hobaje Farao jungkabü yaangbü shuong hoba Ijep kaodaka khuleibü shuong pendou hao yoa haukei.

⁸Hobaje toukei Josef chemdang khümbo, hoba haoeibü jaisi shuongeibü chemdang hoba boueibü chemdang pendou hao yoa haukei. Lausikei haoeneibü shousi shuong hoba san shuong ong Goshen kaodaka phoyokei.

⁹Hobaje hao yoa kailong hoba kolia setbü shuongkei haukei; kho mütshang yaang kiteikei.

¹⁰Ladang haoen Jordan chaangbou aenei Atad amshang sühkei, khünei haoenei aeibou waangko haapbei hoba kaang mang haapyokei; kho tegü Josefei haobou shanga chalou nyet manghaap nou noukei.

¹¹Ladang Kananbüei Atad amshanga haoen mang haapyoko ditkei kheijinei laukei, “Ijepbü kaangkosekko mang haapyoda.” Khoei haoenei kho kaoen to Abel Mizraimu dogo laukei.

¹²Hibü Jakobei lenbü tegütham hao shousi shuongei khei kümbei;

¹³aieilausi hao Kanan kaodak to künlangan Abrahamei Hitbü Efron ka heelaak shanga seka thonan phoubü Mamre chaangbou aenei Makpela sek kabü heea haoeibü mang khünkei.

¹⁴Haoboueibü mang apan phaia, Josef hoba jaisinasi shuong hoba haobou mang apla haubü pendou Ijep kaodak to sepeikei.

¹⁵Haoeneibü bou haikusije Josefeibü jaisinasi shuongei hai lauyokei, “Josefei senei hao to amaiko jungeibü pendou khüpmaiko phok lamalonga ailai kümla?”

¹⁶Hibü haoenei Josef jungto ngüh ho lentikei, “Kabouei hao ühaijinei kün la ho hai maisho lenkei:

¹⁷‘Khei kanei Josef to hai lenshi: Künei sudajada, kaibü sambü jaisinasi shuongei ai shedbü shabü ka to amaibü jungeikei kho apbuma.’ Khei yingbü khoei touje künei sudajada. Nyi kaboueibü Mühghaü sambü shuongeibü shedtiyatibü apbuma.” Ladang haoenei hautibü ngühlang sungbakei, Josef haapbei.

¹⁸Kho phaia jaisi shuongei hao jungto hauan hao thedanga khüpetko laukei, “Chühashi, kün kaibü sambü shuong ki.”

¹⁹Lausikei Josefei haoen to laukei, “Tehütma, ngo Mühghaü jeila ki si?

²⁰Kanei ngo khulimbo amaibü jungeikei, lausikei kanei tat hapbü tegü Mühghaüeije müt juong langkei püetla shanga maibü kümbei.

²¹Hibü kanei touje tehütma, ngei kan hoba kaneibü shousi shuong samlabü.” Kho tegü haoei sanou ngüh lauan haoen maangpon senyüh shemtikei.

²²Kho tegü Josef hoba haoboueibü chempen shuong Ijep kaodaka kikei, hoba Josef po saongaoto an salang kikei.

²³Kho phaia Josefei Efraimeibü shou meten semboubü hapbei, hoba Manasseeibü shou Makireibü shousi shuongkei Josef junga bukkei.

²⁴Kho phaia Josefei haoeibü jaisi shuong to laukei, “Ngo haila nyanga. Lausikei Mühghaüei tükde kan thounoulabü, hoba haoei Abraham, Isak hoba Jakob thedanga ai kaodak shanga thekeilankei kho kaodak to kan leian haulabü.”

²⁵Kheijinei Josefei Israel shousi la thetilantiko laukei, “Mühghaüei kan tükde pean chühla loulabü hoba kanei haka ngeibü lo künlangashi.”

²⁶Kho khei Josef po saongaoto an salangko kian haikei. Hobaje haoenei haoeibü manga anyaülabü ponlemhibü naangkukei, hoba Ijep kaodaka heea khinan phokei.